10/29/12

10

கிறுக்கு முற்றியது

|


கிறுக்கு முற்றியது

                     (தாழிசை)

கண்ணழகுக்கு இவ்வுலகில்

       என்னவிலையும் கொடுக்கலாம்;
கண்ணசைவுக் கட்டளையில்
      காலன்கூட மயங்கலாம்!


உதிர்க்கும் வார்த்தை ஒன்றுக்காக‌

      உலகத்தையே துறக்கலாம்;
உதட்டு வார்த்தை உத்தரவில்
     சொர்க்கம்கூடத் திறக்கலாம்!

பக்குவமாய்ப் படைத்தசாமிக்குப்

      படையல் ஒன்று போடலாம்;
முக்தியடைய அடுத்த பிறவியிலுன்
     முகப்பருவாய்ப் பிறக்கலாம்!


என்னவளே உன்னழகை

      என்ணியெண்ணி வியக்கலாம்;
கன்னியுன்றன் முகத்தைகாட்டிக்
      கல்லைக்கூட மயக்கலாம்!


கன்ணேஉன் கனிமொழியைக்

     காலம்முழுதும் கேட்கலாம்;
புண்ணியமாய்ப் போகுமொரு
     புன்னகை செய் தேவலாம்!


கண்மணியின் காலடியில்

     காலம் முழுதும் கிடக்கலாம்; - உன்
கால்கள்பட்ட இடத்திலெனக்குக்
     கல்லறையே கட்டலாம்!


உன்விழியின் ஒளியதனை

     உலகுமுழுதும் பரப்பலாம்;
இரவுபகல் வேறுபாடே
    இல்லையென்று சொல்லலாம்!


கூந்தலிழை ஒன்றுபோதும்

     குவலயத்தை ஆளலாம்;
ஏந்திழையின் எண்ணங்களை
     எழுத்துவடிவில் தீட்டலாம்!


பாதம் துடைக்க வானிலிருந்து
     மேகத்துணி கிழிக்கலாம்;
பாதம் அழகா? மேகம் அழகா?
     பட்டிமன்றம் வைக்கலாம்!


தலையில் தவழ நிலவும்கூடத்

     தாவிக்குதிக்கப் பார்க்கலாம்;
தவறிவிழுந்த தலைமுடியைத்
     தத்தெடுத்து வளர்க்கலாம்!


கைதவறித் தரையில் விழுந்த

     கைக்குட்டையை எடுக்கலாம்;
காதலுலகின் சின்னமதைக்
     கம்பத்திலே ஏற்றலாம்!


கூந்தல்கண்ட பூவெடுத்துக்

     கொஞ்சிக்கதை பேசலாம்;
தேனில்நனைத்து ஊறவைத்துத்
    திவ்வியமாய்ப் புசிக்கலாம்!




 பூவிதழில் தேந்தடவிப்
     புதையல்ஒன்று செய்யலாம்;
தேவியுன்றன் கன்னக்குழி
     தேடியதை நிரப்பலாம்!


பாதம்பட்ட துளிநீரைப்

     பத்திரமாய் வைக்கலாம்;
பட்டமரம் துளிர்க்குமதைப்
     பக்குவமாய்த் தெளிக்கலாம்!


வெட்டியெறிந்த நகப்பிசிறை

     விண்ணுலகு அனுப்பலாம்;
கட்டழகின் மாதிரியாய்க்
     காட்டிப்பெருமை அடிக்கலாம்!


கால்பதித்த மண்ணெடுத்துக்

     கோயிலொன்று கட்டலாம்;
தேவதையே நீயேதான்
     தெய்வமென்று வணங்கலாம்!


கொலுசுமணியின் தினுசுகண்டு

     கொள்ளையடித்துப் போகலாம்;
கொஞ்சம்சுரண்டி நெஞ்சில் தடவிக்
     காதல்நோயைத் தணிக்கலாம்!

பனிவிரல்கள் என்மீது

      பட்டுவிட நேரலாம்;
இனியுமென்ன உலகிலெனக்கு
       இந்நொடியே சாகலாம்!



(ஈரடியா ணென்சீர் கொண்டமைவனவெல்லாந் தாழிசை யாம்.)


                         (எனது "சூரல் பம்பிய சிறுகான் யாறு" நூலிலிருந்து....!)




மேலும் படிக்க இங்கே சொடுக்கவும்!

10/6/12

2

அரையிறுதிக்கு முன்னேறும் அணிகள்

|

என்ன இவ்வளவு தாமதமாக ஒரு பதிவா என்று பார்க்காதீர்கள்...இது வேறு கதை ...

அரையிறுதிக்கு முன்னேறும் அணிகள் எது  ?
இங்கிலாந்து, நியூஸிலாந்து வெளியேறியது...

இத்தொடர்கள் எல்லாம் செய்தித்தாள்களில் வந்தவை ..அரையிறுதிக்கு முன்னேறும் அணிகள் எவை என்றும் இங்கிலாந்து , நியூசிலாந்து அணிகள் வெளியேறின என்றும் எழுதியிருந்தால் எவ்வளவு அழகாக இருக்கும்..? 
ENGLAND AND NEWZEALAND  IS OUT 
என்று யாரும் எழுதுவதும் இல்லை..எழுதினால் அதை யாரும் ரசிப்பதும் இல்லை.......ம்ம்ம்ம்ம்...என்னத்தச் சொல்ல..?போயிட்டு வர்றேன்...
மேலும் படிக்க இங்கே சொடுக்கவும்!

9/29/12

11

தூய தமிழ்ச்சொற்கள்

|

டக்கர் - அருமை
தங்கம் - பொன்
ஸ்வர்ணம் - பொன்
குரு - ஆசான், ஆசிரியர்
உல்லாசம்- களிப்பு


வலைப்பூக்களில் தூய தமிழைப் பயன்படுத்துவோம்
மேலும் படிக்க இங்கே சொடுக்கவும்!

9/27/12

2

கோயம்புத்தூருக்கு மோனோ ரெயில்

|
தொழில், கல்வி,சுற்றுலா மற்றும் மருத்துவத்துறைகளில் கோலோச்சிவரும் கோயம்புத்தூர் மாநகரம் கட்டமைப்பு வசதிகளில் போக்குவரத்தைப் பொருத்தவரையில்  பெருகிவரும் மக்கள்தொகையைச் சமாளிக்க இயலாமல் திணறி வருகிறது. INDIAN TIER II CITIES பிரிவில் வரும் இருபது நகரங்களில் ஒன்றான கோவையில் இருபது லட்சத்துக்கும் மேற்பட்ட மக்கள் வசித்துவரிகிறார்கள்.. பேருந்து, ரெயில் விமானம் என இந்தியாவின் அனைத்துப்பகுதிகளுடனும் சிறப்பாக இணைக்கப்பட்டிருந்தாலும் மாநகரப்போக்குவரத்து நெருக்கடி என்பது நாள்தோறும் அதிகரித்து வருகிறது.

சத்தி சாலை, பொள்ளாச்சி சாலைப் போக்குவரத்து நெரிசலில் மாட்டினால்  விழிபிதுங்கிவிடும்..  இந்த இடையூறைத் தவிர்க்க   மோனோ ரெயில் திட்டம் உதவிகரமாக இருக்கும் .. மாநகராட்சிக்கூட்டத்தில் இதற்கான தீர்மானம் நிறைவேற்றப்படுமென நினைக்கிறேன்..TUFISIL ( Tamilnadu Urban Infrastructure Finanacial Service Limited)) எனப்படும் மாநில அமைப்பிற்கு இந்த வரைவு அனுப்பப்படும்.
in comparison
city                    urban area population       city limit population                     project status

KOCHI                     20 Lakh                           7.5 Lakh                    metro work under process

KOZHIKODE          19.5Lakh                          4.5  Lakh                  DPR prepared

THIRUVAN
ANTHAPURAM     15 Lakh                            8 Lakh                       project under study

COIMBATORE      21.5  Lakh                        10.5 Lakh                  feasibility study to be conducted.
                                                                                                         ( Courtesy : TOI )




மேலும் படிக்க இங்கே சொடுக்கவும்!

9/25/12

7

சுடிதாரா...குர்தீஸா...?

|

இன்று
 வருவாயா மாட்டாயா...
சுடிதாரா..குர்தீஸா...
கொண்டையா..பின்னலா..
பஸ்ஸா....டூவீலரா...
பார்ப்பாயா...பார்க்கமாட்டாயா....
என்று பட்டிமன்றம் நடத்தியே
என் பகல்பொழுதுகள் கழிகின்றன...!


மேலும் படிக்க இங்கே சொடுக்கவும்!

