6/30/11

4

ஏக்கப் பெருமூச்சின் எழுத்துவடிவம்

|
தலைவனைப் பிரிந்த தலைவி, ஆற்றாமல் தோழியிடம் எறிந்த ஏக்கப் பெருமூச்சின் எழுத்துவடிவமிது!

மூன்றாம் கோணம் வலைபத்திரிகை- கவிதைப்போட்டி-
http://inthiya.in/ta/?p=7304


மாலை கவிந்ததடி- என்
  மனதும் கனிந்ததடி-தோழீ
இருளும் குவிந்ததடி - என்
  இதயம் குளிர்ந்ததடி!


இதயத்தி லிருப்பவர்போல் - என்னை
  இருளும் தழுவியதடி- பிரிவால்
புழுதி படிந்திருந்த -மனதைப்
  பூசிக் கழுவியதடி!



கூட்டை அடைந்திடவே- பறவைக்
  கூட்டம் விரைந்ததடி - இதயக்
கூட்டில் வசிப்பவருடன் - மனது
  கூடிக் கரைந்ததடி!


மேற்கே சூரியனும் - மங்கி
 மெல்ல மறைந்ததடி.- என்
மேனி தவித்ததடி - அவரை 
  மேயத் துடித்ததடி!


மாலைக் குளிரினைச் - சுமந்து
  மாருதம் வீசியதடி - என்னை 
மாலை யிடுபவரின் - சேதியை
  மனதில் பேசுதடி!

நிலவும் எழுந்ததடி - வெண்மை
  நிறமும் பரவுதடி - இந்த 
நிமிடம் அவரருகில் - இருக்க 
  நினைவு துடிக்குதடி!

வெள்ளிப் பூக்களினால் - கருப்பு
  வானம் சிரிக்குதடி - என் 
வெல்லக் கட்டியவரை - விழிகள் 
  வெல்லத் துடிக்குதடி !



வானை நோக்குதடி ‍ -விழிகள்
 வாசல் பார்க்குதடி- ‍ என் 
 வாழ்வைப் பகிர்பவரின் ‍- இனிய 
 வரவை நோக்குதடி!


நேரம் கரையுதடி ‍- அந்த‌
 நிலவும் காயுதடி ‍ -என் 
கோலத் திருமகனை ‍ -மனது
  கொஞ்சப் பாயுதடி !


வாசனை பூசியபடி -மலர்கள்
 விரிந்து மலர்ந்ததடி- என் 
நாசித் துவாரத்தில் -புகுந்து
  நெஞ்சம் கிளர்ந்ததடி



ஆவல் வளருதடி- என் 
  ஆவி துடிக்குதடி -என்
அவரைக் கண்டால்தான் -என்
  ஆயுள் நிறையுமடீ !



மூன்றாம் கோணம் வலைபத்திரிகை- கவிதைப்போட்டி-




மேலும் படிக்க இங்கே சொடுக்கவும்!

6/26/11

7

எனது தத்துப்பித்து ட்வீட்டுகள்!

|
ஓட்டலுக்குத்தனியாகச்செல்கையில் சப்ளையர்சீக்கிரம் வராவிட்டால்கடுப்பாகும் மனசு, கேர்ள்ஃப்ரண்டுடன் செல்லும்போது மெதுவாக வரட்டுமெனப்படபடக்கிறது

ஆனாலும் ஒரிஜினல் ப்ரொஃபைல் போட்டோவோடு ட்வீட்டுவது என்பது பல சமயங்களில் சிக்கலாகத்தான் இருக்கிறது!

இந்த இரன்டு வரி ட்வீட் தான் உலகையே மாற்றியமைக்கப் போகிறது என்று நினைத்துத்தான் எல்லா ட்வீட்டுகளுமே வெளிப்படுகின்றன.

அழைப்பின் பேரில் விழாக்களுக்குச் செல்வதன் நோக்கம், வாழ்த்துவதை விடவும் மொய் வரவுசெலவுகளையே அதிகம் சார்ந்திருக்கிறது.

கட்டளைக் கலித்துறை எழுதுவதன் நவீன, எளிய வடிவந்தான் ட்வீட்டுவது!

டூவீலரின் ஜெயன்ட் சைஸ் பேக் டயர்கள்தாம் ஆண்களின் 'எக்ஸ்ட்ரா சமாசாரத்தின்' வெளிப்பாட்டு வடிகால்!(புரிகிறதோ?)

முழு இரவும் தெரியும் முழுநிலவை விட, அது நூறு நிமிடங்கள் பூமியால் மறைந்து விடுவதைத்தான் மக்கள் அதிகம் ரசிக்கின்றனர்.#சந்திரகிரகணம்

நிறைவேறாத ஆசைகள்தாம் கனவுகளாக வருகின்றன அல்லது ட்வீட்டுகளாக வெளிப்படுகின்றன!

எல்லாருக்கும் மாதக் கடைசிகள் வரவே செய்கின்றன.ஆனால் தேதிகள்தான் ஆளாளுக்கு மாறுபடுகின்றன.#புலம்பல்

நடன,இசைநிகழ்ச்சிகளில் நடுவராக இருப்பவர்கள் திறமையை மதிப்பிட வருபவர்களா, 'தெறம' காட்டவருபவர்களா என்ற சந்தேகம் எனக்கு ரொம்பநாளாக் இருக்கிறது!

