5/31/11

செழித்த தளங்களில் ஊடாடும் வினாக்கொக்கிகள்

|

என் இதயத்தின் இடுக்குகளில்
எப்போதும் ஒரு தேன்கூடு ததும்பிச்சொரிந்து
நினைவுகளை அழிக்கிறது!
நாசியின் முன்னால் விரவிய
நறுமணம் எப்போதும் 
கடந்தகாலத்தை மூச்சிறைக்கச் செய்கிறது.
என் கவிதை ஏட்டின்
பக்கங்களில் மடித்து வைத்திருக்கும்
வானவில்
எழுத்துக்களை உறிஞ்சிக் கொள்கிறது.

நிம்மதி பாவும்
தளத்தின் புல்வெளிகளுக்குள்
எப்போதும் ஒரு புதைகுழி
ஒளிந்து கொள்கிறது.
வாழ்க்கையில் என் இருப்பை 
முடிவு செய்வது
யார் என்பதைத்தான்
அறிய முடிவதே இல்லை1

மேலும் படிக்க இங்கே சொடுக்கவும்!

5/29/11

2

தமிழறிவோம்

|
தமிழின் நுட்பமான இலக்கணக் கூறுகளையும், அவற்றைச் சரியாகப் புரிந்து கொண்டுபயன்படுத்தினால் எவ்வளவு இனிமையாக இருக்கும் என்பதையும், பயன்படுத்த அவையாவும் எவ்வளவு எளிமையானவை என்பதையும், நமது பழந்தமிழ் இலக்கியங்களில் எல்லாம் அவை எப்படியெல்லாம் மிகச்சரியாகப் பயன்படுத்தப்பட்டுள்ளன என்பதையும் அறியும் போது வியப்பு மேலிடுகிறது. பாருங்கள்!
உயிரெழுத்துக்கு முன்பு வரும் சொற்களையும். மெய்யெழுத்துக்கு முன் வரும் சொற்களையும் அறிந்து கொள்வோம்.
'ஒரு,ஓர்':
ஒரு மரம், ஓர் இலை.
மரம் என்னும் சொல் மெய்யில் துவங்கும் போது ஒரு என்பதையும் , இலை என்று உயிரில் துவங்கும் போது ஓர் என்பதையும் பயன்படுத்துகிறோம் . இது இலக்கண விதி . 
சான்று: 

"ஒறுத்தார்க் கொருநாளை யின்பம் பொறுத்தார்க்குப்
பொன்றுந் துணையும் புகழ்"
                                                         குறள்-156
நாளை என்பதன் முன் 'ஒரு' என்று வந்துள்ளது.
"வகையறச் சூழா தெழுதல் பகைவரைப்
பாத்திப் படுப்பதோர் ஆறு"
                                                            குறள்-465
இங்கு , ஆறு என்பது உயிரில் தொடங்குவதால், ஓர் ' வந்துள்ளது.



'ஒடு, ஓடு'
 'ஒடு' என்பதும், ' ஓடு' என்பதும் முறையே மெய்க்கு முன்பும் உயிருக்கு முன்பும் அமையும். திருக்குறள் ஒன்றே போதும் , சான்றுகள் காட்ட.
"விலங்கொடு மக்க ளனையர் இலங்குநூல்
கற்றாரோடு ஏனை யவர்"- 
                                                                          குறள்-410
'மக்கள்'  என்னும் சொல் மெய்யில் தொடங்குவதால் அதறகு முன் வரும் விலங்கு என்னும் சொல்லுடன் 'ஒடு' என்று சேர்க்கிறார் வள்ளுவர். ஆனால் , அதன் பின்பு ஏனையவர் என்னும் சொல் உயிரில் தொடங்குவதால், அதற்கு முன் வரும் கற்றார் என்னும் சொல்லுடன் 'ஓடு' என்று சேர்த்துக் 'கற்றாரோடு' என்கிறார். 


'ஆல், ஆன்'

'ஆல் ' என்னும் மூன்றாம் வேற்றுமை 'ஆன்' என்பதையும் கொண்டது. உயிருக்கு முன் 'ஆன்' என்றும், மெய்க்கு முன் 'ஆல்' என்றும் வரும்.
சான்று:
"புறந்தூய்மை நீரான் அமையும்;அகந்தூய்மை
வாய்மையால் காணப் படும்"
                             குறள்-298
இக்குறளில், அமையும் என்பது உயிரெழுத்தில் தொடங்குவதால், ஆன் என்றும், காண என்பது க்+ஆ என மெய்யில் தொடங்குவதால் 'ஆல்' என்றும் வருகிறது.


'அது, அஃது'

உயிரெழுத்துக்கு முன் 'அஃது' என்றும், மெய்யெழுத்துக்கு முன் 'அது' என்றும் வர வேண்டும் என்பது விதி.
சான்று:
"அன்றறிவாம் என்னா தரஞ்செய்க; மற்று அது
பொன்றுங்கால் பொன்றாத் துணை"
                                                                                  குறள்-36
இக்குறளில், பொன்றுங்கால் என்னுஞ் சீர் மெய்யில் தொடங்குவதால், 'அது' என்று வந்துள்ளது.
"வீழ்நாள் படாஅமை நன்றாற்றின் அஃதுஒருவன்
வாழ்நாள் வழியடைக்குங் கல்"
                                                                                    குறள்-38
இக்குறளில் ஒருவன் என்பதற்கு முன் 'அஃது' என்று அமைக்கப் பெற்றுள்ளதனைப் பார்க்கலாம்.,

'தொறும், தோறும்'
உயிர்க்கு முன் 'தோறும்' என்றும், மெய்க்கு முன் 'தொறும்' என்றும் வர வேண்டும்.
சான்று:
"களித்தொறும் கள்ளுண்டல் வேட்டற்றால் காமம்
வெளிப்படுந் தோறும் இனிது"
                                                                     குறள்-1145
கள்ளுண்டல் என்பதற்கு முன் 'தொறும்' என்றும், இனிது என்பதர்கு முன் 'தோறும்' என்றும் வருதல் காண்க!
உயிரெழுத்துக்கு முன்: ஓர், ஓடு, ஆன், அஃது, தோறும்.
மெய்யெழுத்துக்கு முன்: ஒரு, ஒடு, ஆல், அது, தொறும்.

இவ்வாறு தமிழ் இலக்கண விதிகளைச் சரிவரக் கையாண்டுள்ளார் வள்ளுவர் . அவர் மட்டுமன்றி, இலக்கியம் படைத்த யாவரும் இது போலத்தான் கையாண்டுள்ளனர் . நாம்? மொழியின் அழகு சிதைந்தால் என்ன , இந்த மொழியே வேண்டாம் என்னும் மனநிலைக்குத்தான் வந்துவிட்டோமே!
மேலும் படிக்க இங்கே சொடுக்கவும்!