9/24/12

7

மக்காயாலாவுக்கு மீனிங் தெரியுமா மக்களே....?

|
தற்செயலாகப் பார்க்க நேரிட்டதிரைப்படம் "நான்". போய் அமர்ந்த சிறிது நேரத்திலேயே அந்தப் பாடல் வந்தது.  மக்கயாலா.......ஒருமணி நேரம் மட்டும் நேரத்தைப் போக்க வந்த இடத்தில் மயக்கும் இசையும் , துள்ளும் அசைவுகளும், வசீகர வரிகளுமாக மக்கயாலா பாடல் மனதில் நச்சென்றுஅமர்ந்துகொண்டது..மக்கயாலாவுக்குப் பொருள் என்னவென்று தேடினேன்..பாடலாசிரியர் என்ன பொருளில் எழுதினார் என்று தெரியாது.ஆனால் மக்கயாலா என்பது MICHAELA  என்பதன் நவீன வடிவம் என்றும்  அழகான , எல்லாரையும் வசீகரிக்கக்கூடிய, நளினமான கூந்தலையுடைய,அழகான கண்களையுடைய இளம்பெண் என்றும் பொருள் கிடைத்தது......பொருள் தெரியாமல் மக்கள் போராடிக்கொண்டிருப்பார்களே என்ற்தேடலின் அடிப்படையில்  இந்தப் பதிவைத் தருகிறேன்.

 

மேலும் படிக்க இங்கே சொடுக்கவும்!

9/23/12

5

அடடா...!

|

இல்லாத இடை , கொடியிடை, பனியிடை, மெல்லிடை  என இடையைத்தான் எத்தனை விதமாக வருணித்துள்ளனனர்....எனது பத்தாம் வகுப்புத் தமிழாசிரியர் கூறுவார்.. ஆனண்களின் இடை மத்தளம் போன்றும் பெண்களின் இடை உடுக்கை போன்றும் இருக்க வேண்டும் என்பார்.உடுக்கை என்பது மேலே விரிந்தும் ,இடையில் குறுகியும், பின் விரிந்தும் இருக்கும்.   

பற்றிக் கொண்டு நடக்க இடையைப்போல.... வேண்டாம்..சொந்தக்கதைகள்... நளவெண்பாவில்புலவர் புகழேந்தி சொல்வதைக் கேட்போம்....



என்றும் நுடங்கும் இடையென்ப ஏழுலகும்
நின்ற கவிகை நிழல்வேந்தே ‍ ஒன்றி
அறுகால் சிறுப‌றவை அஞ்சிறகால் வீசும்
சிறுகாற்றுக் காற்றாது தேய்ந்து


தமயந்தியின் இடையானது, ஆறு சிறுகால்களையுடைய சிறிய வண்டானது  தனது மெல்லிய சிறகால் வீசும் காற்றுக்குக் கூட ஆற்றமாட்டாமல் துவண்டு விடும்   என்கிறார்...இதை இனியும் விளக்க வேண்டுமா...? குறளில்  
"அனிச்சப்பூக் கால்களையாள் பெய்தாள் நுசுப்பிற்கு
நல்ல படாஅ பறை"   என்பார் வள்ளுவர்..காம்பைக் கிள்ளாமல் பூச்சூடியவளின் இடை பாரம் தாங்காமல் முறிந்து விழும் ஒலியைக் கூறுகிறார் வள்ளுவர்.

மேலும் படிக்க இங்கே சொடுக்கவும்!

9/20/12

12

காதல் ரேகை

|

ஒரே ஒருமுறை
என்னுடன்
கைகுலுக்கிக்கொள்..!
என் 
கைரேகை எல்லாம்
காதல் ரேகை ஆகிவிடட்டும்...!!
மேலும் படிக்க இங்கே சொடுக்கவும்!

9/15/12

5

ம்ம்ம்ம்ம்ம்....

|
டூ வீலரில் என்னை
மிதவேகத்தில்
கடந்து செல்கிறாய்!
என் மனதோ ராக்கெட் போல்
அதிவேகத்தில்
துரத்துகிறது உன்னை!
மேலும் படிக்க இங்கே சொடுக்கவும்!

9/14/12

5

கொளுத்திப் போடுவொம்

|
பிழையில்லாத் தமிழையும், தூய தமிழையும் வலியுறுத்தி நாம் தொடர்ந்து பதிந்து வருவதில் பலரும் நம்மிடம் கேட்கும் கேள்வி இது. உங்கள் பெயரில் வரும் வடமொழி எழுத்துகளையும், எஸ் என்ற தலைப்பெழுத்தையும் ஏன் மாற்றவில்லை?சற்று விளக்கமாகக் காண்போம்.தமிழ் எழுத்துகள் மொத்தம் எத்தனை என்று கேட்டால் 247 என்போம். இக்கூற்று சரிதானா என்று பார்த்தால்  தமிழ் எழுத்துகளை இலக்கணிகள் முதல் மற்றும் சார்பெழுத்துகள் என இருவகையாகப் பிரிக்கின்றனர்.முதல் எழுத்துகள் மெய்யும் உயிருமாக முப்பதும்,சார்பெழுத்துகள் பத்துமாகப் பிரிக்கப்படுகின்றன. இவற்றுள் ஸ, போன்ற ஒலிக்குறிப்புகளுக்கு வரிவடிவம் இல்லை எனினும் அவற்றின் ஒலிவடிவம் புழங்கியே வருகிறது.காகம் என்பது காம் என்றே ஒலிக்கப்படுகிறது.பசை என்பது பஸை என்றே ஒலிக்கிறது.எனினும் பெயர்ச்சொற்களை நாம் கையாள்கை யில் கிரந்த எழுத்துகளான வடமொழி எழுத்துகள் தேவைப்படவே செய்கின்றன.ஷேக்ஸ்பியரை செகப்பிரியர் என்று கூறுவது நெருடத்தான் செய்கிறது. அதேபோல ஆவணப்படுத்தப்பட்ட சொற்களான எஸ்.குமாரபாளையம் போன்றவற்றில் நாம் அதை எவ்வாறு தவிர்ப்பது எனத் தெரியவில்லை...!கவிப்பேரரசு கார் போன்ற ஆங்கிலச்ச் சொற்களை எழுத்திலக்கணத்துக்குட்பட்டுத் தமிழ்ழ்சொல்லாகவே கருதலாம் என்கிறார்.ஆனால் பெயர்ச்சொற்கள்,BRANDED NAMES , ஆவணப்படுத்தப்ப்ட்ட பெயர்ச்சொற்கள் (பெயர்ச்சொற்களில் இடம் ,பெயர், காலம்முதலியன அடங்கும்) ஆகியவற்றின் ஒலிப்பை மாற்ற வேண்டாம் என எண்ணுகிறேன்.தமிழில் கலந்துவிட்ட பிறமொழிச் சொற்களைத் தவிர்ப்பதும் சொற்றொடர் அமைப்பதில் பிழைகளைத் தவிர்ப்பதும் தேவைப்படும் அதே நேரத்தில் ழ கர ஒலிப்பு இல்லாத பிறமொழிகளில் "தமிழை"  தமில் என்னும்போது எவ்வளவு அருவெறுப்பாக இருக்கிறதோ அதேபோலக்தான் ஷேக்ஸ்பியரை செகப்பிரியர் என்பதும்...தமிழுலகம் என்ன சொல்லப்போகிறதோ....? ஆர்வத்துடன் காத்திருக்கிறேன்.
மேலும் படிக்க இங்கே சொடுக்கவும்!

4

கோயம்புத்தூரில் ஏர் டாக்ஸி அறிமுகம்

|
தொழில், கல்வி மற்றும் மருத்துவத் துறைகளில் கொடிகட்டிப் பறக்கும் கோவைக்கு இப்பொழுது ஏர்டாக்ஸி வசதி அறிமுகப்படுத்தப்பட்டுள்ளது. இதற்கு முன்புசென்னையில் மட்டும்  இந்த வசதி இருந்தது.கோவையில் இருந்து சென்னைக்கு எட்டுப் பேர் செல்ல 4 லட்சம் கட்டணமாகக் கூறப்பட்டுள்ளது.சென்னை மற்றும் பெங்களூருவில் ஒரு மணி நேரத்துக்கு 2,25,000 ரூபாய் கட்டணம் ஆகிறது. கோவையில் அறிமுகக் கட்டணமாக இரண்டு லட்சம் ரூபாய் அறிவிக்கப்பட்டுள்ளது.சென்னையைச் சேர்ந்த SANWE Air நிறுவனம் இந்த வசதியைக் கோவையில் அறிமுகப்படுத்துகிறது.இனி கோவையில் இருந்து இந்தியாவின்  எந்த ஊருக்கும்  ஏர்டாக்ஸி மூலம் செல்ல முடியும்.
நீலகிரி, கோயம்புத்தூர்,  மற்றும் திருப்பூர்ப் பகுதியில் உள்ள சுற்றுலா, கல்வி, டெக்ஸ்டைல், மருத்துவம் மற்றும் இயந்திரத் துறையினர் இதன் மூலம் பெரும்பயன் அடைவர் என்று நிறுவனத்தின் பொது மேலாளர் கூறுகிறார்.  