சொன்னால் என்ன நினைப்பார்களோ என்று நினைக்கும் விஷயங்கள்தாம் ட்வீட்டுகளாக வெளிப்படுகின்றன!

ஓட்டலுக்குத்தனியாகச்செல்கையில் சப்ளையர்சீக்கிரம் வராவிட்டால்கடுப்பாகும் மனசு, கேர்ள்ஃப்ரண்டுடன் செல்லும்போது மெதுவாக வரட்டுமெனப்படபடக்கிறது

நிச்சயிக்கப்பட்ட ஆயுளிலிருந்து ஒரு வருடம் குறைந்து போய் விட்டதே எனத் துக்கித்துக்கொண்டிருக்கையில் பிறந்த நாள் வாழ்த்துக்கள் வருகின்றன!

கோவையின்வணிகவளாகமொன்றில் ஏறுகிறேன்..பெயின்ட்அடித்திருக்கிறோம் இன்னும்காயவில்லைஎன்றுசொன்னாலும் தொட்டுப்பார்த்தால்தான்மனசுகேட்கிறது.

டாப்- 4 பட்டியலில் நாங்கள் இருக்கிறோம் என்று யாராவது சொன்னால் அவர்கள் நாலாவது இடத்தில் இருக்கிறார்கள் என்று அர்த்தம்!

புரிந்து கொள்ளாத ஜென்மம் என்கிறார்கள், புரிந்து கொள்வது எளிதாகத்தான் இருக்கிறது, ஒப்புக் கொள்வதுதான் கடினமாக இருக்கிறது!

அதி நவீன பார் வசதி என்று போர்டு வைக்கிறார்களே , அவர்களுக்கெல்லாம் மனசாக்ஷியே கிடையாதா?

பிசாசின் சொற்கள் இனிமையானவை என்று சொல்கிறார்கள். மனைவியின் சொற்கள் கடுமையானவை என்று அனுபவஸ்தர்கள் சொல்கிறார்கள்! என்ன லாஜிக்கோ?

நடந்து முடிந்ததைப் புட்டுப் புட்டு வைப்பார் என்று சிலரைப் பார்க்க ஓடுபவர்களுக்கெல்லாம் ஷார்ட் டெர்ம் மெமரி லாஸ் ப்ராப்ளம் இருக்குமோ?

அருகிலிருக்கும் தேநீர்க்கடையில் வெந்நீர் வாங்கி, மாத்திரை விழுங்கியபின் பேருந்தைக் கிளப்பும் ஓட்டுநரைக் காணும்போது மனதை என்னவோ செய்கிறது!


மேலும் படிக்க இங்கே சொடுக்கவும்!

6/23/11

6

கனவில் வரட்டுமா?

|
நேரிசை வெண்பாக்கள்:
மூன்றாம் கோணம் வலைபத்திரிகை- கவிதைப்போட்டி-
http://inthiya.in/ta/?p=7304

மூன்றாம் கோணம் வலைபத்திரிகை அறிவித்துள்ள கவிதைப்போட்டிக்காக அவர்கள் கொடுத்திருந்த படத்தை வைத்து எழுதிய கவிதை இது.


கனவில் வரட்டுமா?   



சூழ்ந்த துயரும் சுகமும் மறந்திரவில்
ஆழ்ந்து துயிலும் அழகேநான் - வாழ்ந்து
பெறுவது வேறென்ன பெண்ணரசி உன்றன்
குறுநகை யன்ன கொடை!


திறவாயோ என்றுன் திருவடியில் சாய்ந்தே
உறங்காமல் பார்த்திருப்பேன் உன்னை - நிறமொளிரும்
ஓவியம்போல் எவ்வா றுறங்குகிறாய் பக்தன்போல்
சேவித்து நின்றேன் சிலிர்த்து!


தங்கத் தளிர்க்கொடியே தாமரையே வான்மதியே
பொங்கிப் பெருகுதடி பொன்முகத்தில் ‍- ‍ தங்கித்
தினவெடுக்கும் பேரழகைத் தீண்ட வருவேன்
கனவிலுன்மேல் மேகமாய்க் கவிழ்ந்து!

தூங்கிப் புரள்கிறாய் தோகையே கண்டுள்ளம்
ஏங்கித் தவிக்கிறது எப்படித்தான் -தாங்கிக்
கழிப்பேனோ வாழ்வைநான் காதல்நோய் தீண்டக்
கிழியாதோ என்னிதயம் கேள்!


நிலவும் கவியெழுதும் நீயுறங்கும் சீரைச்
சிலநொடி பார்த்தாலே சிந்தை - கலைந்துவிடும்
நில்லாதே என்னாவி நெஞ்சுக்குள் தூக்கத்தால்
கொல்லாதே மூடியகண் கொண்டு!

புரண்டு படுக்காதே பூகம்பம் என்னுள்
திரண்டு பிதுங்கித் திமிறும் - இரண்டு
மலைகள் நிகர்த்த மதுக்கலசம் கண்டு
நிலைகுலையச் செய்யும் நிமிர்ந்து!


அள்ளிக் கரங்களில் அப்படியே தூக்கிவிடத்
துள்ளிக் குதித்துத் துடிக்குதடி - உள்ளம்
கனவில் ஒருமுறைநீ கண்டுவிட என்னைத்
தினமும் புரிவேன் தவம்!