5/27/11

12

உங்கள் வலைப்பதிவைப் பிரபலமாக்கச் சில யோசனைகள்!

|

உங்கள் வலைப்பதிவைப் பிரபலமாக்கச் சில யோசனைகள்!
வேறுவேறு பெயர்களில் மின்னஞ்சல் முகவரிகளை உருவாக்கித் தனக்குத் தானே பின்னூட்டமிட்டுக்கொள்வது, தொடர்பதிவர்களாகக் காட்டிக்கொள்ள வேறுவேறு பெயர்களில் வலைப்பூக்களை உருவாக்குவது இத்யாதி இத்யாதி.... இவையெல்லாம் ஓல்ட் டெக்னிக்ஸ்!உண்மையிலேயே உங்கள் வலைப்பதிவு பிரபலமாக வேண்டுமா? இதோ ... லட்டு லட்டாகச் சில ஐடியாக்கள்!

### உங்கள் பதிவைப் படிப்பவர்களின் எண்ணிக்கை பெருக வேண்டுமானால் கணினி வைத்திருப்பவர்களின் எண்ணிக்கை பெருக வேண்டும். எனவே நீங்கள் வீட்டுக்கு வீடு இலவச கணினி கொடுக்கலாம். (என்னிலிருந்தே ஆரம்பிக்கலாம் )

###பின்னூட்டமிடத் தலைக்கு ஆயிரம் ரூபாய் தரலாம்!(அக்கவுன்ட் நம்பர் அனுப்பட்டுமா?)

###ரஜினி, கமல்,விஜய்,மணிரத்னம்,ஷங்கர் போன்றோரின் படங்களை ரிலீஸ் ஆகும்முன்னே எப்படியாவது பிரதி யெடுத்து வலைப்பூவில் ஓட்டலாம்(வேலூரில்)

!###நமது ப்ராடக்டை மார்கெட் செய்ய அதாவது போணி பண்ண விளம்பரங்கள் அவசியம்! எனவே தமிழ்த் தொலைக்காட்சிகள் (சன் டிவி, விஜய் டிவி உட்பட)அனைத்திலும் ப்ரைம்டைமில் உங்களது வலைப்பூவைப் பற்றி நாள்தோறும் விள்ம்பரம் செய்யலாம். வார, நாளிதழ்களிலும் தொடர்ந்து அரைப்பக்க அளவில் விளம்பரம் செய்யலாம்.(அரைப்பக்கம் போதும்)

###விக்கிலீக்ஸ் அஸ்ஸாஞ்ச் மாதிரி வல்லரசு நாடுகளின் ராணுவ ரகசியங்களைக் கண்டறிந்து வெளியிடலாம்.(சி.ஐ.ஏ., மொஸ்ஸாட் வகையறாக்கள் லாடம் கட்டினால் என்ன, பிரபலமாவதுதானே நமக்கு நோக்கம்?)

###வாராவாரம் ஒரு வி.ஐ.பி.(சச்சின், ஏ.ஆர்.ரகுமான்,அமீர்கான்,அப்துல்கலாம்,ஒபாமா போன்றோரிடம்) பேட்டி எடுத்து வெளியிடலாம். (பேட்டி கொடுக்க நானும் தயார்)

###சக வலைப்பதிவர்களின் இடுகைகளைச் சகட்டுமேனிக்குத் திட்டித்தீர்த்துப் பின்னூட்டமிடலாம்.அப்பொழுதுதான் திருப்பித் திட்ட அவர்களும் உங்களது வலைப்பூவுக்கு வருவார்கள்!(நமக்குத் தேவை அதிகப் பின்னூட்டங்கள், அவ்வளவுதான்!)

###சக பதிவர்களின் இடுகைகளைத் திருடி வெளியிடலாம்.நிச்சயமாக அவற்றை எழுதியவர்களாவது வந்து பார்ப்பார்கள்!(வீட்டுக்கு அரிவாளோடு..?)

###இது போன்ற பயனுள்ள தகவல்களைத் தொடர்ந்து வெளியிடலாம்!(இதுவரைக்கும் எத்தனை பேர் இதேபோலப் பதிவு செய்தார்களோ, நான் வலைப்பதிவுலகத்துக்கு ரொம்பப் புதுசு.)

###உலகில் இதுவரை யாராலும் தீர்வு காண் முடியாத விஷயங்களுக்குத் தீர்வு கண்டு பதிவேற்றலாம், கூட்டம் அம்மும்!மனைவி நம்பும்படிப் பொய் சொல்வது, பொது இடங்களில் எச்சில், சிறுநீர் மற்றும் இன்னபிற இதர கழிவுச் சமாச்சாரங்களைக் கொட்டாமல் தடுப்பது, மாதச் சம்பளத்தில் மிச்சம் பிடிப்பது போன்றவை. (எனக்கு இன்னும் கல்யாணம் ஆகலீங்)

###சில நோய்களின் பெயர்களைப் பட்டியலிட்டு, அவையெல்லாம் உங்களது பதிவைப் படிக்கும்போது குணமாவதாக ஒரு மேட்டரை நீங்களே கிளப்பி விடலாம்!(படித்தபின் பி.பி.யோ மனநோயோ வந்தால் என்ன செய்வது?)

###சர்வதேச ஸ்டைலில் பெயர்வைத்துக்கொண்டு ஓர் அமைப்பை உருவாக்கி அதன் விருதை உங்கள் வலைப்பூவுக்குத் தரலாம்.(நீங்கள் மட்டுமே அதில் உறுப்பினர்)

###ஏகப்பட்ட எழுத்துப் பிழைகளோடு பதிவேற்றலாம்!(ஒரு கவன ஈர்ப்புக்குத்தான்)

### அரை மணி நேரத்துக்கு ஒரு இடுகை என்ற வீதத்தில் கூகுளையே கும்மியெடுக்கலாம். (அதென்ன சைபர் க்ரைமா, குண்டாஸா.... நமக்கு சட்ட நுணுக்கமெல்லாம் அவ்வளவாத் தெரியாது!)

###பதிவுகள் மூலமாக முதியோர் கல்வி நடத்தலாம்! (கிராமப் புறங்களில் பெரும் வரவேற்பிருக்கும்!)

ஓகே பாஸ்,போய்க் கலக்குங்க! வாழ்த்துக்கள்!!
மேலும் படிக்க இங்கே சொடுக்கவும்!

5/26/11

3

நினைவுகள் தொடரும் பிறவி

|

சில பொழுதுகளில் நான் 
என்னிடமிருந்து 
விலகிநிற்கிறேன்.
அந்தத் தேவகணங்களைச்
 சேமித்து வைக்கும்
ஒழுகாத கோப்பை எனக்கில்லை!
இன்னும் சில பொழுதுகளில்
என்னை மறந்துவிடுகிறேன்.
அந்த அவசரப் பொழுதுகளை
நினைவூட்ட ஒரு விடிவெள்ளி 
என்னிடத்தில் இல்லை!
சில பொழுதுகளில் நான் மலர்ந்திருக்கிரேன்.
அந்த அற்புத நொடிகளை

அலங்கரித்து வைக்க என்னிடத்தில் 
பூந்தோட்டம் இல்லை.
என் கல்லறையோ 
ஏற்கனவே
கனவுகளால் நிரம்பி வழிகிறது!
அகோ.....மீண்டும் ஒரு
பிறவி தாரும்!
முதலிலிருந்து 
வாழ்ந்து பார்க்கிறேன்!