நன்றி: டைம்ஸ் ஆஃப் இண்டியா, கோவைப் பதிப்பு
மேலும் படிக்க இங்கே சொடுக்கவும்!

9/6/12

7

வெப்ப வரிகள்

|

கவ்விச் சுவைத்த உன்
கரும்பிதழ்களுக்கிடையே
அள்ளிக் குடித்த
அமுதமென்ன
பாலும் தேனும் கலந்த
படையலா காதல் தேவதையே..?
சொல்வாய்...என்
சுடர் மிகு  பூவழகே...!


அனல் பறக்கிறதா வரிகளில்... வெப்பமாகாமல் என்ன செய்யும்..? கவிதை  சுடப்பட்டதாச்சே...  திருவள்ளுவர் எழுதிய குறள் இது...

பாலொடு தேன்கலந்தற்றே பணிமொழி
வாலெயி  றூறிய  நீர்  .


 காதற்சிறப்புரைத்தல்  என்னும் அதிகாரத்தில் வரும் 1121 ஆவது குறட்பாவிது..... வள்ளுவர் முன் நாமெல்லாம் ....சும்மா....!
மேலும் படிக்க இங்கே சொடுக்கவும்!

3

ஆசெதுகை-கவிஞர்களுக்காக ஓரிடுகை

|
தொடைகளுள் எதுகை என்பது செய்யுளுக்கு இனிமை சேர்க்கும் அழகுப் பொருளாம். இரண்டாமெழுத்து ஒன்றிவரத் தொடுப்பது எதுகை ஆகும்.

எ‍‍கா: "மதியும் மடந்தை முகனும் அறியா

              பதியிற் கலங்கிய மீன்"                                                       (திருக்குறள்)

 இங்கு மதி, பதி என்பவை எதுகைச்சொற்கள். ஆசெதுகை என்பது என்ன? ஆசு என்ற பதத்துக்குப் பற்று, பொடி எனப் பொருள் கொள்ளலாம். 

பொன் மற்றும்வெள்ளி நகை செய்பவர்கள் கம்பி,மற்றும் தகடுகளைப் பொடி வைத்து ஊதி இணைப்பர்.
அதனைப் போல எதுகை யெழுத்தையும், முதலெழுத்தையும் இணைக்கும் வகையில் இடையில் வரும் எழுத்தை ஆசென்று கூறி இவ்வகையை  ஆசெதுகை என்பர்.

 சான்று:

     "ஒத்துயர் கானவன் கிரியி னோங்கிய

      மெத்துறு மரந்தொறு மின்மி னிக்குலம்

      மொய்த்துள வாமென முன்னும் பின்னரும்

      தொத்தின தாரகை மயிரின் சுற்றெலாம்"

                                                                                         -  கம்பராமாயணம்.

        ஒத்துயர்

        மெத்துறு

        மொயித்துள

        தொத்தின       

  என்பனவற்றுள் மூன்றாம் அடியில் எதுகை எழுத்தான‌ 'த்' என்பதற்கும்

 முதலெழுத்துக்கும் இடையில் 'ய்' வந்து இஃது ஆசெதுகை ஆயிற்று.

இதனை யகர வொற்றாசிடை எதுகை என்பர்.

          ஈரொற்றும் உடன் மயங்கக்கூடிய ய்,ர்,ழ் என்பன வல்லின மெய்களான க்,ச்,த்,ப் என்பனவுடன் ஆசெ
துகையாக வருவது போல் 'ல்' என்பது

     "ஆவே றுருவின் வாயினும் ஆபயந்த

       பால்வே றுருவின வல்லவாம்"

என்று ஆசெதுகை யாகும்.
மேலும் படிக்க இங்கே சொடுக்கவும்!

9/4/12

2

தமிழறிவோம்

|
தூய தமிழ்ச்சொற்களை வலைப்பூக்களில் பயன்படுத்துவோம்!சுயநலம்- தன்னலம்
ரசம் - சாறு, சுவை
மாமிசம், மாம்சம்- இறைச்சி, கறி,உடல்,ஊன்,சதை,தசை,புலால்
பிரதிபலிப்பு - எதிரொளி
பிரமாதம் - அருமை
ஜாமீன் - பிணை
மேலும் படிக்க இங்கே சொடுக்கவும்!

8/27/12

5

பதினாறு பேறுகள்

|

பதினாறும் பெற்றுப் பெருவாழ்வு வாழ்க என்று சொல்கிறார்களே,, அந்தப் பதினாறு என்னென்ன என்று கேட்டிருந்தார் அன்புக்குரிய GM.BALASUBRAMANIYAM  அவர்கள்.. இதோ...

புகழ்
கல்வி
ஆற்றல்
வெற்றி
நன்மக்கள்
பொன்
நெல்
அறிவு
பெருமை
ஆயுள்
நல்லூழ்
இளமை
துணிவு
நோயின்மை
நுகர்ச்சி
பொருள்

மேலும் படிக்க இங்கே சொடுக்கவும்!

8/26/12

7

பசி வந்தால் பறக்கும் பத்து எவை என்று தெரியுமா?

|
பசிவந்தால் பத்தும் பறந்து போகும் என்கிறார்களே ... அந்தப் பத்து என்னென்ன என்று தெரியுமா? நல்வழியில் ஔவையார் கூறுகிறார். பாடலைப் பாருங்கள்... பசி வந்து விட்டால் என்னவெல்லாம் நம்மை விட்டுப் பறக்கின்றன என்று..


மானங் குலங்கல்வி வண்மை அறிவுடைமை
தானம் தவமுயற்சி தாளாண்மை - தேனின் 
கசிவந்த சொல்லியற்மேற் காமுறுதற் பத்தும்
பசிவந்திடப் பறந்து போம்!

மேலும் படிக்க இங்கே சொடுக்கவும்!

8/19/12

4

தூய தமிழ்ச்சொற்கள்

|

நிஜம் - உண்மை
நிஷ்டை - தூக்கம், உறக்கம்
சுபாவம் - இயல்பு, தன்மை
சுபிக்ஷம் - செழிப்பு, வளமை
கூஜா - குவளை
அவஸ்தை - துன்பம்


தூய தமிழ்ச்சொற்களை  வலைப்பூக்களில் பயன்படுத்துவோம்..
மேலும் படிக்க இங்கே சொடுக்கவும்!

8

சாய்னா நெஹ்வால்----வாழிய பல்லாண்டு..!

|

பொன்மகள் போற்றுதும் பொன்மகள் போற்றுதும்
வெண்கலம் வீரத்துடன் வென்று கொடுத்துநம்
பெண்குலம் சிறப்பித்த தால்.               (சிந்தியல் வெண்பா)

தங்கத்தைத் தவற விட்டாலென்ன...? வெண்கலம் வென்று வந்தவளே ஒரு தங்கமகள்தானே...?


                சாய்னா நெஹ்வால்
             (வண்ணக வொத்தாழிசைக் கலிப்பா)

விறகுதள்ளி யரிசியிட்டு விதியதன் மேல் பழிசுமத்திZ
இறகுகிள்ளிச் செவிகுடைந்த வழக்கமெலா மொழிந்ததுகாண்
இறகணிந்த சிறுபந்தா லிருபஃதே யகவைகொண்ட‌
திறம்மிகுந்த வொருமங்கை திசைபலவு முலவிவந்து
குவித்தவெற்றி யரும்பெண்ணைக் குலத்திற்கே பெருமையாம்
புவிப்பந்தில் நம்நாடும் பூண்டதுகாண் புதுவாகை
                                                                                             (தரவு)

ஆந்திரத்துத் தலைநகராம் ஐதராபாத் தினில்பிறந்து
தேர்ந்திறகுப் பந்தாட்டந் தினந்தோறும் பயிற்சிபெற்று
உலகளவில் பலபோட்டி கலந்துவெற்றி           வலம்வருஞ்சீர்
நலமிகுந்த விளஞ்சாய்னா நேவல்வா ழியநெடுநாள்!
அதிவிரைவில் முதலிடத்தைத் தரவரிசை   தருமெனலாம்
பதக்கங்கள் பலவள்ளிப் பட்டங்கள் பலசூடி
நம்மினிய நாட்டுக்குப் புகழ்சேர்க்கப் புறப்பட்ட‌
விம்முதிறஞ் சிறந்தவேள விளையாடு! புகழ்சூடு!!
கரமடைந்த வலைமட்டை களஞ்சுழலுங் கூர்வாளோ
உரம்படைத்த உளங்கொண்டு களவெற்றி குவிப்பாளோ
அணிகலனாய் நாட்டுக்கே ஆகிவிட்ட நேவாலோ
மணிமகுடந் தனையணிந்து மனதெல்லாம் நிறைவாளோ
                                                                                                          (தாழிசை)