சிற்பமாய் உன்னைச் செதுக்கிய ப்ரம்மனின்
கற்பனைதான் என்னேபோ கண்டவுடன் - பொற்சிலைதான்
தூங்குகிற தென்றே துணிவர் எவரும்நீ
தூங்குகிற பேரழகு பார்த்து!



உறங்குகிறாய் அங்கே உருகிநான் இங்கே
கிறங்குகிறேன் வண்ணநிறைக் கிண்ணந் - திறந்தூற்றிப்
பெய்து முகிலும் பிசகில்லா மெத்தையை
நெய்து கொடுத்ததோ சொல்!

பின்னிரவில் மெல்லப் பிறைநிலவும் வந்தெட்டிச்
சன்னல் வழியே சரிந்தபடி - கன்னிநீ
தூங்குவதைப் பார்த்தபடி தொண்டை செருமிவிடும்
ஏங்கிப்போய் ஓர்பெரு மூச்சு!




மேலும் படிக்க இங்கே சொடுக்கவும்!

6/14/11

3

பொன்னின் பொருண்மை

|

மண்ணுக்கு அடியிலிருந்து வெட்டி எடுக்கப்படும் வெறும் உலோகந்தான் அது.
ஆனாலும் தங்கம் இல்லாமல் மனித வாழ்க்கையைக் கற்பனை செய்ய இயலாது.மூவாசைகளுள் ஒன்றாகப் பொன்னைக் குறிப்பிடக் காரணம், அதன் வசீகரமான, ஒளிரும் அழகுத் தன்மையா,அல்லது கிடைத்தற்கரிய பொருளாக இருப்பதா தெரியவில்லை.அழகும் வசீகரமும்தான் காரணம் என்றால், பொன்னை விட அழகும் வசீகரமும் உள்ள எத்தனையோ பொருட்கள் உள்ளன. அதே போலக் கிடைத்தற்கரிய பொருட்களும் எத்தனையோ உள்ளன.சில நேரங்களில், திடீரெனத் தங்கத்தின் இருப்பு மிக அதிக அளவில் எங்கேனும் கண்டறியப்பட்டோ அலல்து நீரைப்போல நிலத்தடியில் பரவலாகக் கண்டறியப் பட்டாலோ தங்கத்தின் மீது நமக்கிருக்கும் ஈர்ப்பு என்ன ஆகும் , தஙகத்தின் ம‌திப்பு என்ன ஆகும்,தங்கத்தை வாங்கிக் குவித்து வைத்திருக்கும் மக்களின் நிலை என்ன ஆகும் என்று சிந்திப்பதுண்டு!

நேற்று எனது தோழி ஒருத்தி சிலப்பல சவரன்களை, தங்க அணிகலன்கள் விற்பனை செய்யப்படும் கோயம்புத்தூரின் புகழ்பெற்ற கடையொன்றில் வாங்கி வந்து அதைப்பற்றிய தகவல்களை என்னிடம் பகிர்ந்து கொள்கையில், தங்கத்தில் முதலிடுவது எனபதுபுத்திசாலித்தனமான ஒன்று என்றும், அஃது ஒரு மிகச்ச்றந்த சேமிப்பு முறை என்றும்,அஃது ஒரு சொத்தும் கூட எனறும்,குடும்ப விழாக்களில் நமது ஸ்டேட்டஸ் ஸிம்பல் என்றும் தெள்ளத் தெளிவாகப் புரிந்த எனக்குள் சில வினாக்கள் எழுந்தன.
பெண்குழந்தைகள் வைத்திருப்பவர்கள் தங்கத்தைச் சேமிப்பதையும்,நகைச் சீட்டுப் போடுவதையும் பார்த்திருக்கிறேன்.பெண்களூக்குக் கல்வியறிவும்,தன்னம்பிக்கையும் ஊட்டுவதில் காட்டும் ஆர்வத்தை விட,அவர்களுக்காகத் தங்கத்தைச் சேமிப்பதில் பெற்றோர்கள் காட்டும் ஆர்வம் அதிகம் என்பதைக் கண்கூடாகப் பார்த்திருக்கிறேன்.

பன்னிரண்டாம் வகுப்புக்குப் பிறகு,கல்லூரிக் கல்விக்கு நிறைய‌ச் செலவாகும் என்று, அந்தப் பணத்துக்கு நகை வான்கி வைத்து விட்டுத் திருமணத்துக்கு மாப்பிள்ளை தேடத் தொடங்குபவர்களையும் பார்த்திருக்கிறேன்.
 எனது சொந்த அனுபவமே கூட உண்டு,.எனது சகோதரிக்குக் கல்லூரிச் செலவுக்குச் சில லட்சங்கள் தேவைப்பட்ட போது, அதனைத் தயார் செய்து வைத்திருந்த நிலையில்,சிலர் ஆலோசனை சொன்னார்கள். இந்தத் தொகைக்கு இவ்வளவு சவரன் தங்கம் வாங்கலாம் ,திருமணச் செலவுக்கு இவ்வளவு வைத்துக் கொல்ளலாம் என்கிற ரீதியில் அந்த ஆலோசனைகள் இருந்தன.