மேலும் படிக்க இங்கே சொடுக்கவும்!

2

பிழையில்லாத் தமிழ்

|

# எனக்குச் சாப்பிட வேண்டும்
# எனக்கு மருத்துவராக வெண்டும்

மேற்காண் தொடர்களைப் படித்துப் பாருங்கள்!
"நான் சாப்பிட வேண்டும்" அல்லது "எனக்குச் சாப்பிட வேண்டும் போலிருக்கிறது" என்பனவற்றுள் ஒன்றுதான் சரியாக இருக்க முடியும்.  அதேபோல்,"நான் மருத்துவராக வேண்டும்" என்பதுதான் சரியான தமிழ்.
எனக்குச் சாப்பிட வேண்டும் என்பது மழலை மொழி. அதனை மழலையர் சொல்லும்போது ரசிக்க முடியும்.

முப்பதும் நாற்பதும் முடிந்தவர்கள் சொன்னால் "பிள்ளை இல்லா வீட்டில் கிழவன் துள்ளி விளையாடினானாம்" என்னும் பழமொழி நினைவுக்கு வந்து தொலைக்கிறது.
மற்றொன்று:
'வெண்ணம்மி' நிறுவனங்களின் தலைவர் மும்பை விரைந்தார்'  

நாம் அடிக்கடிக் கேள்விப்படும் அல்லது வாசிக்கும் சொல்லாடல் வகைகளுள் இதுவும் ஒன்று.'வெண்ணம்மி நிறுவனங்களின் தலைவர் மும்பை ' என்று பொருள் படவில்லையா?மும்பை என்பது இடத்தின் பெயராக இல்லாமல் ஆளின் பெயராக அல்லவா அர்த்தப்படுகிறது? 'வெண்ணம்மி நிறுவனங்களின் தலைவர் மும்பைக்கு விரைந்தார்' என்பது தெளிவான , முழுமையான பொருளைத்தரும்!        வாழ்க தமிழ்!

மேலும் படிக்க இங்கே சொடுக்கவும்!

5/24/11

6

கோழி வறுத்த கறியின் சொல்லாட்சி

|
சென்ற வாரத்திலொருநாள் கோயம்புத்துர்ரின் புகழ்பெற்ற உயர்தர அசைவ உணவகமொன்றின் 'மெனு கார்டில்' 'கோழி வறுத்த கறி' என்ற ஓர் அயிட்டத்தைப் பார்த்தேன். வறுத்த கோழிக்கறி என்பதைப் பலமுறை கேள்விப்பட்டிருக்கிறேன்;விரும்பிச் சுவைத்துமிருக்கிறேன். ஆனால் , கோழி வறுத்த கறி என்பதை இங்கு பார்த்துச் சற்றுக் குழம்பி விட்டேன். சமையல்காரர் வறுத்த கறியா அல்லது கோழியே வறுத்த கறியா என்னும் குழப்பம் ஏற்பட்டாலும் , சிக்கன் மசாலா, சிக்கன் 65, பெப்பர் சிக்கன் , ஜிஞ்சர் சிக்கன், பட்டர் சிக்கன், சில்லி சிக்கன் வகையறாக்களையே மெனுகார்டில் பார்த்துப் பார்த்துக் கண்களும் , நாக்கும் புளித்துச் சலித்து அலுத்துப் போயிருந்ததால், கோழி வறுத்த கறி என்ற பெயரே நாவில் 1/2 காலன் நீரை ஊற்றெடுக்கச் செய்து விட்டது. ஆணையிட்டதும் (ஆர்டர் செய்ததும்) அடுத்த அரை மணிநேரத்தில் ஆவிபறக்க அள்ளி வந்து ( அடேங்கப்பா .... எத்தனை 'அ') மேசையில் வைத்தார். உறைப்பும் கார்ப்பும் நாவைச் சுண்டியிழுத்தன. நிற்க......
'சிக்கன்' என்ற சொல் தமிழ்ச் சொல்லாகிப் பலநாட்களாகி விட்டன. கவிப்பேரரசு சொன்னது போல 'கார்' 'சிக்கன்' போன்ற சொற்கள் தமிழின் எழுத்திலகணத்துக்குட்பட்டு , தமிழே போல ஒலிப்பதால் , இவற்றைத்தமிழ்ச் சொற்களாகக் கருதிச் சொற்களஞ்சியம் பெருக்கலாம் என்று தோன்றுகிறது.
மகிழ்வுந்து என்பது சற்றுச் சுற்றி வளைத்துச் சொல்வது போல வசீகரமற்றுத் தொனிக்கிறது. ஆனால் 'பஸ்' என்னும் சொல் தமிழ்ச்சொல்லாக முடியாது. பேருந்து என்பதே சரியான வடிவம் . 'ஸகர' எழுத்துகள் கிரந்தமாக இருந்தாலும்  அவற்றின் வரிவடிவமின்றி ஒலி வடிவத்தைத் தமிழின் 'சகர' எழுத்துகளே நிரப்பிவிடுகின்றன. 'காசு', 'பசை', 'இசை','பசு'.... எனச் சொல்லிப் பாருங்கள்! அதே போலத்தான் 'காகம் ' என்று சொல்கையில் 'KAA' 'HA' Mஎன்று ஒலிக்கும். கிரந்த எழுத்துகளின்றியே தமிழின் இலக்கியங்கள் படைக்கப் பட்டுள்ளன என்பதுவே தமிழின் வளத்துக்குச் சான்று.

அண்மையில் பாலக்காடு சென்றிருந்தேன். கேரளா எனது விருப்பமான இடம் என்பதாலும், கூப்பிடு தூரம்தான் என்பதாலும் அடிக்கடிச் செல்வதுண்டு. கேரள உணவு வகைகள் மீதும் எனக்குமிகப்பெரும் நாட்டம் உண்டு. பேரரசிச்  சோற்றை மீன்குழம்பில் ஊறவைத்துத் தின்பதின் சுவை அலாதியானது. பாலக்காட்டின் உணவகம் ஒன்றில் உணவருந்திக் கொண்டிருந்த போது, குழம்பை முடித்து விட்டு ரசத்துக்கு வாங்கும் போதும், உண்டு முடித்துத் தொகை செலுத்தும் போதும், அவர்களது " சோறு வேணுமா?","ரெண்டு சோறு எண்பது ரூபா!" என்ற சொற்பயன்பாடுகள் காதுகளுக்கு இனிமையாக இருந்தன. 
தமிழ் குறையும் நல்லுலகை மன்னிக்கவும் தமிழ் கூறும் நல்லுலகை நினைத்துப் பார்த்தேன் !'சோறு' என்ற சொல் அநாகரிகமான சொல்லாகிப் பல்லாண்டுகளாகிவிட்டன.  உணவகங்களில், " கொஞ்சம் ரைஸ் வைங்க", "சாப்பாடு தயார்" , "சாப்பாடு இருக்கா?" என்பன போன்ற உரைகளைத் தான் கேட்க முடியும்!
சாப்பாடு என்பது நாகரிகம் என்றும், ரைஸ் என்பது அதிநாகரிகம் என்றும் சோறு என்பது அநாகரிகம் என்றும் ஆழப் பதிந்துவிட்டன நம்மவர்களது மனங்களில்!