கடல் மணல் நெடுமலை படரொலி விரிவெளி
கதிரொளி நிகரவள் புகழ்!
சுடர்மிகுந் தொளிர்ந்தடித் தினிதுள வலிமிகு
வளம்பெறு நறுந்திரு மகள்!
கடன்பணி பெருந்திறன் உளவளம் திடமனம்
விளைநில மவளதன் பொருள்!
நடம்புரி பவளென விழிகளில் விழுமவள்
திடலினற் சுழன்றொளிர் நிழல்!
                                                                                           (வண்ணகம்)

அடைந்தனர் பெருமை அளவிலாது பெற்றோர்
அடைந்தனர் அவளை மகளென வரமாய்
அவையத்து முந்தச் செய்தனரவர் நோற்றதென்ன
தவமெனவுல குவியப்பத் தந்தனள் மகள்  
                                                                                               (பேரெண்)

திறமையின் பிறப்பிடமாய்த் திகழ்கின்றவள் சாய்னாவே!
அமைதியி னிருப்பிடமாய் யமைந்தவளும் சாய்னாவே!
களத்தினில் கடுமையைக் காட்டுபவள் சாய்னாவே!
உறுதியி னுண்மை யுருவமும் சாய்னாவே!
                                                                                              (அளவெண்)

தூள்கிளப்பத் தினவெடுக்குந் தோள்
      துல்லியமாய்க் கணித்தெடுக்குங் கண்
வாள்சுழற்றும் வடிவத்துக் கை
      வரலாறு படைத்துவரு முளம்
நாள்கணக்கில் பயிற்சிபெறும் மெய்
      நாற்றிசையும் தரைபறக்குங் கால்.
கோள் பலவும் பறக்குமவள் கொடி
     கொட்டும்புக ழவளதுகா லடி
                                                                                        (இடையெண்)

                          திறனு மவள்
                                              தீரமவள்
                                                            திடனுமவள்
                          அறமு மவள்
                                              அருமை யவள்
                                                            அமைதி யவள்
                          செறிவு மவள்
                                              சீர்மையவள்
                                                            சிறப்பு மவள்
                         அறிவு மவள்
                                             ஆழ மவள்
                                                           ஆழியவள்
                                                                                          (சிற்றெண்)

     எனவே
                                                                                          (விட்டிசை)


சாய்னா நேவால் சாதித் தேமெய்
ஓய்ந்தா லும்புகழ் ஒழியா தென்று
கூறுவன் பெருமை யோடு
வேறுக ருத்தின் றியே!                                        (சுரிதகம்).


ஒரு தரவு , மூன்று தாழிசைகள், விட்டிசை, போக்கியல் என்பன வந்து முறையே பொருந்தி நிற்கும் நேரிசை யொத்தாழிசைக் கலிப்பாவே, நீரின் திரை போலும் முறை பொருந்தி வருகின்ற அளவடியாக நாற்சீரடி, நாற்சிரோரடி, முச்சீரடி . ஒருசீரடி (பேரெண்,அளவெண், இடையெண்,சிற்றெண்) யென்னும் அம்போதரங்கம் நடுவே மடுக்கப்படுமாயினஃது அம்போதரங்க வொத்தாழிசைக்   கலிப்பாவாகும்.அம்போதரங்க உறுப்பின் முன்னே வண்ணகம் என்னும் முடுகியல் வரப்பெற்ற மற்றைய தரவு, தாழிசை, கூன் அடக்கியல் என்னுமுறுப்புகளுமுளதாகப் பெறுமாயினது வண்ணக வொத்தாழிசைக் கலிப்பாவாகும்.






மேலும் படிக்க இங்கே சொடுக்கவும்!

8/18/12

6

யாப்பருங்கலக்காரிகை - அவையடக்கம்

|


                                       அவையடக்கம்
சுருக்கமில் கேள்வித் துகள்தீர் புலவர் முன் யான் மொழிந்த‌
பருப்பொருள் தானும் விழுப்பொரு ளாம்பனி மாலிமயப்
பொருப்பகஞ் சேர்ந்தபொல் லாக்கருங் காக்கையும் பொன்னிறமாய்
இருக்குமென் றிவ்வா றுரைக்குமன் றோவிவ் விருநிலமே!

       அவையடக்கத்தை முன்னர்க் கண்டோம். இப்பாடலில் மீண்டும் அவையடக்கத்தை
வெளிப்படுத்துகிறார் ஆசிரியர்.
                                     பதவுரை
சுருக்கமில் -    அளவிலா
கேள்வி -    கேள்வியறிவு
துகள் -    குற்றம்
மொழிந்த -    கூறிய‌
பருப்பொருள் -    (சிறப்பற்ற) பிண்டப்பொருள்
விழுப்பொருள் -   சிறந்த பொருள்
மால் -    பெரிய‌
பொருப்பகம் -   மலை
இருநிலம் -   உலகம்
                                                 தெளிவுரை
   அளவிலாத கேள்வியறிவினையுடைய குற்றமற்ற புலவர்களின் முன்
நான் கூறிய இச்சிறப்பில்லாத பாடு பொருளும் பனிபடர்ந்த பெரிய இமயமலையை
அடைந்த இழிவான கரிய காக்கையும் பொன்னிறமாய்த் தெரிவது போல சிறந்த‌
நுண்பொருளாக இந்த உலகம் உரைக்கு மல்லவா.

                                                  கருத்துரை
 கரிய இழிவான காக்கையும் இமயமலையை அடைந்து பொன்னிறமாய்
ஒளிர்வது போல மதிநிறைந்த புலவர்கள் முன் எனது நூலும் சிறப்பாகி விடுகிறது.
என்று ஆசிரியர் அவையடக்கத்துடன் கூறுகிறார்.     
மேலும் படிக்க இங்கே சொடுக்கவும்!

8/11/12

6

இரவின் பாடல்-நள்ளிரவில் எழுதுகிறேன்

|
இரவின் பாடல்

வழிந்தோடும் இருளில்
வாய்த்த வலிகளற்ற
சஞ்சாரம்
நீண்டு கொண்டே செல்கிறது.
திசை நிரப்பும் கருமை
மெலிதான குரலில்
இரவின் தீரா வேட்கையை
முணுமுணுத்துக் கொண்டேயிருக்கிறது.
ஏதோ ஒன்றைச் சொல்ல
எந்நேரமும்
இரவு முயன்றுகொண்டே இருக்கிறது.
இன்றுவரை
அஃது என்னவென்று
சொல்லிவிட்டதா இல்லையா
என்பது மட்டும் புரியவே இல்லை.

இந்த இரவுதான் போகுதே போகுதே இழுத்துக் கட்ட கயிறு கொண்டு வா நண்பனே நண்பனே என்ற திரைப்பாடலினை  அண்மையில் கேட்டேன்.வசீகரிக்கும் வரிகளும், மயக்கும் இசையும் வழிந்தோடும் அப்பாடலினை மீண்டும் கேட்கத் தோன்றியது. காணொளியுடன் பார்த்த போது இரவின் மீதான காதல் எல்லாருக்கும் ஒருவிதத்தில் எப்பொழுதும் அல்லது எப்பொழுதாவது பீறிட்டுக் கொண்டுதான் இருக்கிறது எனத் தோன்றியது.பொய்யான வாழ்வில் மெய்யான இன்பந்தரும் மது போதையோ (பாடல் வரிகள்), இலக்கிய இன்பமோ,வாசித்தலின் சுகானுபவமோ, கூடிக்களித்தலின் பேரின்பமோ எதுவோ ஒன்று இரவின் நிறத்தை மாற்றிக் கொண்டேதான் இருக்கிறது.
இரவானது நள்ளிரவாகப் பரிணமிக்கும்போது அதன் நிறமும் அடர்த்தியும் மாறத் தொடங்கி விடுகிறது.பகல்பொழுது இரவையும், இரவு பகலையும் துரத்திப் பிடித்து விளையாடுவது போலத் தோன்றுகிறது.இரவில்லா உலகம் அழகை இழந்துவெறுமையாக்த்தான் இருக்கும்.இரவு , உலகையும் , வாழ்க்கையையும் பொருள் நிரம்பியதாக்குகிறது.சலனமற்ற மனது பெரும்பாலும் இரவில்தான் சாத்தியப் படுகிறது.பகலின் எச்சங்களும் மிச்சங்களும்விழித்திருப்பவனின் நள்ளிரவுகளில் வெவ்வேறு வடிவங்களில் மறுபிறப்பெடுக்கின்றன.பெய்யும் இருளைக் கிழித்து ஊடாட எப்போதும் நம்மிடம் ஓர் ஏக்கமோ, கவலையோ, பகல்பொழுதின் பெருமகிழ்ச்சியோ இருந்து கொண்டேதான் இருக்கிறது. விழித்திருப்பவனின் இரவு . இரவின் ருசி, தேசாந்திரி ...இவற்றையெல்லாம் படித்துப் பாருங்கள்.
சித்தார்த்தன் பார்த்த அதே நிலவைத்தான் தானும் பார்த்ததாக எஸ்.ராமகிருஷ்ணன் குறிப்பிடுகிறார்.இரவைச் சுவைத்துப் பருகுபவர்க்கே அவ்வுணர்வு வாய்க்கும்.ஒரு தூக்குக் கைதியின் கடைசி இரவை வைரமுத்து வர்ணிப்பார்.வேர்கள்  நீர்குடிக்கும் ஒலியும் , நிலவு வளரும் ஒலியும் எல்லார் செவியிலும் விழாது.
இரவு நமக்காக எத்தனையோ வைத்திருக்கிறது.அது நமக்காகப் பகல் முழுதும் காத்துக்கொண்டிருக்கிறது.நோயுற்றவனுக்கு அச்சத்தைத் தருகிறது.நோயாளியின் இரவு நீளமாக இருக்கிறது.முதிர்கன்னியின் இரவில் அனல் தகிக்கிறது.வேலையில்லாதவனின் இரவு விரக்தியைத் தரிக்கிரது.பயணம் செபவனின் இரவும் , மாணவர்களின் இரவும் மிகக்குறுகியதாக இருக்கிறது.காதலிப்பவனின் இரவு அவஸ்தையாகக் கழிகிறது.கவிஞனின் இரவு வண்ணக்காடாய் ஜொலிக்கிறது.