ஆனால் எனக்கு அப்படித் தோன்றாததால், கல்லூரியில் சேர்த்தோம். இன்று மாதாமாதம் அவர் இரண்டு சவரன் மதிப்பிலான ஊதியம் வாங்கிக்கொண்டிருப்பதோடு, கற்றுத் தேர்ந்ததன் மதிப்பையும் , தன்னம்பிக்கையையும் கொண்டிருக்கிறார்.
 தோழி சொன்னது போலத் தங்க‌த்தில் முதலிடுவது எதிர்கால நனமைக்கு வழிவகுக்கும். தஙத்தை அடகுவைத்துக் கடன் வாங்குவது,சில ஆண்டுகளிலேயே விற்று லாபம் பார்ப்பது,அவசரத்துக்கு விறபது, உள்ளிட்ட பயன்கள் தங்கத்தால் கிடைப்பவை.
முன்பே சொன்னது போல, அஃது ஒரு சொத்து, சேமிப்பு,கௌரவம் எல்லாமும் கூட.இந்த மிகச் சிறிய உலோகத்தால் தான் உலகப் பொருளாதாரமே கட்டமைக்கப்பட்டிருக்கிறது. எளிய பொருளியல் கொள்கையின் மூலாதாரமாகத் தங்கம் அமைந்திருக்கிறது.மாதாமாதம் அரசின் முதியோர் ஓய்வூதியம் வாங்குபவர் முதல் ஐ,நா.சபை வரை தங்கமே பொருளாதாரத்தின் அடிப்படைக் காரணியாகத் திகழகிறது.இவை எல்லாமே வியப்பை ஏற்படுத்தினாலும், தங்கத்தின் பொருண்மைப் பயன் என்ன எனச் சிந்தித்தேன். குறைந்த பட்சம் இரண்டு தாள்களை இணைக்கும் குண்டூசியாகக் கூட அதன் பயன் இருக்கவில்லை. இன்று 'பேப்பர் கோல்டு' போன்ற முறைகள் வந்துவிட்ட நிலையில், ஒரு பருப்பொருளாகத் தங்கம் ஜீரோ நிலையில்தான் பயன்படுகிறது.

பொன்னின் பயன் அதன் மதிப்பில்தான் இருக்கிறதே தவிர, அதன் பொருண்மை‍ப் பயன் ஏதுமில்லை.
தங்கம் இல்லாத உலகைக் கற்பனை செய்து விடலாம். ஆனால் இரும்பு இல்லாத உலகைக் கற்பனை செய்து விட முடியாது.இந்தப் பருப்பொருள் பயன்பாட்டு வாதத்தைச் சிலர் ஏற்பது இல்லை.தங்கம் தேவை இல்லை என்று சொல்வதன்று, இந்த 'நகை'முரணை ரசிக்கச் செய்வதே இவ்விடுகையின் நோக்கம்.
ஆனால் பொன்னை ரசிப்பதை விட, அண்மையில் கேரளாவின் கொழிஞ்சாம்பாறையிலிருந்து வடக்கிபாளையம் வழியாகக் கோயம்புத்தூரை அடுத்த கிணத்துக்கடவு வந்த ஒரு பொன்மாலைப் பொழுதில், அந்தி சாயும் நேரத்தில்,பைக்கை ஓரமாக நிறுத்திப் பார்த்த, கதிரவனின் தகதக மஞ்சள் நிறக்கதிர்கள் சாலையின் இருபக்கங்களிலும் விளைந்து படர்ந்த பசும்பயிர்களின் மீதுபட்டுத் தெறித்து, ஜாஜ்வல்யமாக மின்னிய அந்தத் தாவரத் தங்கத்தை என்னால் மற‌க்கவே முடியவில்லை. எனக்கு வாழ்க்கையின் அழகையும், இயற்கையின் இனிமையையும், பொழுதுகளின் நறுமையையும் உணர்த்தும் வல்லமை பொன்னுக்குக் கிடையாது போங்கோள்!




மேலும் படிக்க இங்கே சொடுக்கவும்!

6/11/11

3

திரு.நாஞ்சில் நாடன் அவ்ர்களுடனான ஒரு சந்திப்பு!

|
தமிழின் முதுபெரும் எழுத்தாளரும், எளிமையான ஆனால் சொக்கவைக்கும் நடை கைவரப் பெற்றவரும்,தனது அனுபவங்களைப் பிறர்க்கும் பாடமாக்கும் ஆற்றலுடையவரும், நுட்பமான ஆய்வுப் பார்வை உடையவரும்,பழந்தமிழிலக்கியத்தில் தீராத தேடுதல் வேட்கை கொண்டவரும், எண்ணற்ற வாசகர்களைத் தன்பால் ஈர்த்து வைத்திருப்பவருமான திரு.நாஞ்சில் நாடன் அவர்களை ஏப்ரல் மாதத்தில் கோய‌ம்புத்தூரில் அவரது இல்லத்தில் சந்தித்தேன்!