"சுத்தம் சோறு போடும்"
"சோழநாடு சோறுடைத்து"
"தேடிச் சோறு நிதந் தின்று"
"வயிற்றுக்குச் சோறிடல் வேண்டும்"
என்பன போன்ற வரிகளை நினைத்து இன்புறலாம்."சோறுண்டான், சோறள்ளித்தின்றான், சோறும் குழம்பும் சுவையாய் இருந்தன"
இவற்றையெல்லாம் சொல்லிப்பாருங்கள்! சொல்லவே சுவை பெருகும்!!

"உமிகொண் டரிசி துறப்பான் - தமிழின்
    உலகப் பெருமை மறப்பான்.
தமிழா உன்றன் தலைவிதி மாற்றத் 
    தரணியில் எவனினிப் பிறப்பான்?"
மேலும் படிக்க இங்கே சொடுக்கவும்!

3

கூடுவிட்டுப் போன பின்பும் கூடவருமோ பணமும்!

|

பாடுபட்டுத் தேடிப் பணத்தைப் புதைத்துவைத்துக்
கேடுகெட்ட மானிடரே கேளுங்கள் - கூடுவிட்டிங்(கு)
ஆவிதான் போனபின்(பு) ஆரே அனுபவிப்பார்
பாவிகாள் அந்தப் பணம்!

                                                                            -நல்வழி - 22 


திரைகடல் ஓடியும் திரவியம் தேடச் சொன்ன ஔவையார், தேடிவைத்த பணம் எதுவரைக்கும் கூடவரும் என்கிறார். 
அதனால்தான் தேடிவைத்த பணத்தையும் பிறவற்றையும் நாமும் துய்த்துப் பிறர்க்கும் கொடுத்து வாழ வேண்டும் என்கிறார்.



ஆண்டாண்டு தோறும் அழுது புரண்டாலும்
மாண்டார் வருவரோ மாநிலத்தீர் - வேண்டா
நமக்கும் அதுவழியே நாம்போம் அளவும்
எமக்கென்னென்(று) இட்(டு) உண்(டு) இரும்.
                                                                           நல்வழி - 10

வாழ்க்கைத் தத்துவத்தையும் அறவியலையும் ஔவைப்பாட்டி எவ்வளவு அழகாக நான்கு வரிகளின் நறுக்கென்று உரைத்து வைத்திருக்கிறார்!
ஔவையின் எழுத்துகள் அனைத்தும் ஔடதம் அல்ல, அமுதம்.   ஔடதம், நோய் தீர்க்கும் மருந்து, அமுதமோ , நோய் வராமல் தடுக்கும் அதிசயம்!



மேலும் படிக்க இங்கே சொடுக்கவும்!

5/22/11

5

XEROX என்பதற்குத் தமிழ்ச் சொல் என்ன?

|

அண்மையில் ஒரு விழாவில் என்னுடன் பணிபுரியும் சகோதரியின் கணவருடன் அறிமுகமாக நேர்ந்தது. கோயம்புத்தூரில் வங்கியொன்றில் பணிபுரியும் அவர் , தமிழில் கொண்டிருக்கும் ஆர்வத்தையும், ஆழமான அறிவையும் கண்டு வியந்து போனேன் . அவருடன் உரையாடிக்கொண்டிருந்த இரண்டு மணி நேரத்தில் நிறையத் தெரிந்து கொள்ள
முடிந்தது.அருவி கொட்டுவதுபோல அவரது வாயிலிருந்து தகவல்கள் கொட்டுகின்றன. மனிதர் தமிழில் மட்டுமல்லாது தெலுங்கு, கன்னடம் , மலையாளம், சமஸ்கிருதம் முதலியவற்றிலும் தேர்ச்சி பெற்றிருக்கிறார்

தமிழிலிருந்து பிற மொழிகளுக்குச் சென்று, இன்னுமங்கு வாழ்ந்து வரும் சொற்களைப் பட்டியலிட்டு அவர் பேசியது வியப்பூட்டுவதாக இருந்தது.சங்க இலக்கியம் முதல் சமகால இலக்கியம் வரை விவாதித்த அந்தச் சந்திப்பின் முடிவில் அவர் என்னுடன் பகிர்ந்து ஒரு சிறு தகவல்தான் இந்த இடுகையைப் பதியத் தூண்டியது.
'ஜெராக்ஸ்'என்ற சொல் ஆங்கிலச் சொல்லாகி வெகுநாட்களாகின்றன. அடிப்படையில் அஃது ஒரு BRAND NAME!    இன்று அதனை ஒரு வினைச்சொல்லாகக் கூடப் பயன்படுத்தத் தொடங்கியாகிவிட்டது.அதற்குத் தமிழில் சரியான சொல் என்னவென்றால் 'நகல்'  என்றுதான் பலரும் சொல்வார்கள்.ஆனால் 'நகல்' என்பது தமிழ்ச்சொல் அன்று.

பிரதியெடுத்தல் என்றும் சிலர் சொல்லக்கூடும். பொதுவாக 'பிர' எனத் தொடங்கும் சொற்களெல்லாம் தமிழ்ச்சொற்களாக இரா.சான்று: பிரமாதம், பிரபல்யம், பிரகிருதி, பிரயோகம்........
எனில், 'படியெடுத்தல்' 'படி'என்பவை பொருந்தும் சொற்களாகும். எழுத்தாளர் சுஜாத 'குளோனிங்' என்பதற்கு 'மறூ', 'படி', 'மறுபடி' என்ற பதங்களைப் பரிந்துரைத்திருக்கிறார். ஆனால், நண்பர் சொன்ன தகவல் புதுமையாக இருந்தது. மலையாளத்தில் XEROX என்பதைப் 'பகர்ப்பு' என்கிறார்களாம். பகர்ப்பு என்பது எவ்வளவு அழகான, ஆழமான, சொல்லவே சுகமான, நுட்பமான ,தூய தமிழ்ச்சொல்!தமிழ், காற்றைப் போல எங்கும் விரவியிருக்கிறது என்பதை நினக்கவே இன்பம் பெருகியது!



மேலும் படிக்க இங்கே சொடுக்கவும்!

5/21/11

2

வருகை புரிந்தாரா? வந்தாரா?

|

"அமெரிக்க அதிபர் இந்தியாவுக்கு வருகை புரிந்தார்"
"மாவட்ட ஆட்சியர் விழாவுக்கு வருகை தந்தார்"
இத்தொடர்கள் தமிழில்தான் எழுதப் பட்டுள்ளன என்றாலும், இயல்பாக எழுதப்பட்டுள்ளனவா என்றால் , இல்லை என்றுதான் கூறவேண்டும்!
"அமெரிக்க அதிபர் இந்தியாவுக்கு வந்தார்"
"மாவட்ட ஆட்சியர் விழாவுக்கு வந்தார்"
என்பவையே இயல்பான தமிழாம்!
வருகை புரிந்தார் என்பது கழுத்தைச் சுற்றி மூக்கைத் தொடுவது போன்றதாகும்.