இரவின் குரல் இனிமையானது. அதன் வரிகள் நுட்பமானவை.இரவின் இசை மனதின் இடுக்குகளில் எல்லாம் காற்றைப் போல நிரம்புகிறது.இரவின் விரலைப் பிடித்துக் கொண்டு நெடுந்தொலைவு நடக்கும் வாய்ப்பு நம் எல்லாருக்கும் வாய்ப்பதில்லை.இத்தனைக்கும்
காற்றைப் போல , நீரைப்போல இயற்கையின் தீராத உற்பத்திப் பொருள் அது. நாள்தவறாமல் இரவு நம்மைக் கடந்து செல்கிறது.
என்னை அதிரவைத்த சேரனின் குறுங்கவிதை ஒன்று நினைவுக்கு வருகிறது.படித்து முடித்து நெடுநேரமாகியும் அந்தப் பாதிப்பிலிருந்தும் அதிர்ச்சியிலிருந்தும் மீளவே இல்லை.எனது மொத்த வாசிப்பு அனுபவத்திலும் என்னைப் புரட்டிப்போட்ட கவிதை அது.

        யமன்
காற்ரு வீசவும்
அஞ்சும் ஓர் இரவில்
நட்சத்திரங்களுக்கு இடையே
இருக்கிற
அமைதியின் அர்த்தம்
என்னவென்று
நான் திகைத்த ஒரு கணம்
கதவருகே யாருடைய நிழல் அது....?

இரவைப் பருகுங்கள்..இரவைச் சுவாசியுங்கள்..இரவிலும் வாழுங்கள்...!



மேலும் படிக்க இங்கே சொடுக்கவும்!

8/8/12

6

அட ... நாமளும் ஃபேமசாயிட்டோம்.....

|
வாழ்க போட்டோபுனியா....

வாழ்க போட்டோபுனியா....

மேலும் படிக்க இங்கே சொடுக்கவும்!

3

கொல்லாதே...!

|

உனக்கு 
ஓட்டுநர் உரிமம்
யார் கொடுத்தது?
ஸ்கூட்டி பெப்பில் வந்து
மோதாமலேயே
தினமும்
ஓராயிரம் பேரையாவது கொல்கிறாய்....!
மேலும் படிக்க இங்கே சொடுக்கவும்!

8/5/12

3

தூய தமிழ்ச்சொற்கள்,

|

மரியாதை - கண்ணியம், மாண்பு,மதிப்பு,மாட்சி
மவுனம் - அமைதி
மனோகரம் - அழகு,எழில்
மனோபாவம் - மனநிலை
மாதம் - திங்கள்
மனுஷன் - மனிதன், மாந்தன்
மேலும் படிக்க இங்கே சொடுக்கவும்!

8/4/12

7

விண்மீன்களை என்ன செய்தாய்...?

|






எனது தூக்கத்தைத்தான்
பறித்து விட்டாய்..!
இந்த விண்மீன்களை 
என்ன செய்தாய்...
இரவு முழுக்கத் தூங்காமல்
முணுமுணுத்துக் கொண்டே இருக்கின்றன...!












































மேலும் படிக்க இங்கே சொடுக்கவும்!

8/3/12

2

யாப்பருங்கலக்காரிகை -பாயிரம்- உரை

|
                                                         பாயிரம்
                                                அவையடக்கம்
தேனார் கமழ்தொங்கல் மீனவன் கேட்பத் தெண்ணீரருவிக்
கானார் மலயத் தருந்தவன் சொன்னகன் னித்தமிழ்நூல்
யானா நடாத்துகின் றேனென் றெனக்கே நகைதருமால்
ஆனா வறிவின வர்கட்கென் னாங்கொலெ னாதரவே!
                                                                                  யாப்பருங்கலக் காரிகை‍‍‍‍‍‍ - 2.


"ஆயிர முகத்தா னகன்ற தாயினும்
பாயிரமல்லது பனுவலன்றே" என்று சொல்வர். காரிகையாசிரியரும் இதில் தவறாது பாயிரத்துடன் தொடங்குகிறார்.
                      அக்காலத்தில் நூலாசிரியர் தனது நூலினைக் கற்றோர் அவையில் அரங்கேற்ற‌ வேண்டும். அவையோரது ஐயங்களை அகற்றிய பின்னரே நூலானது அரங்கேறும். எனவே நூலின் அருமையையும், நூற்பொருளின் தன்மைகளையும் முதலில் அவையோரிடத்து அறிவித்துத் தனது எளிமையையும் நூலாசிரியர் புலப்படுத்துவது வழக்கம்.
                   ஆன்றோர் நிறைந்த அவையில் தனது அடக்கத்தைக் கூறிவிடுவதாலும்  இதனால் அவையோர் மிகைபடக் கேளாது மென்மையாக அடக்கப்பட்டு விடுவதாலும் இஃது அவையடக்கமாயிற்று.
            இப்பாடலில் நூலாசிரியர் தனது அடக்கத்தை உரைப்பது காண்போம்
                                                            பதவுரை
தேனார் ‍          -  தேன் பொருந்திய‌
தொங்கல்      - மாலை
மீனவன்         - மீனக் கொடியுடைய பாண்டியன்
கேட்ப             - கேட்க, கேட்கும்பொழுது
தெண்ணீர்     - தெளிந்த நீர்
கான்                - சோலை
அருந்தவன்  - அரிய தவ முனிவனாகிய அகத்தியன்
நகை                - சிரிப்பு
யானா             -  நானா
ஆனா              - குறையாத‌
கொல்             - அசைச் சொல்
ஆதரவு           - துணிவு.
                                                 தெளிவுரை
             தேன் ஆர் கமழ்தொங்கல் மீனவன் கேட்ப -தேன் பொருந்திய மணங்கமழும் வேப்ப மாலையைச் சூடிய பாண்டிய மன்னன் கேட்க,
            தெண்ணீர் அறுவிக் கானார் மலயத்து அருந்தவன் சொன்ன‌-  தெளிந்த நீரையுடைய அருவி சூழ்ந்த சந்தனக்காடுடைய பொதிய மலையில் அரிய
தவமேற்கொண்ட அகத்தியன் கூறிய 
கன்னித் தமிழ் நூல். -
அழிவற்ற இளமையான தமிழின் யாப்பிலக்கண நூலினை 
யானா நடாத்துகின்றேன் என்று எனக்கே நகை தருமால்- சிறியவனாகிய நானா எழுதுகிறேன் என்று எண்ணும் போது எனக்கே சிரிப்பு மேலிடுகிறது.
            ஆனா அறிவினவர்கட்கு என்னாங்கொல் என் ஆதரவே -அப்படியிருக்க குறையாத அறிவு மிகுந்த ஆன்றோரிடத்து எனது இந்தத் துணிவு என்ன ஆகுமோ, நான் அறியேன்!
                                                              கருத்துரை
            தான் எழுதிய இந்நூலை அறிஞர் பெருமக்கள் என்ன சொல்வார்களோ என அவையடக்கத்துடன் நூலாசியர் இப்பாடலில் கூறுகிறார்.
          பொதிய மலை என்பது இன்றைய நெல்லை மாவட்டக் குற்றாலச் சாரலாம்.
 மூவேந்தர்க்கும் மாலையும், கொடியும் உண்டு.
 பாண்டியன்  - வேப்ப மாலை, மீன் கொடி.
 சேரன்             - ஆத்தி, விற் கொடி.
 சோழன்          - பனம்பூ, புலிக்கொடி.
 கொல் என்பது அசைச் சொல் ஆகும்.
  அணங்கு கொல் ஆய் மயில் கொல்லோ என்பது குறள்.
    காரிகை யாவும் ஏகாரத்துடனே முடியுமாதலின் ஆதரவே என்றதுடன் இழிவு சிறப்பையும் நிறுத்துகிறது.   