"சூரல் பம்பிய சிறுகான் யாறு" என்ற தலைப்பில், தமிழின் யாப்பு வகை அனைத்திலும் நான் பாடிய செய்யுள் தொகுதிக்கு அணிந்துரை வாங்குவதன் பொருட்டு அவரில்லஞ்சென்றேன்.
காட்சிக்கு எளியன் கடுஞ்சொல்லன் அல்லன் என்ற வரிகளை அவ‌ரித்தில் கண்டேன்.மிகப்பெரிய அறிவுஜீவியின் இல்லத்துக்குள் நுழைகிறோம் என்ற உணர்வைவிட, மிக நெருங்கிய உறவினரின் இல்லத்துக்கு வந்திருக்கிறோம் என்ற உணர்வே மேலிட்டது.அவரது வரவேற்பும் உபசரிப்பும் அந்த அளவு அன்புடன் இருந்தது.ஏறத்தாழ மூன்றுமணிநேரம் அவருடன் உரையாடிக் கொண்டிருந்ததில், அவரது வாசிப்பின் ஆழம், அறிவின் அடர்த்தி,, பார்வையின் வீச்சு, ஆகியவற்றை உணர்ந்தோம் நானும் , என்னுடன் வந்த எனது இனிய நண்பரும், தமிழாசிரியரும்,இலக்கியத்தில் பேரார்வம் கொண்டவருமான திரு.கோவிந்தராஜன் அவர்களும்.

மனிதர் சங்க இலக்கியம் முதல் சமகால இலக்கியம் வரை அலசி ஆராய்ந்த பாங்கு என்னில் வியப்பேற்படுத்தியது.தமிழில் மரபுக்கவிதை மீது அவர் கொண்டிருக்கும் காதல் ஆழமானது.மரபின் சுகத்தை உணர்ந்து அனுபவித்திருக்கிறார். இலக்கணம் என்பது எழுத்தாளர்களுக்கு, குறிப்பாகக் கவிஞர்களுக்கு எவ்வளவு இன்றியமையாதது என்பதை ஆணித்தரமாக நிறுவிக் காட்டினார்.
 உயிரியல் துறையிலுமவருக்கு ஆழ்ந்த அறிவும் ஆர்வமும் இருக்கிறது.மஞ்சணத்திப் பூவில் துவங்கி மர வகைகள், மீன் வகைகள், மலர்வகைகள், இலைகள், சிறு பூச்சிகள் எனப் பரந்து விரிகின்றன அவரது அனுபவப் பகிர்தல்கள்.
  தமிழினி இதழில் அவர் எழுதும் கட்டுரைகளையும், அவற்றில் அவர் காட்டும் சங்க மேற்கோள்களையும் படித்து வியந்து போயிருந்த நான், அதுபற்றி அவரிடம் சொன்னேன்.
சங்க இலக்கியத்தில் அவர் செய்திருக்கும் சிறு சிறு ஆய்வுகளும், நுட்பமான தேடல்களும் அடர்த்தி மிகுந்தவை.எனது நூலுக்கு அவர் அளித்திருக்கும் அணிந்துரையே ஓர் ஆய்வுக் கட்டுரை போல் அமைந்திருந்தது."சூரல் பம்பிய சிறுகான் யாறு" என்ற பழந்தமிழில‌க்கண மேற்கோள் பாடலை அவர் விரித்து விளக்கியிருக்கிறார்.

அவரது படைப்புகளை ஆழ்ந்து வாசித்தவன் நான். பல செய்திகளை அவரது படைப்புகளிலிருந்து நான் சிலாகித்துச் சொன்னபோது கூட ஒரு மெலிதான புன்முறுவல் மட்டுமே அவரிடத்தில் வெளிப்பட்டது. அருவி போல் பொழிந்த அவரது கருத்துகளை ஆனந்தமாகக் கேட்டுக் உள்வாங்கிவிட்டு, விடை பெற்று வெளியே வந்தோம்.வழியெங்கும் அவரது கருத்துகளையே நானும் நண்பரும் அசை போட்டபடி வந்தோம்.இலக்கணத்தை அலட்சியப் படுத்துபவரையும், இலக்கணம் அறியாதவர்களையும், அறிவது தேவை இல்லை என்பவர்களையும் பற்றி அவர் ஆதங்கப் பட்டது இன்னும் செவிகளில் ஒலித்துக் கொண்டே இருக்கிறது.
தாய்மொழியை ஒதுக்கித் தள்ளிவிட்டு இந்தச் சமூகம் எதைச் சாதிக்கப் போகிறது என்று தெரியவில்லை, அப்படியே சாதித்தாலும் அதைச் சாதனை என எங்ங்னம் ஏற்றுக் கொள்வதோ தெரியவில்லை!


மேலும் படிக்க இங்கே சொடுக்கவும்!

6/8/11

9

மொபைல் போன் ப்ரவுஸிங்கில் தமிழ் எழுத்துருக்கள் தெரிய வேண்டுமா?

|

செல்போனில் ப்ரவுஸ் செய்கையில் தமிழ் எழுத்துருக்கள் தெரிவதில்லை, வெறும் கட்டம் கட்டமாகத் தெரிகின்றன என்ற புலம்பல்கள், மொபைல் ஷோரூமில் கேட்டதற்குக் கூட சிம்ப்பிளாக "உங்க மொபைல் சப்போர்ட் பண்ணாது சார்" என்கிற விதத்திலான மறுமொழிகள், நோகியா உள்ளிட்ட பிராண்டட் மாடல்களில் மட்டுமே தமிழ் எழுத்துருக்கள் தெரியும் என்பன போன்ற வதந்திகள் ஆகியவை என்னிடத்திலும் இருந்தன. அதற்குத் தீர்வு அண்மையில் கிடைத்தது.
உங்கள் ஆப்பரா மினி ப்ரவுஸரைத் திறந்து,
* முகவரிப் பட்டையில் (அட்ரஸ் பார்)   www என்பதை நீக்கிவிட்டு opera:config என்று டைப் செய்யவும்.
*செட்டிங்ஸ் தேர்ந்தெடுத்து use bitmap fonts for complex scripts என்பதில்    yes கொடுத்து     save செய்து வெளியேறவும்!
இனி ப்ரவுஸ் செய்யுங்கள். கட்டங்கள் எல்லாம் மறைந்து தமிழ் எழுத்துருக்கள் தெளிவாகத் தெரியும்.எனக்கு இத்தனை நாட்களாகத் தெரியாத இந்தத் தகவலை என்னுடன் பகிர்ந்து கொண்ட சக வலைப்பதிவரும், இனிய நண்பருமான திரு. அகிலம் தங்கதுரைக்கு(http://www.minsittu.blogspot.com/) நன்றிகள்!
மேலும் படிக்க இங்கே சொடுக்கவும்!