'வந்தார்' என்ற வினையை'வருகை' என்று தொழிலாக்கி அதனுடன் 'புரிந்தார்' என்று மற்றொரு வினையைப் போட்டு..... தலை வலிக்கிறது!இது எப்படி இருக்கிறது என்றால்,
"அவர் கூழைக் குடித்தல் செய்தார்"
"அவன் வேகமாக ஓடுதல் புரிந்தான்"
"அவள் ஃப்ரான்ஸ் நாட்டில் பத்தண்டுகளாக வாழ்க்கை புரிந்து வருகிறாள்"
"கடிதம் அனுப்புதல் செய்யப்பட்டது"


என்னும் தொடர்களைப் போன்று இருக்கிறது!
அதே போலத்தான் வருகை புரிந்தாரென்பதுவும்!
குடித்தல் செய்தார்-குடித்தார்
ஓடுதல் புரிந்தான் - ஓடினான்
வாழ்க்கை புரிந்து வருகிறாள் - வாழ்ந்து வருகிறாள்
அனுப்புதல் செய்யப்பட்டது - அனுப்பப்பட்டது
இவை எளிமையானவையும் இனிமையானவையும் சரியானவையும் கூட!
 வாழ்க தமிழ்!!




மேலும் படிக்க இங்கே சொடுக்கவும்!

"வானம்"--அறத்தின் மீதூரும் வினா!

|
"வானம் " படம் பார்க்க நேர்ந்தது.திரைக்கதைக்காகத்தான் எப்படியெல்லாம் மண்டையை உடைத்துக் கொண்டு சிந்திக்கிறார்கள்.பார்வையாளர்களை அரங்கத்துக்குள் வரவழைப்பதும் , வந்தவர்களை இறுதி வரை அமர வைப்பதும் அவ்வளவு எளிதான செயலன்று!
"வானம்" நன்றாகத்தான் இருந்தது. வெவ்வேறு சம்பவங்களை ஒரே  புள்ளியில் இணைக்க மிகவும் மெனக்கெட்டிருக்கிறார்கள்.அது ஒன்றுதான் அவர்களது ULTIMATE AIM ஆக இருந்திருக்க வேண்டும்.அதன் பிறகு திரைக்கதை தறிகெட்டு ஓடுவது போலத் தோன்றுகிறது.(எனக்கு!) திரைக்கதையானது இயக்குநரின் கட்டுக்குள் இருக்க வேண்டும்.அதன் போக்கில் இயக்குநர் ஓடக் கூடாது.
ஆனால், வானம் பற்றி நான் சொல்ல வருவது, மகனின் படிப்புக்காகத் தன் சிறுநீரகத்தை விற்கச் சென்னை வரும் சரண்யாவின் மாமனாராக வரும் அந்தப் பெரியவரைப் பற்றித்தான்!அவரது பாத்திரப் படைப்பும் ,பாத்திரத்துக்கேற்ற நடிகர் தேர்வும் அற்புதமானவை.உடல் மொழியாலும், முகபாவத்தாலும் மட்டுமே பார்ப்பவர்களின் நெஞ்சைப் பிளந்து விடுகிறார்.மருத்துவமனையில் பணத்தைப் பறிகொடுத்து விட்டு அவர் தவிக்கும் காட்சியில், உண்மையிலே இருக்கையை விட்டு எழுந்துபோய் , அந்தப் பெரியவருக்கு நாம் ஏதாவது உதவி செய்தாக வேண்டும் என்ற பதைபதைப்பையும் . இரக்கத்தையும் ஏற்படுத்துகிறாரந்தப் பெரியவர்.ஆனந்தவிகடன் விமரிசனக் குழுவின் மதிப்பெண்களும் அவர் ஒருவருக்கே சரியாகப் போய்விடுகின்றன.
பணம் திரும்பக் கிடைத்து விட்டதில் அவர் அடையும் மகிழ்ச்சியும், பணத்தை அவரிடம் ஒப்படைத்துவிட்ட சிம்பு மறைந்திருந்து கண்ணீர் வடிப்பதையும் பார்த்து உண்மையிலேயே நமக்கும் தொண்டை அடைத்துக் கொள்கிறது.
அரங்கத்தை விட்டு வெளியே வந்தும் கூட அந்தப் பெரியவர் மனத்தை அரித்துக் கொண்டிருந்தார்.உண்மையிலேயே , இது போல எத்தனை பேர் இன்னும் எங்கெங்கு இருக்கிறார்களோ, அவர்களுக்கு நாம் என்ன செய்யப் போகிறோம் என்ற கேள்வி என்முன் எழுந்து நிற்கிறது.சக மனிதர்கள் துன்பத்தில் உழன்று கொண்டிருக்க , அவ்வளவு பேருக்கும் அதைத் தீர்க்கும் திராணியில்லாது, சகிக்கவும் வழியில்லாது வாழும் புவி வாழ்க்கை உண்மையில் நரகவாழ்க்கைதான்!எல்லாரும் இன்புற்றிருக்கப் பராபரமே, நீராவது மனம் வைக்க மாட்டீரா?
மேலும் படிக்க இங்கே சொடுக்கவும்!

5/20/11

3

அடங்கொய்யாலா

|

முடியின் இறந்த செல்லை
நோண்டி மீண்டும்
முளைக்க வைக்க
முடியுமா என்ற ஆராய்ச்சியில்
முழுகிக் கிடந்த நான், நேர்த்திக்கடன் கழிக்க
மொட்டையடித்தால் ஒற்றைப்படையில்
மூன்று பேருக்கு அடிக்க வேண்டும் 
என்றொரு அறிஞன்
 கையில் கத்தியுடன் சொன்னபோது
மூடிக்கொண்டு இருக்க வேண்டியதாகிவிட்டது!

மேலும் படிக்க இங்கே சொடுக்கவும்!

5/19/11

2

பிழையின்றித் தமிழ் எழுதுவோம்!

|
"இந்தியாவைக் காப்பது நமது கிராமங்கள்"
இதிலென்ன பிழை இருக்கிறது?
கிராமங்கள் என்று பன்மையில் வந்திருப்பதால்
"இந்தியாவைக் 'காப்பவை' நமது கிராமங்கள்" என்று வந்திருக்க வேண்டும்!எழுவாயும் பயனிலையும் ஒரே எண்ணில் வரவேண்டும்(ஒருமை அல்லது பன்மை).
அதே போல, கிராமங்கள் என்பதற்கு மாற்றாகச் சிற்றூர்கள் என்ற சொல்லைப் பயன்படுத்தினால் இத்தொடர் முழுவதுமாகத் தூய தமிழில் அமையும்.
கிராமம் என்பது வடமொழிச் சொல். பொதுவாக கி, தி, பி என்பவற்றுக்குப் பிறகு ரகர எழுத்துகள் வரும் சொற்களெல்லாம் தமிழ்ச்சொற்களாக இரா!
சில சான்றுகள்!