                             

மேலும் படிக்க இங்கே சொடுக்கவும்!

0

கவிஞர்களே வாருங்கள்.. கவிதை எழுதுவோம்

|

முகடு தவழும்
முகில் பொதிகள்;
புழுதி களையும்
மழைத் துளிகள்;
மனது கழுவும்
மதியின் ஒளிகள்;
கனவில் சிரிக்கும் 
கன்னி வெடிகள்;
மிழற்றிப் பிதற்றும்
மழலை மொழிகள்;
அலர்ந்து கவரும்
அழகு மலர்கள்;
ஈர்த்துக் கொல்லும் 
இரண்டு விழிகள்;


கவிதையைத் தொடர்ந்து எழுதி முழுமையாக்குங்கள்...
மேலும் படிக்க இங்கே சொடுக்கவும்!

3

தூய தமிழ்ச்சொற்கள்

|

பரிகாரம் - மாற்று, திருத்துதல், சரிசெய்தல்
பரிகாசம் -எள்ளி நகைத்தல்
சுங்கம் - வரி , இறை
சுந்தரம் - அழகு , பொலிவு
கறார் - உறுதி
மேலும் படிக்க இங்கே சொடுக்கவும்!

7/29/12

6

இன்னும் என்ன செய்வாய்?

|



எனக்கான 
உன் பார்வையில்
எனக்காக 
எதையோ வைத்திருக்கிறாய்
என்ற கற்பனையே
எவ்வளவு சுகமாக இருக்கிறது..?




நான் நாற்காலியில் 
அமர்ந்திருந்தேன்;
எதிரில் நீ நின்று கொண்டிருந்தாய்!
என் காதல் 
உன் தலைக்குப் பின்னால் 
ஒளிவட்டம் அமைத்திருந்தது!
மேலும் படிக்க இங்கே சொடுக்கவும்!

7/25/12

2

தமிழைப் போற்றும் SDM பள்ளி

|
பள்ளி ,  கல்லூரிகள் கூடத் தமிழைப் புறக்கணிக்கும் பரிதாப நிலை இது
"வேக கட்டுபாட்டு கருவி பொருத்தப்பட்டுள்ளது"  எனபதுதான் கல்வி நிறுவனங்களின் வாகனங்கள் அனைத்திலும் காணப்படும் செய்தியாகும். அண்மையில் கோவை மாவட்டம் தாசநாயக்கன்பாளையத்திலுள்ள   பள்ளி வாகனத்தின் பின்னால் கண்ட சொற்றொடர் வியப்பூட்டும் வகையில் "வேகக் கட்டுப்பாட்டுக் கருவி பொருத்தப்பட்டுள்ளது" என்று தூய தமிழில் என்றிருந்தது.  நான் இதுவரை பார்க்காத ஒரு நிகழ்விது ..  அப்பள்ளியை மனமார வாழ்த்துகிறேன்
மேலும் படிக்க இங்கே சொடுக்கவும்!

8

தமிழ் வலைப்பதிவர்களுக்காக ஒரு பதிவு

|

வலிமிகுமிடங்கள்
நான்காம் வேற்றுமை விரியில் வல்லினங்களான க்,ச்,த்,ப் ஆகியன மிகுந்து வரும்.


சான்று:


அவனுக்கு + கொடுத்தான் + அவனுக்குக் கொடுத்தான்
வேலிக்கு + கம்பி = வேலிக்குக் கம்பி
வயலுக்கு + பயிர் = வயலுக்குப் பயிர்


வினாச்சொற்களை அடுத்து:


எ+பக்கம் = எப்பக்கம்
எப்படி + பேசினான் = எப்படிப் பேசினான்
எந்த + படம்= எந்தப் படம்



சுட்டுச் சொல்:


அ+காளை =அக்காளை
அந்த + படம் =அந்தப்படம்
இ+ சிலை =இச்சிலை
இந்த +கல் =இந்தக்கல்


தூய தமிழில் பதிவிடுவோம்.                                          (தொடரும்..)

மேலும் படிக்க இங்கே சொடுக்கவும்!

7/21/12

5

ஆயிரம் பட்டாம் பூச்சிகள்

|

இரண்டு கண்களையும் மூடியபடி
என்ன சிந்தித்தாய் 
என்று தெரியவிலை!
ஆனால் அந்த ஓவியத்தைத்தான்
எனது கண்களுக்குள்
ஸ்க்ரீன் சேவராக வைத்திருக்கிறேன்.
நான் கண்களை மூடும்போதெல்லாம்
நீ 
விழித்திரையில் 
விரிந்து நிற்பதற்காக!!



பட்டாம்பூச்சி ஒன்று
உன்னைக்கடந்து செல்வதைப்
பார்த்துப் படபடத்தன உனது இமைகள்!
உனது இமைகள் 
படபடப்பதைப் 
பார்த்து
ஆயிரம் பட்டாம் பூச்சிகள் 
என் வயிற்றுக்குள் 
படபடக்கின்றன!

மேலும் படிக்க இங்கே சொடுக்கவும்!

7/20/12

7

தின்று துய்த்துப் பிறருக்கும் கொடு

|

"ஆண்டாண்டு தோறும் அழுது புலம்பினாலும்
மாண்டார் வருவரோ மாநிலத்தீர் - வேண்டா
நமக்கும் அதுவழியே நாம்போம் அளவும்
எமக்கென்னென் றிட்டுண் டிரும்"

நெருநல் உளஒருவன் இன்றில்லை யென்னும்
பெருமை உடைத்திவ் வுலகு
என்றார் வள்ளுவர்.சாவே நிகழா வீட்டில் கடுகு வாங்கி வரச்சொன்னார் புத்தர். மரணத்தைத் தடுப்பவனும் ஒத்திபோடுபவனும் எங்குண்டு? நம் எல்லாருக்கும் அதுவேதான் வழி. ஆகவே மானிடா நமக்கும் சனியன் சாவு வரும் வரைக்கும் நமக்குண்டானதைத் தின்று துய்த்துப் பிறருக்கும் கொடுத்து வாழப் பழகு என்று கூறுகிறார் ஔவையார்.

மேலும் படிக்க இங்கே சொடுக்கவும்!

தமிழறிவோம்

|


மிருகம்  -விலங்கு


தசம்-பத்து 


பட்சி-பறவை, புள்


தர்ணா-முற்றுகை


விபரம்-விளக்கம்


வாபஸ்-திரும்பப் பெறுதல்



மேலும் படிக்க இங்கே சொடுக்கவும்!

7/19/12

4

"சைட் " ஒரு சமூகப் பார்வை

|

இளையோர் முதியோர், ஆண் , பெண் என வேறுபாடில்லாமல்"சைட்" என்பது இன்றைய தலைமுறையில் தவிர்க்க முடியாததாகிவிட்டது.பண்டைக்காலத்திலிருந்து நிலவி வரும் பழக்கந்தான் என்றாலும்மாறிவரும் சூழலுக்கேற்ப இதுவும் மாற்றம் பெற்று வருகிறது.மனித மனத்தின் ஆழத்தில் இது  உறைந்து கிடக்கிறது.மூன்றாசைகளுள் ஒன்றாக இதைக் குறிப்பிடுவது முற்றிலும் பொருத்தமானது.வாய்ப்புக் கிடைக்கும் போதெல்லாம் நாம் முதலில் செய்வது இதைத்தான்.சிலர் மற்வர்களுக்குத் தெரிந்து செய்கிறார்கள், சிலர் தெரியாமல் செய்கிறார்கள்.


ஆணாயிருந்தாலும் பெண்ணாயிருந்தாலும் இதில் மட்டும் யாருமே சலிப்பது இல்லை. போதுமென்ற மனமும் யாருக்கும் இல்லை. சைட்டில் கிடைக்கும் பேரானந்தத்திற்கு மனிதன் எப்போதுமே அடிமை. பேருந்துப் பயணங்ள் ,நடை பயிற்சி, வெளியூர் என எங்கும் நாம் இதை விடுவதேஇல்லை. பார்த்து மகிழ்ந்த பின்தான் நமக்கு மன நிறைவு.சில பொழுதுகளில்" சே.... மாப்ள... இது மட்டும் எனக்குக் கிடைச்சா.. வாழ்க்கையே சொர்க்கந்தாண்டா.. " என்று அங்கலாய்ப்பதும் உண்டு.சைட்டுகளி ல் பலவகை உண்டு.சிறியது, பெரியது, வளைவு , நெளிவுகளுடனான் அமைப்பு. இடை குறுகியது என.சில இடங்களில் பார்த்த உடனே "ரேட்" பேசுமளவு சென்று விடுபவர்களும் உண்டு.