6/6/11

2

ஐயா வாங்க அம்மா வாங்க அக்கா வாங்க, கொஞ்சம் எட்டிப்பாத்துட்டுப்

|
ஐயா வாங்க அம்மா வாங்க அக்கா வாங்க, கொஞ்சம் எட்டிப்பாத்துட்டுப் போங்கனு கூப்பிடற மாதிரி ஒரு கனவு வந்தது. ச்சே சே... எதுக்கு இப்படியெல்லாம் கூப்பிடணும், ஒழுங்கா எழுதினா எல்லாரும் வந்து பார்ப்பாங்களேன்னு தோணிச்சு. உடனே ரொம்ப யோசிச்சு ஒரு கவிதை எழுதினேன், அப்புறம் இன்னொண்ணு எழுதினேன். படிச்சுப் பாத்துட்டுக் கருத்து ஏதாவது இருந்தாச் சொல்லிட்டுப் போங்க புண்ணியமாப் போகும்,,.. ஐயோ, மறுபடியும் அது மாதிரியே வருதே, 
அன்புடையீர் , படித்துப் பார்த்து விட்டுக் கருத்துச் சொல்லப் பிடித்திருந்தால் சொல்லுங்கள், என்னைச் செதுக்கிக் கொள்ள உதவும்.


பின்வாசல்களில் கூடுகட்டும் மனம்

முன்வாசலில்
புகழ்ந்துவிட்டுப்
பின்வாசலில்
புறம் பேசுபவர்கள்,
பிறரால் 
புகழப்படும்போது
புளகாகிதமடைந்து
பூரித்துப் போகிறார்கள்!
புகழ்பவர்கள் எல்லாருக்குமே
பின்வாசல்கள் இருக்கக்கூடும் என்பது
அவர்களுக்குப் 
புரிவதே இல்லை!


ஏழாவது சுவை
இனிக்கும் கசக்கும்
புளிக்கும் கார்க்கும்
உவர்க்கும் துவர்க்கும்
உருகி உருகிப் 
புறம் பேசுதல் 
நாவுக்கு என்ன சுவை
கொடுக்கும்?





மேலும் படிக்க இங்கே சொடுக்கவும்!

6/2/11

4

என்னமோ போடா மாதவா...!

|

தேநீர்க்கடைகளில் அமர்ந்து மணிக்கணக்கில் வெட்டியாகக் கதைப்பதன் சுகத்தை அறியாதோர் செவ்வாய்க் கோளில் கால் பதிப்பது கூட வீண்தான்.அண்மையில் தேநீர்க்கடையொன்றில் கேட்ட உரையாடலின் ஒரு பகுதியைத் தருகிறேன்.30 வயதைத் தொட்ட இருவர் பேசியதை ஒட்டுக் கேட்டபடித் தேநீரை உறிஞ்சிக் கொண்டிருந்தேன்.
ஆள் 1:  என்னடா மாப்ள, ரெண்டு நாளா ஆளக் காணோமே

ஆள் 2:  சான்ஃப்ரான்சிஸ்கோ போயிருந்தேண்டா....
ஆள் 1: அங்க என்னடா? சரக்கு அடிக்கவா?
ஆள் 2: இல்ல ... அங்க ஒரு சாமியாரு இருக்காருன்னு நம்ம ........... சொன்னான்....போனேன்!
ஆள் 1: சான்ஃப்ரான்சிஸ்கோவிலேயேவா?
ஆள் 2: இல்ல மாப்ள.... அங்கிருந்து பத்துப் பதினஞ்சு கிலோமீட்டர் தூரத்தில டோக்கியோ நு ஒரு எடம்....மாஸ்கோ போற பஸ்ல ஏறினா அஞ்சு ரூபா டிக்கெட்டு. எறங்கி, கரும்புக்காட்டுக்குள்ள குறுக்குவழில ரெண்டு கிலோமீட்டர் 