கிராமம்-க்ராமம்- சிற்றூர்
கிரகம்- க்ரகம் - கோள்
கிரீடம்- க்ரீடம்- முடி
கிரமம்- க்ரமம்- வரிசை, ஒழுங்கு
கிரகணம்- க்ரகணம்- பற்றுதல்
திருப்தி- த்ருப்தி- நிறைவு
பிரியம்- ப்ரியம்- அன்பு
பிரச்சாரம் - ப்ரசார்- பரப்புரை
போன்றவை.
தமிழ்ச் சொற்களைப் பயன்படுத்துவோம்1தமிழின் இனிமை நுகர்வோம்!!
மேலும் படிக்க இங்கே சொடுக்கவும்!

5/17/11

2
|
அண்மையில் 3 நாட்கள் தமிழகத்தில் சுற்றுலா சென்று வந்தேன். தமிழகத்தில்தான் எத்தனை இடங்கள் உள்ளன, சுற்றிப் பார்ப்பதற்கு!கோவில்கள், சரித்திரப் புகழ் பெற்ற இடங்கள், கடற்கரைகள், மலை வாழிடங்கள், அருவிகள், அணைக்கட்டுகள், என எண்ணற்ற இடங்கள்,. ஆனால் நான் பார்த்த பெரும்பாலான இடங்களில், தாம்பூலம் தரிக்கும்போது ஒரு சிறுகல் வாயில் அகப்பட்டு உறுத்துவது போல, ஒரு விஷயம் என்னை அரிக்கத் தொடங்கிவிட்டது.
எங்கெங்கு காணினும் குப்பைகளும், அசுத்தங்களும் கிடக்கின்றன. நிறைந்து வழிந்து கொண்டும், நிறையாத போதும் சிதறிய குப்பைகள் சூழ்ந்தும் நிற்கும் குப்பைத்தொட்டிகள்,சேறும் சகதியும் விரவிக் கிடக்கும் தெருவோரங்கள்,மனித , விலங்குக் கழிவுகள் புதைந்து கிடக்கும் கடற்கரை மணல்வெளிகள், வெற்றிலைச் சாறும், உடைந்து முறிந்த சிகரெட் துண்டுகளும், இன்ன பிற லாகிரி வஸ்துக்களைக் கொண்டிருந்து, குறுக்கே கிழிக்கபட்ட உறைகளும் , வாடிய பூச்சரங்களும், தண்ணீர், குளிர்பானப் போத்தல்களும் , தின்பண்ட உறைகளும், பயன்படுத்தித் தூக்கி எறியும் குவளை, தட்டு, வட்டில் வகையறாக்களும், எங்கெங்கும் பொங்கிக் கிடக்கும் சாலைகள், பூங்காக்கள், கோவில் கோட்டை வாசல்கள், கடை வீதிகள்.........
.வீடுகளடர்ந்த தெருவில் எங்கள் வண்டி போய்க் கொண்டிருந்தது. திறந்திருந்த ஒரு சில வீடுகளில் காண முடிந்த போது உள்ளே வழுவழு பளபள தரைகளும், மர, இரும்பு நாற்காலி மற்றும் மேசை போன்ற பொருள்களும் , வாகனாதி வசதிகளும் பளீரெனத் தெரிந்தாலும் , அந்த வீட்டுச் சுற்றுச் சுவருக்கும் வீதிக்கும் இடைப்பட்ட பகுதி, அடுத்த வீட்டுக்கும் இடைப்பட்ட பகுதி, வீட்டின் பின் பகுதி போன்றவை அழுக்கும் , அசுத்தமும், குப்பை கூளங்களும் நிறைந்து கிடப்பதைப் பார்த்தேன்.
மனிதனின் புறத்தோற்றம் பகட்டாக இருந்தாலும் அகத்தில் ஆயிரம் அழுக்குகள் நிரம்பியிருக்கின்றன.ஆனால், அவனது இல்லங்களிலோ, அகத்தில் சுத்தம் இருக்கிறது, புறமோ நாறுகிறது, என்ன ஒரு முரண் நகை இது?

மேலும் படிக்க இங்கே சொடுக்கவும்!

5/9/11

3

'கல்தேசம்' சிறுகதைத் தொகுப்பு-ஒரு சிறிய பார்வை

|

அண்மையில் வெளியான 'கல்தேசம்' சிறுகதைத் தொகுப்பைப் படித்து முடித்தேன்.இனிய நண்பர், கவிஞர் ஆதலையூர் சூரியகுமாரின் முதல் சிறுகதைத்தொகுப்பு இது.பயணக்கட்டுரைகள், கவிதைகள்,கட்டுரைகள், சிறுகதைகள் எனப் பல தளங்களிலும் இயங்கும் சூரியகுமார் ஆழ்ந்த வாசிப்புடையவர்.கல்கி, குமுதம் உள்ளிட்ட பல இதழ்களில் வெளிவந்த சிறுகதைகளைத் தொகுத்து கல்தேசம் என்ற தலைப்பில் வெளியிட்டிருக்கிறார். 20 கதைகளடங்கிய இத்தொகுதியைப் படித்து முடிக்கும் போது , மானுடத்தின் மீதும், அறவியல் மீதும் ஆசிரியருக்கு இருக்கும் அக்கறையை உணர முடிந்தது.
கல்தேசக் கதைகள் மனித மனங்களைப் பேசுகின்றன.இயற்கைக்காகக் கவலைப்படுகின்றன.

காதலின் உன்னதத்தை உணர்த்துகின்றன.உணர்வுகளை உருவகப் படுத்துகின்றன. நெஞ்சை நெகிழச் செய்கின்றன, மொத்தத்தில் வாசிப்போரை மகிழச் செய்கின்றன.
எளிமையான நடை சூரியகுமாருக்குக் கைவந்திருக்கிறது.கிரமியச் சொல்லாடலகள் கதைக்குச் சுவையூட்டுகின்றன.நுணுக்கமான விவரிப்புகளும் வருணனைகளும் சிறுகதை வடிவத்தைக் கொணருகின்றன.இயல்பான கதைப்போக்கில் ஆங்காங்கு தெறிக்கும் கவித்துவத் தொடர்கள் கதைக்கு மேலும் மெருகூட்டுகின்றன.