ஆனால் இதில் சில கொடுமைகளும் உண்டு. விளை நிலங்களை எல்லாம் இன்று சைட் பிரித்துவிற்பதுதான் கவலை தருவதாக உள்ளது . இந்நிலை மாற வேன்டும்.
பி.கு: 
காய்ந்த மண்டைகளைக் குளிர்விக்க ஒரு டிப்ஸ்: நீங்கள் கிழக்குப் பார்த்து சாலையில் நின்று கொண்டிருக்கிறீர்கள் என்று வைத்துக்கொள்வோம்.உங்களின் வலப்பக்கத்திலிருந்து , அதாவது தெற்கிலிருந்து ஒன்று அல்லது ஒன்றுக்கும் மேற்பட்ட  ஃபிகர்கள் வடக்கு நோக்கி வருவதைப் பார்த்து விடுகிறீர்கள்.உடனே வாயிலிருந்து ஜொள் எனப்படும் ஆனந்த திரவம் ஒழுகி வழிய வாய்பிளந்து பார்க்காமல் வேறெங்காவது பாருங்கள்!அந்த அழகுக் குழு உங்களைக் கடந்து இடப்பக்மாகச் சென்றவுடன் ( அதாவது வடதிசை )பார்த்துப் பேரின்பம் ( அல்ப சந்தோஷம் ) உய்யுங்கள்!
பி.கு. பி.கு : ( பின்குறிப்புக்கொரு பின் குறிப்பு)
இது போன்றதொரு பேரின்பச் சூழலில் மேற்குத் திசையிலும் சற்றுக் கவனமிருக்கட்டும். முதுகு பத்திரம்
பி.கு. பி.கு.  பி.கு :
அடச்சே .... !
கடைசியில் இடுகையை விடப் பி.கு.க்கள் பெரிதாக அமைந்து தொலைந்து விட்டன.

மேலும் படிக்க இங்கே சொடுக்கவும்!

7/15/12

3

உள்ளே வாருங்கள்! இந்தப் பதிவு உங்களுக்குத்தான் !!

|
சந்திப்பிழை சகித்து வாழும் தலைமுறை தாண்டி, சந்திப்பிழை மறந்து வாழும் தலைமுறையும் தாண்டி, சந்திப்பிழை அறியாமல் வாழும் தலைமுறையும் தாண்டி சந்திப்பிழை இருந்தால் என்ன குடியா முழுகி விடும் என்ற தலைமுறையினர் வாழும் காலகட்டத்தில் இருக்கிறோம்.
இடுப்பில் இலையுரி கட்டித் திரிந்தால் கூடத்தான் குடிமுழுகி விடாது, ஆனாலும் அழகியலைப் பார்ப்பது போலத்தான்.கூடுதலாக ஒரு ப், க், ச் அல்லது த் என்ற ஒன்றினைச் சேர்த்து எழுதினால் என்ன எழவு துன்பம் நேர்ந்து விடும்...?
"வாங்கி சென்றார் " என்பதை " வாங்கிச் சென்றார்" என்று எழுதித் தொலைப்போம் என்று சொன்னால் இளக்காரமாகப் பார்க்கும்  அரைவேக்காட்டுக் கூட்டம் பெருகிவிட்டது. எங்கெல்லாம் இரண்டு சொற்களுக்கு இடையில் வல்லினம் மிக வேண்டும்  என்று தெரிந்து கொள்ளுங்கள்!


இரண்டாம் வேற்றுமை விரி:


'"ஐ" என்ற  உருபு நிலைமொழிலியிலிருக்க வல்லினம் மிகும்.
ஆட்டை + கட்டினான் =ஆட்டைக்கட்டினான்
வீட்டை  + கட்டினான் =வீட்டைக்கட்டினான்
வாயை + பொத்தினான் =வாயைப் பொத்தினான்
நாயை+ துரத்தினான் =நாயைத் துரத்தினான்
வேட்டியை + துவைத்தான் = வேட்டியைத்  துவைத்தான்
புல்லை + செதுக்கினான் = புல்லைச்செதுக்கினான் 
வாயை + திறந்தான் =வாயைத் திறந்தான் 
அவனை + தவிர்த்தான் = அவனைத் தவிர்த்தான் 
நீரை + குறைத்தான் = நீரைக்குறைத்தான் 

கல்லை + புரட்டினான் = கல்லைப் புரட்டினான்
எளிமையான பாடமிது.நினைவில் இருத்திக்கொள்ளலாம். இதனை நினைவில் கொள்வதாலோ பயன்படுத்துவதாலோ  தீங்கொன்றும் நேராது என உறுதியாய்ச் சொல்வேன்.
இதுபோல எளிமையான வழிகள் இன்னும் நிறைய உள்ளன. தொடர்ந்து பயிலுவோம்;தொடர்ந்து முயலுவோம்.
நன்றி!
                                                                                                          தொடரும்....

மேலும் படிக்க இங்கே சொடுக்கவும்!

7/14/12

3

சைட் அடி

|

புகைபிடி புற்றுநோய் வரட்டும்!
மதுவைக்குடி மரணம் நெருங்கட்டும்
SMS  அனுப்பு பேலன்ஸ் தீரட்டும்
சைட் அடி  சுளுக்கு எடுக்கட்டும்
எச்சில் துப்பு வழுக்கிவிழட்டும்

பாத்ரூம் போ நிம்மதி கிடைக்கட்டும்
ஈவ்டீசிங் செய் இடுப்பை ஒடிக்கட்டும்
சீரியல்பார் சிந்தை செழிக்கட்டும்
வெட்டியாய்ப் பேசு வெற்றி தொலையட்டும்
புறங்கூறு புகழ் மறையட்டும்
ஊழல் செய் உலகு தூற்றட்டும்
வாயைத் திற வாந்தி வரட்டும்
மூக்கை நோண்டு       முகம் சுளிக்கட்டும்    
காது குடை கதறி அழட்டும்!


மேலும் படிக்க இங்கே சொடுக்கவும்!

7/10/12

10

அட....!

|




இத்தனை நாட்களாகத்
 துடித்துக் கொண்டிருந்த இதயம்
 நீ உள்ளே வந்த பின்பு
 துள்ளிக் 
குதித்துக் கொண்டிருக்கிறது !

















மேலும் படிக்க இங்கே சொடுக்கவும்!

7/7/12

2

ஏது செய்வீர் தமிழர்காள்?

|
கோயம்புத்தூர் மாவட்டத்தில் பாதியும் திருப்பூர் மாவட்டத்தில்  பாதியுமாக விரவிக்கிடக்கும் ஊரது.திருப்பூரைப் பொள்ளாச்சி வழியாகக் கேரளாவுடன் இணைக்கும் நெடுஞ்சாலையில் , தென்னைமரங்களும், கோழிப்பண்ணைகளும், விசைத்தறிகளும் சூழ அமைந்திருக்கும் அவ்வூரின் பெயர் பதின்மூன்றரை எழுத்துகளால் ஆனது.

காமநாயக்கன்பாளையம் என்பதை எவ்வாறு வாசிப்பீர்கள்?  கமநைக்கன்பலயாம் என்று யாரும் வாசித்தால்  பல்லிலோ நாக்கிலோ  எதுவும் சுளுக்கு என்றுதானே  நினைக்கத் தோன்றும்?

உலகப்பொதுமொழியாம் ஆங்கிலத்தின் அழகையும் வள‌மையையும் பயன்பாட்டு நன்மைகளையும் உணராமலும் , உணர்த்தாமலும் வலுக்கட்டாயமாக மொழியைத் திணிக்கும் கல்விக்கூடங்களுள் ஒன்றில் ஆங்கிலப் பேச்சுப் பயிற்சி வகுப்பொன்றில்  காமநாய்க்கன்பாளையம் என்று ஒலித்ததைத் திருத்திக் கமாநைக்கன்பலயாம் என்று ஸ்டைலாகச் சொல்லிக்கொடுத்த கொடுமையை அண்மையில் கேட்டறிந்தேன்.பெயர்ச்சொற்களை (இடம்,பெயர்....) எம்மொழியிலும்  இயல்பு மாறாமல்தான் ஒலிக்க வேண்டும் என்ற அடிப்படை கூடத் தெரியாததுகளிடம் இன்ரைய கல்வி சிக்கிக் கொண்டுள்ளதே என்று வெதும்புகிறது மனம்.நேசமணி பொன்னையாவை நாசமாநீ போனியா என்று வாசித்த  திரைக்காட்சி நினைவுக்கு வருகிறது.உலகத் தாய்மொழி தமிழே என்று நிறுவும் "சொற்பிறப்பியல் " என்ற நூலைப் படித்ததுப் பாருங்கள்.எவ்வளவு முரண் பட்ட நிலையில் நாமிருக்கிறோம் என்று தெரியும்.சுஜாதா ஒருமுறை சொன்னா" தனது பெயரை இந்திய ஊடகங்கள் ஒலிப்பதை மலேசியப் பிரதமர் ஒருமுறை கேட்டால் முதலீடுகளை நிறுத்தி விடுவார் " என்று .க.சீ.சிவகுமார் இலவச மின்சாரத்தைப் பற்றிய கட்டுரை ஒன்றில் குறிப்பிடுவது போல கடுமையான வட்டார அறிவு இல்லாதவர்கள்  அவ்வாறு சொன்னாலும் ஏற்கலாம். அந்தப்பகுதியிலேயே இருந்து கொண்டு இவ்வாறு ஒலிப்பது பெருங்கூத்து.. இன்னும் எத்தனை ஊர்கள் காத்திருக்கின்றன‌வோ?
மேலும் படிக்க இங்கே சொடுக்கவும்!