நடந்தா லண்டன் நு ஒரு எடம். அங்கதான் இருக்காரு அந்தச் சாமியாரு.
ஆள் 1: ஏன் ? மெயின் ரோட்டுல இருந்து பஸ் கிடையாதா? 
ஆள் 2: இருக்கு, ஒரு நாளைக்கு ரெண்டு தடவதான் வருமாம்!
ஆள்1: சாமியார் கிட்ட எதுக்குப் போன ?
ஆள்2: புட்டுப் புட்டு வெக்கறாருடா மாப்ள....
ஆள் 1 : என்னது ... புட்டு விக்கறாரா ?
ஆள் 2: கேனயா... போடா,..... நடந்தத எல்லாம் புட்டுப் புட்டு வெக்கறாருன்னு நம்ம ........ தான் சொன்னான்..... போய்த்தான் பாக்கலாமேன்னு கெள்ம்பபினோம்.மூணு பஸ் மாறி சான்ஃப்ரான்சிஸ்ககோ போயி அங்கிருந்து மாஸ்கோ பஸ்ல ஏறி டோக்கியோ ஸ்டாப்புல எறங்கி நடந்து லண்டன் போறதுக்குள்ள மத்தியானம் ஆயிடுச்சு. அந்தக் குக்கிராமத்துல டீக்கடை ஒண்ணு இருந்துச்சு. பன்னும் டீயும் அடிச்சுட்டு சாமியாரப் பாக்கப் போனோம். ஏற்கனவே பத்துப் பதினஞ்சு பேரு நின்னுக்கிட்டிருந்தாங்க.....நாலஞ்சு காரும் இருந்தது....
ஆள் 1: அப்புறம் .... ?
ஆள் 2: ஒரு மனி நேரங் கழிச்சு சாமியாரோட சிஷ்யன் ஒருத்தன் கூப்பிட்டான், போனோம். நல்லாப் பேசினாரு. நாலஞ்சு ஏக்கர் தோப்பும், மடு கன்னும் இருக்கு அவருக்கு. கூடவே ரெண்டு மூணு எடுபிடிகளும் இருக்காங்க...சோறு தண்ணி வெக்க.என்னப் பாத்தாகுமே , வான்க தம்பி ந்னு வாய் நெறயச் சொல்லி உக்காரச் சொன்னாரு. ஒரு பிடி விபூதி அள்ளிக் கையில கொடுத்தாரு. பேரு ஊரு எல்லாம் கேட்டாரு, சாப்பிட்டாச்சான்னு கேட்டாரு.
நமக்கு தோப்பு , மாடு கன்னு எல்லாம் இருக்கு நு ஆரம்பிச்சு அவரப் பத்தி அஞ்சு நிமிஷம் சொல்லி முடிச்சாரு....அப்புற என்னைப் பாத்து உனக்கென்னவோ பிரச்சனை இருக்குன்னு சொன்னாரு...எனக்குப் படிப்பு கம்மி, இது ரொம்பச் சோதனைக்காலம், அம்மா அப்பாவுக்கு நோவு நெறைய இருக்கு, அப்படீன்னுஎன்னோட ஜாதகத்தையே புட்டுப் புட்டு வெச்சாரு...!
ஆள் 1: ஏண்டா... இதக் கேக்கவா இத்தனை செலவு பண்ணி அவ்வளவு தூரம் போன, என்னியக் கேடிருந்தா உன்னப் பத்தி நானே சொல்லியிருப்பேனே.....................................................................................................................................................................................................
(வெளி நாட்டு நகரங்களின் பெயர்கள் வருமிடங்களில் எல்லாம் நம்மூர்ப் பெயர்களைப் போட்டுக் கொள்ளுங்கள்.புரிந்தவர்கள் புரிந்து கொள்ளுங்கள். புரியாதவர்கள், புரிந்தவர்களிடம் கேட்டுத் தெரிந்து கொள்ளுங்கள்! வர்ட்டா...?)


மேலும் படிக்க இங்கே சொடுக்கவும்!

6/1/11

7

'உ'கரத்தின் மீது நமக்கிருக்கும் வெறி!

|
'அ' கரம் முதலான அருந்தமிழ் மொழியில், 'உ'கரம் மூன்றாமெழுத்தாக அமைந்துள்ளது.ஒருமாத்திரை அளவுடைய இந்த 'உ'கரம் தான் நம்மை எப்படியெல்லாம் ஆட்கொண்டுள்ளது எனப் பார்த்தால் பெருவியப்பு மேலிடும்.

'உ' எனும் இவ்வுயிரெழுத்துப் பிறக்குமிடமானது இதழகளாகும். இதழ்கள் குவியும்போது 'உ' பிறக்கிறது. (நன்னூல்)
பொதுவாகக் கைநொடிக்கும் கால அளவையோ அல்லது கண்ணிமைக்கும் கால அளவையோ ஒரு மாத்திரை என்கிறோம். குறிலுக்கு ஒரு மாத்திரை யும் , நெடிலுக்கு இரண்டு மாத்திரை அளவும், மெய்யெழுத்துகளுக்கு அரை மாத்திரை அளவும் ஒலியளவு ஆகும்.ஆனால், ஒரு சில இடங்களில், 'உ'கரமானது தனக்குரிய ஒரு மாத்திரை அளவிலிருந்து குறைந்து அரை மாத்திரை அளவினதாய் ஒலிக்கும். அதனை நாம் குற்றியலுகரம் என்று , கூறுகிறோம்.

வல்லுகரங்களான கு,சு,டு,து,பு,று ஆகிய ஆறும் வல்லின மெய்யைத் தொடர்ந்து வருவதுசொல்லின் இறுதியில் வன்றொடர்க் குற்றியலுகரம் ஆகும். 
சான்று:
நாக்கு
மூச்சு
பாட்டு
கூத்து
காப்பு
கூற்று.
மெல்லின மெய்யைத் தொடர்ந்து இவ்வாறு உகரங்களும் வருவது மென்றொடர்க் குற்றியலுகரமாகும்.
சான்ரு:
பங்கு
பஞ்சு
வண்டு
பந்து
அம்பு
கன்று.