'விழுந்து விடாத விழுதுகளில்' உற்சாகம் தெறிக்கும் காதல் பேச்சுகளும் , நேர்மைக்காக எதையும் தியாகம் செய்யும் மனப்பான்மையும் , தர்க்க ரீதியான உரையாடல்களும் கதையைத் தூக்கி நிறுத்துகின்றன.அஜய்க்கும் அனிதாவுக்கும் காதல் மலரும் தருணத்தைக் காட்டியிருந்தால் இன்னும் அழுத்தம் கூடியிருந்திருக்கும்.'புழுதி' கதையில் அடுத்தவர்களின் அந்தரங்கத்தைக் கிளறும் ஆர்வத்தை ரங்கநாதன், தண்டபாணியிடம் கேட்கும் அந்த ஒரு கேள்வியின் மூலம் ஆசிரியர் சமுதாயத்தை எவ்வளவு தூரம் ஊன்றிக் கவனிக்கிறார் என விளங்க வைக்கிறது.

*பாதுகாப்பும் சோதனையுமே பாதிக்கலவரம் போல இருக்கும்!(ஒருநாள் ஒருபொழுது)
*பதற்றத்தில்ருக்கும் போது கொடூரமாகத் தெரியும் மழை(மழைக் காலக் குற்றம்)
*கவிதைக்கும் நமக்கும் அலோ  சொல்ற பந்தம் கூடக் கிடையாதே (மரணத்தின் திறப்பு விழா)
 என்பன போன்ற பல நறுக் வரிகள் தொகுப்பு முழுதும் விரவிக் கிடக்கின்றன.
"ஒரு காதலின் ஜாதகம்" தொகுப்பின் முத்தாய்ப்புக் கதை.


சிறுகதை எழுதுவதும் சூரியகுமாருக்குக் கைவந்திருக்கிறது. தொடர்ந்த வாசிப்பும் எழுத்தும் அவரை மேலும் பல உயரங்களுக்கு இட்டுச் செல்லும் என்ற நம்பிக்கயை இந்நூல் ஏற்படுத்தியிருக்கிறது. தமிழின் சமகால இலக்கிய உலகில் தனது பெயரை ஆழமாகப் பதிக்கத் தொடங்கியிருக்கிறார்.மொத்தமாகச் சொல்ல வேண்டுமெனில், தொகுப்பில் இழப்பும் , ஏதோவொரு எமாற்றமும் , துக்கமும் அநேகமாக எல்லாக் கதைகளிலும் இழையோடிக் கொண்டிருக்கிறது.அதே நேரம், மனித உணர்வுகளும் , சராசரி மனிதச் செயல்பாடுகளும்  அழுத்தமாகக் காட்டப்பட்டிருக்கின்றன. எல்லாவற்றையும் விட அறவுணர்வை வலியுறுத்தும் அடிப்படையில் கதைப்போக்கு இருப்பது கதாசிரியருக்குப் பெரிய சலாம் போட வைக்கிறது!


மேலும் படிக்க இங்கே சொடுக்கவும்!

5/7/11

5

எனது நூல் வெளியீட்டு விழா

|

நான் எழுதிய" சூரல் பம்பிய சிறுகான் யாறு" என்ற மரபுச் செய்யுள் தொகுப்பு நூலின் வெளியீட்டு விழா கடந்த 17.04.2011 அன்று திருப்பூரில் நடைபெற்றது.மரபின் மீது இருக்கும் தீராக் காதலாலும், பள்ளிப் பருவந்தொட்டே எனக்கு மரபின் மீது இருக்கும் மயக்கத்தாலும் மரபுச் செய்யுள்களை எழுதிக்கொண்டு இருப்பது என் வழக்கம். அவற்றிலிருந்து தேர்ந்தெடுக்கப்பட்ட கவிதைகளைக் கொண்டு 170 பக்கங்களில் இந்நூலை வெளியிட்டுள்ளேன். விழாவைத் தலைமையேற்று நடத்தித் தந்தவர் எனது மதிப்பிற்குரிய நண்பரும், இலக்கியத் தளத்தில் தீவிரமாக இயங்கிவருபவரும், பதியம் இலக்கிய அமைப்பின் தலைவருமான திரு.பாரதிவாசன் அவர்கள்!
எனது மரபுக்கவிதைத் தொகுதி மரபின் மைந்தன் முத்தையா அவர்களால் வெளியிடப்படுவதை விடவும் வேறென்ன பேறு நான் பெற முடியும்?

நூலை வெளியிட்டு மரபின் மைந்தன் முத்தையா நிகழ்த்திய விழாச் சிறப்புரை அரங்கத்தில் நிறைந்திருந்த பார்வையாளர்களின் நெஞ்சில் நிரம்பி நின்றது.
பெயரில் மட்டுமன்று முத்து, அவர்தம் சொற்கள் ஒவ்வொன்றும் முத்துக்கள்தாம் என்றே சொல்லலாம். கணீரென்ற குரலில் , கருத்து மழை பொழிந்த மரபின் மைந்தன் ஒரு மாமனிதர், தமிழுக்குக் கிடைத்த கொடை எனலாம் . 
நூலின் முதல் பிரதியை எனது பெற்றொர் பெற்றுக் கொண்டனர்.
கவிஞர் ஆதலையூர் சூரியகுமார் அவர்கள் என்னையும் நூலையும் அறிமுகப்படுத்தியதோடு, சங்க இலக்கியம் முதல் சமகால இலக்கியம் வரை சென்றது அவரது தீவிர வாசிப்பைக் காட்டியது.
பேராசிரியர்" கம்பன் கலைமணி" "செந்தமிழ் வித்தகர்" முனைவர்.புலவர். அமுதன் அவர்களும், பேராசிரியர்.முனைவர்.இந்திரசித்து அவர்களும் நிகழ்த்திய கருத்துரைகள் நூலின் பக்கங்களையெல்லம் அலசி ஆராய்ந்து சென்றது மட்டுமன்றி தமிழின் ஆழ அகல நீளங்களையும் விரித்துக் காட்டின.கவிஞர் நீரணி பவளக்குன்றன், வழக்கறிஞர்.சேதுராமன் அவர்கள், தலைமையாசிரியர்.திரு.வேலுசாமி அவர்கள், ஒன்றியக்குழு முன்னாள் தலைவர் திரு.பி.என்.வேலுசாமி அவர்கள். மறைதிரு.சார்லஸ் அவர்கள் ஆகியோர் வாழ்த்துரை வழங்கினர்.கலைஞர் தொலைக்காட்சியின் பழ.அமுதன் அவ்ர்கள் வழங்கிய தொகுப்புரை அரங்கின் ஏசியை விடக் குளுமையாக இருந்தது.
150 ரூபாய் விலைக்குறியிடப்பட்ட எனது நூலை வி.பி.பி யில் பெற விரும்புவோர் கீழ்க்காண் மின்னஞ்சல் முகவரியில் தொடர்பு கொள்ளலாம். msrajiniprathapsingh@ymail.com
நூலைப் படித்த பிறகு தங்களின் மேலான கருத்துக்களுக்காகக் காத்துக் கொண்டிருக்க்றேன்.
நூலுக்கு அறிஞர்கள் வழங்கிய அணிந்துரைகளிலிருந்து சில பகுதிகள்:
நாஞ்சில் நாடன் அவர்கள்:

தலைப்பே வெகுவான கிள்ர்ச்சியை ஏற்படுத்துவது.நூலில் இருக்கும் அத்தனை பாடல்களுக்கும் இன்ன பாவினம் என்னும் தகவலும், இலக்கணமும் தரப்பட்டிருக்கிறது.இந்த வகையில் இஃதோர் புதிய முயற்சி!
இந்த நூலுக்கு நான் அணிந்துரைப்பது, பரிந்துரைப்பது, இதில் இருக்கும் கவிக்கூறுகளுக்காக அல்ல, தமிழில் கவிதை எழுத வருகிறவர், மரபானாஅலும், நவீனமானலும் அறிமுகமாகி இருக்க வேண்டிய செய்யுள் வடிவங்கள், அவற்றின் இலக்கணங்கள், அவற்றுக்கான கவிதைகள் பற்றிய தகவல்களுக்காகவும்தான்!