3

தூய தமிழ்ச்சொற்கள்

|

சூட்சுமம் - உள்நோக்கம்
நிர்மாணம் - கட்டுதல் , எழுப்புதல் , அமைத்தல்
கௌரவம் -   பெருமிதம் , உயர்ந்த
மாருதம் - காற்று, வளி
ரூபம் -    வடிவம் , உருவம்
கல்தா - வெளியேற்று, தள்ளு
மேலும் படிக்க இங்கே சொடுக்கவும்!

7/6/12

7

மின்னித் தீர்க்கிறது

|


மலர் விரிகிறது
     துயிலெழுகிறாய்
மணம் பரவுகிறது
     முகம் கழுவுகிறாய்?
பனி மறைகிறது
    து கில் திருத்துகிறாய்
கதிர் எழுகிறது
     கண்ணாடி பார்க்கிறாய்
குளிர் வழிகிறது
     குளித்து முடிக்கிறாய்
ஒளி தெறிக்கிறது
     ஒப்பனை செய்கிறாய்
குயில் இசைக்கிறது - யாருக்கோ 
     குட்மார்னிங் சொல்கிறாய்!


முகில் நகர்கிறது
    உடை உடுத்துகிறாய்
இலை உதிர்கிறது
    நகம் நறுக்குகிறாய் 
மரம் அசைகிறது
    நடை பயில்கிறாய்
தென்றல் தவழ்கிறது
    கூந்தல் உலர்த்துகிறாய்
மழை பெய்கிறது
    நகை புரிகிறாய்
இடி இடிக்கிறது
    இமை திறக்கிறாய்
மின்னித் தீர்க்கிறது
    விழி சுழற்றுகிறாய்
நிலவு ஒளிர்கிறது 
    நெற்றி துடைக்கிறாய்
மலை தெரிகிறது
    பெருமூச்செறிகிறாய்
உயிர் துடிக்கிறது
   எதிரில் வருகிறாய்









மேலும் படிக்க இங்கே சொடுக்கவும்!

5

நின்னொடு மூவரானோம்...!

|


"அவர்களில் மூன்று பேர் நேற்றே வந்தவர்கள்..."

மேற்காண் தொடரில்  மூன்று பேர் என்பதினும் மூவர் என்று கூறல் தமிழுக்குப் பொருத்தமானது. அழகானதும் கூட,  முத்தமிழ், நாற்றிசை, ஐம்பெருங்காப்பியங்கள், அறுசுவை, ... என்பன போன்றவற்றைப் பாருங்கள். முத்தமிழ் எனும்போது கிடைக்கும் இன்பம் மூன்று தமிழ் எனும் போது கிடைப்பதில்லை. இருவர் , மூவர் ,நால்வர், ஐவர், அறுவர், எழுவர் , எண்மர், என்பனவற்றைப் பயன்படுத்துவோம்.  யாருக்கும் புரியாமற் போகாது. 
மேலும் படிக்க இங்கே சொடுக்கவும்!

2

அடப்போங்கப்பா....!

|

நீண்ட நாட்களுக்குப் பிறகு  நண்பரின் நண்பர் ஒருவரக் கோவையில் சந்திக்க நேரிட்டது.அவரது  தற்பொழுதௌய வசிப்பிடம் எதுவெனக்க் கேட்டேன். "வெல்லூர் " என்றார். கோயம்புத்தூரிலிருந்து மாறுதலாகிச் சென்றவர்திருமணமொன்றில் கலந்தொ கொள்வதற்காகக் கோவை வந்திருக்கிறாராம். ." வெல்லூரில்" தண்ணீரோ , உணவோ, தட்பவெப்பமோ எதுவும் ஒத்துக்க் கொள்ளவில்லை எனப் புலம்ப வேறு செய்தார்.வெள்ளைகாரனுக்கு வேலூர் என்று சொல்ல வரவில்லை., "வெல்லூர்" என்றான்;டேஞ்சூர் என்றான்;டூட்டுகோரின் என்றான்;ட்ரிசி என்றான், ட்ரிவேன்ட்ரம்,கெல்டன்பெட், காலிகட்.....
அடப்போங்கப்பா....!
மேலும் படிக்க இங்கே சொடுக்கவும்!

7/4/12

3

அறுவாய்

|


































விண்மீன்கள் வேண்டுமானால்
கலங்கியிருக்கலாம்-
மதியையும் முகனையும் அறியாது,
நான் ஏன் குழம்புவேன்,
மாதர் முகத்து
அவிர்மதிக்குப் போல
மறுவில்லாப்போது!



மேலும் படிக்க இங்கே சொடுக்கவும்!

0

தூய தமிழ் அறிவோம்

|

சூரியன் - கதிர்,ஞாயிறு
சந்திரன் - திங்கள் , நிலா, மதி
ஆகிருதி - உடல்
பூஜை - வழிபாடு
திவ்யம் - முழுமை, நிறைவு
கவி - பா, பாடல், பனுவல், புலவர்
நிர்மாணம் - கட்டுதல்


பிழையிருப்பின் சுட்டுக.
மேலும் படிக்க இங்கே சொடுக்கவும்!

7/3/12

6

வந்து விடு!

|
வலக்கண்ணின் கீழோரம்
ஒளிரும் துளி மச்சத்தை விட
வேறென்ன 
ஒப்பனைப் பொருட்களை
உனக்காக இந்த 
விளம்பரக் கம்பெனிகள்
தயாரித்துவிட முடியும்?












இடைதீண்டும் போதும்,
ப்ளவுஸின்  கீழ்விளிம்பு 
வருடும்போதும்,
மேல்விளிம்பில் தவழும்போதும்,
நீண்டும் குறுகியும்
அகன்றும் அவ்வப்போது 
அளவில்
வேறுபட்டு வெட்டுப்பட்டும்
என்னை 
வதைப்பதில் மட்டும்
குறைவதேயில்லை உன் 
கூந்தல்!
மேலும் படிக்க இங்கே சொடுக்கவும்!

4/4/12

அத்வானி எப்போது ஊழல் செய்தார்?

|

அண்மையில் நாளிதழ் ஒன்றில் வாசித்த செய்தி.


அத்வானியின் ஊழலுக்கு எதிரான யாத்திரை என்று தொடங்கியது அச் செய்தி. அத்வானி எப்பொழுது எந்தவகையான ஊழல் செய்தாரென்று குழம்பிய நொடியில்செய்தி புரிந்தது.
"ஊழலுக்கு எதிரான, அத்வானியின் பயணம் "
என்று வந்திருக்க வேண்டிய செய்தி எவ்வளவு குழப்பத்தை ஏற்படுத்தி விட்டது என்று தெளிவேற்பட்டது.
மேலும் படிக்க இங்கே சொடுக்கவும்!

தூய தமிழ்ச்சொற்கள்

|
பிராந்தியம் - வட்டாரம், பகுதி
டம்ளர் - குவளை
ஞாபகம் - நினைவு
ஞாபகசக்தி - நினைவாற்றல்
கலாச்சாரம் - பண்பாடு

 எனக்குத் தெரிந்தவற்றைத் தந்திருக்கிறேன். இவை குறித்த கருத்துக்களை எதிர்பார்க்கிறேன். ஒருவன் பிறரிடம் எவ்வாறு நடந்து கொள்கிறான் என்பதைப்பண்பாடு என்றும் அவன் எவ்வாறு இருக்கிறான் என்பதை நாகரிகம் என்றும் சொல்லலாம் என்று எங்கோ படித்திருக்கிறேன். நாகரிகத்துக்குத் தமிழ்ச்சொல் என்ன என்று தேடிக்கொண்டிருக்கிறேன்.
மேலும் படிக்க இங்கே சொடுக்கவும்!

உடன் வருபவர்கள்

மின்னஞ்சல் மூலம் பதிவுகளைப் பெறலாம்

இங்கே உங்கள் மின்னஞ்சல் முகவரியைப் பதியவும்:

Delivered by FeedBurner

கூகுள் குரோம் பிரௌஸரில் இந்த வலைப்பூ நன்கு விரியும்!

Copyright © 2010 செழுங்காரிகை

Template N2y Shadow By Nano Yulianto