இடையின மெய்யைத் தொடர்ந்து சொல்லின் இறுதியில் இவ்வாறனுள் ஏதேனும் ஒன்று வருவது இடைத்தொடர்க் குற்றியலுகரமாகும்.
சான்று:
பல்கு
ஆய்சு
மார்பு
கொய்து.
சொல்லின் இறுதியில் இவ்வாறும் அமைந்து, அவற்றுக்கு முன் நெடில் இருந்தால் , அது நெடிற்றொடர்க் குற்றியலுகரமாகும்.
சான்று:
பாகு
காசு
நாடு
பாபு (கதவு)
ஆறு.

ஆய்த எழுத்தைத் தொடர்ந்து சொல்லின் இறுதியில் இவை வந்தால் ஆய்தத் தொடர்க் குற்றியலுகரமாகும்.
சான்று:
எஃகு
கஃசு
அஃது
இஃது.
சொல்லின் இறுதியில் இவ்வாறனுள் ஏதேனும் ஒன்று அமைந்திருந்து, அதற்கு முன் உயிர்மெய்யாக இருந்தால் , உயிர்த்தொடர்க் குற்ரியலுகரமாகும்.
சான்று:
மதகு
அரசு
பகடு
பழுது
மரபு
வயிறு.




அதே போலத் தனி எழுத்தாக உள்ள எல்லா உகரங்களுமே முற்றியலுகரமாகும்.
தனிக்குறிலை அடுத்து வரும் உகரம்,(நகு,பசு,படு,அது,தபு,மறு,கரு,புழு,கணு போன்றவை)
தனி எழுத்தாக வரும் உகரம்,(உ, கு,சு,து,ணு,டு,பு,று,ளுஆகியவை)
இருகுறிலை அடுத்துவந்த , கு,சு,டு,து,பு,று அல்லாத பிற உகரங்கள்,(கதவு,அரவு,அலமு,விழவு,உழவு போன்றவை)

ஆனால் நமது பேச்சு வழக்கில் மெய்யில் முடியும் சொற்களைப் பெரும்பாலும் உகரம் சேர்த்தே முடிக்கிறோம்.
சான்று:
பல்-பல்லு
நெல்-நெல்லு
வயல்-வயலு
கள்-கள்ளு
மண்-மண்ணு
தேள்-தேளு
தேன் -தேனு
தேர் - தேரு
நான் - நானு
மீன் - மீனு
பேன் - பேனு
யாழ் - யாழு
வால் - வாலு
பகல் - பகலு
திடல் - திடலு
பார் - பாரு
வேர் - வேரு 
செய்யுள் - செய்யுளு
பட்டியல் மிக நீளமானது. இதைக் கூடச் சகிப்பே, ஆனால். ஆங்கிலத்தின் நிலைதான் பரிதாபகரமானது.
CAKE-கேக் - கேக்கு
LAND -லேன்ட் - லேன்டு
AND - அன்ட் - அன்டு
ROAST-ரோஸ்ட் - ரோஸ்ட்டு
SONGH - சாங் - சாங்கு
GROUND -க்ரௌன்ட் - க்ரௌன்டு
PRINT- ப்ரின்ட் - ப்ரின்ட்டு
PANIT-பெயின்ட் - பெயின்ட்டு
POINT-பாயின்ட் - பாயின்ட்டு
போன்றவை .
இதைக்கூடச் சகிப்பேன். ப்ரின்ட் ப்ரிவ்யூ(PRINT PREVIEW) என்பதை, கூட்டுச் சதி, பாட்டுப் பெட்டி, பூட்டுக்காரன் பாட்டுக்காரன் என்பது போல ப்ரின்ட்டுப் பிரிவியூ என்று சொல்வதுதான் குருதி அழுத்தத்தைக் கூட்டுகிறது. ஆங்கிலத்தைத் தாய்மொழியாகக் கொண்டவர்கள் நாம் ஆங்கிலம் பேசுவதைக் கேட்டால் , நாம் ஆங்கிலம்தான் பேசுகிறோம் என்று சத்தியம் செய்தால் தான் நம்புவார்கள்.தமிழில் பேச வேண்டிய இடங்களில் அல்லது பேசக்கூடிய இடங்களில் எல்லாம் ஆங்கிலத்தில் பேசுவது அல்லது ஆங்கிலம் கலந்து பேசுவது என்பது தமிழுக்குச் செய்கிற துரோகம். அவ்வாறுபேசுகிற ஆங்கிலத்தையும் தமிழைப் போலப் பேசுவது ஆங்கிலத்துக்குச் செய்கிற துரோகம்.
ஒருமொழி கொன்றும் ஓய்ந்திடாமல், பிறமொழியும் கொன்றால்தான் பிறவிப்பயன் தீருமோ எனத் தோன்றுகிறது.









மேலும் படிக்க இங்கே சொடுக்கவும்!

உடன் வருபவர்கள்

மின்னஞ்சல் மூலம் பதிவுகளைப் பெறலாம்

இங்கே உங்கள் மின்னஞ்சல் முகவரியைப் பதியவும்:

Delivered by FeedBurner

கூகுள் குரோம் பிரௌஸரில் இந்த வலைப்பூ நன்கு விரியும்!

Copyright © 2010 செழுங்காரிகை

Template N2y Shadow By Nano Yulianto