கலைமாமணி மரபின் மைந்தன் முத்தையாஅவர்கள்:
பல்வகை யாப்புகளிலும் சுவைமிக்க கவிதைகளை இந்தத் தொகையில் ரஜினி பிரதாப் சிங் தந்திருக்கிறார்!சிறந்த சொல்வளம் கொண்ட கவிதைகளை ரசிக்கும் விதமாய்ப் படைத்திருக்கிறார்.காலத்தால் நிலைபெறும் கவிதைகளைப் படைப்பதற்கான பொறி இவரிடம் இருப்பதை உணர்கிறேன்!

பேராசிரியர் "கம்பன் கலைமணி" "செந்தமிழ் வித்தகர்" முனைவர்.புலவர்.அமுதன் அவர்கள்.
மரபுக் கவிதையின் எல்லா வடிவங்களும் மறைந்து போய் விடாதவாறு
 ஒவ்வொரு கவிதை வடிவுக்கும் தானே தன் கண்ணான கவிதைத் தூரிகையால் பொன்னான பாடல்களை ஆக்கித்தந்திருப்பது ஓர் அருஞ்செயல்! பற்பல கவித்துவ அடிகள் மிகுந்து கிடக்குமிந்நூலைக் கற்று மகிழுங்கள்! உங்களுக்கும் கவிதை வரக்கூடும்!

தமிழ்நாடு சட்ட மேலவை முன்னாள் உறுப்பினர் திரு. செ.முத்துசாமி அவர்கள்:
தமிழ் ஞாலத்தின் பார்வை பெறப் பாடுக. மேலும் பாடுக!மேன்மையுடன் பாடுக என வாழ்த்துகிறேன் நெஞ்சார!




 நூல் வெளியீடு என்பது ஏறக்குறைய ஒரு பிரசவம் போலத்தான்! நூலை எழுதி , தொகுத்து, அச்சிட்டு , திருத்தம் செய்து, மீண்டும் அச்ச்சிட்டு, அணிந்துரைகள் வாங்கி ஐந்நூறு பேரை வைத்து விழா எடுப்பது என்ற இனிமையான சுமையைச் சுமக்க எனக்குத் தோள் கொடுத்த தோழர்கள் ரப்பத் ஃபாத்திமா, பழ.அமுதன்.லட்சுமணசாமி, யோகமூர்த்தி மற்றும் கவிஞர் ஆதலையூர் சூரியகுமார் ஆகியோருக்கு இவ்விழாவைச் சமர்ப்பிக்கிறேன்!
வணக்கம்!!
விழாக் காட்சிகளுக்கு மெனுபாரில் கண்ணுக்கினியன என்ற TAB  - ஐச் சொடுக்கவும்

மேலும் படிக்க இங்கே சொடுக்கவும்!

நூலை அஞ்சலில் பெற...

|
"சூரல் பம்பிய சிறுகான் யாறு" என்னும் என்னுடைய மரபுச் செய்யுள் தொகுப்பு நூலை வி.பி.பி.யில் பெற விரும்புவோர்
msrajiniprathapsingh@ymail.com
 என்ற மின்னஞ்சல் முகவரியில் தொடர்பு கொள்ளலாம். 170 பக்கங்கள் கொண்ட இந்நூல் 150 ரூபாய் விலையிடப்பட்டுள்ளது. அஞ்சல் செலவை நாங்களே ஏற்றுக் கொள்வதால் நூலின் விலையை மட்டும் கொடுத்து நீங்கள் நூலைப் பெற்றுக் கொள்ளலாம்!
மேலும் படிக்க இங்கே சொடுக்கவும்!

5/4/11

பொருள் தெரிந்தால் சொல்லுங்கள்!

|



1.வழக்கம் மாறுவதன் மறுபக்க்த்தில் தெரியும் சலனத்தின் குறுக்குவெட்டுத் தோற்றம்!  (தலைப்பு....)
எலியும் பூனையும் என்று
சொல்வதுதான் வழக்கம்.
பூனையும் 
நரியும் என்று 
சொல்லிக்கொள்வதின்
சுகத்தை
உணரும் தருணங்களில்
நான் 'டர்' ராகிறேன்!


2.யாமத்தின் பெருநிழல்!
யாமத்தின் ஊடே 
நழுவிச் செல்லும்
தேவகணங்களில்
சிந்தை தொலைத்து
அலைந்து திரிந்து
கனவுகள் துரத்தும்
தூக்கத்தின்
வேர்த்தூவிகளில்
நுனிகலைத்துக் கொண்டிருக்கும்
காமக்கிளை பரப்பிய
கொடுவிரல்களின் நீட்சியைப் 
பின் தொடர்ந்து
செல்லத் 
தொடுபுள்ளியின் மையங்
கண்ட சோர்வில் தூங்கிப் போனேன்!



3.மலருக்கும் இலைக்கும்
இடையே
பனித்துளிகளை
அள்ளிச் சென்றது யாரோ! (இதுதான் தலைப்பு)
நீண்டாடும் கை!



4.அடப் போங்கப்பா! (இதுவே தலைப்பு)
இருளின் பிடியில்
ஊறிய மலரைக்
கொய்து பார்த்த நாள் முதலாய்
என் உறக்கங்களில் 
ஏதோ புதிய 
விரலொன்று 
முளைத்து நிற்கிறது!


கவித.... கொட்டுச்சா..... எழுதித் தள்ளிட்டேன்!  எனக்கே ஒரு எழவும் புரியல! புல்லரிச்சு மண்ணரிச்சுப் புத்தி பேதலிச்சுப் போயிட்டேன் !   நேரமாச்சி....இப்பப் போயிட்டு வாரேன்! மறுபடியும் வருவேன்!இன்னும் நெறையக் கவிதை எழுத வேண்டியிருக்கு!




மேலும் படிக்க இங்கே சொடுக்கவும்!

உடன் வருபவர்கள்

மின்னஞ்சல் மூலம் பதிவுகளைப் பெறலாம்

இங்கே உங்கள் மின்னஞ்சல் முகவரியைப் பதியவும்:

Delivered by FeedBurner

கூகுள் குரோம் பிரௌஸரில் இந்த வலைப்பூ நன்கு விரியும்!

Copyright © 2010 செழுங்காரிகை

Template N2y Shadow By Nano Yulianto