செழுங்காரிகை

உன்னாலானவை

2011-12-09T23:51:00.000-08:00

ஓரக்கண்ணால்
ஒருநொடி பார்த்ததற்கே
உடைந்து போனேன்!
ஒருநிமிடம்
உற்றுப்பார்த்தால்
உருகிப்போவேனோ
உறைந்துபோவேனோ தெரியவில்லை!!

எல்லாப்பொருட்களுமே
அணுக்களாலானவை என்கிறது
அறிவியல்!
எனது உடலிலுள்ள
அணுக்கள் எல்லாமே
உன்னாலானவை!!

தூங்குவது என்னவோ நீதான்!

2011-11-14T01:31:00.000-08:00

#இரவுகளில்
உன் நினைவுகள்
என்னைத் தாலாட்டிக்கொண்டே இருக்கின்றன.
ஆனால்
தூங்குவது என்னவோ நீதான்!

#இறுக்கமான
உனது ஆடைகளின் மீது
எனக்குப்
பொறாமையாக இருக்கிறது.

தூய தமிழ்ச்சொற்கள்

2011-11-14T01:20:00.000-08:00

தூய தமிழ்ச்சொற்களை அறிமுகப்படுத்துவதே இப்பதிவின் நோக்கம். தமிழில் கலந்திவிட்ட பிறமொழிச்சொற்களுக்கான தமிழ்ச்சொற்களை இங்கு தருகிறோம். குறையிருப்பின் சுட்டுக. நண்பர் கோவிகண்ணனுக்கு நன்றிகள்!
வதை - துன்புறுத்து
நித்திரை - உறக்கம் , தூக்கம்
ஞானம்- அறிவு
சதம்- நூறு
சதவிகிதம் - விழுக்காடு
ஐதீகம் - நம்பிக்கை, மரபு, பழைமை
ஆசாரம் - ஒழுக்கம், வழக்கம், நெறி
பரிசுத்தம் - தூய்மை
சரித்திரம் - வரலாறு

என்ன மாயம் செய்தாய்?

2011-11-10T07:41:00.000-08:00

வெட்கம் ததும்பி வழிய
"போடா' என்ற
ஒற்றைச்சொல்லை
எறிந்துவிட்டுப்போனாய்!
அதன் பிறகு
கடிகாரத்தின் டிக்டிக் ஒலிகூட
எனக்குப் போடா என்றுதான் கேட்கிறது!

விக்கல் எடுக்கிறது உனக்கு!
தண்ணீர் தரக்கூடத் தோன்றாமல்
'உம்' கொட்டிக் கொண்டிருக்கிறேன் நான்!

தூய தமிழ்ச்சொற்கள்

2011-11-10T06:30:00.000-08:00

அன்புத்தமிழர்களே , தமிழ்ச்சொற்களை இனங்காண இப்பதிவு உதவக்கூடும் . பிழையிருப்பின் சுட்டுக,
தூய தமிழ்ச்சொற்கள்
பரம்பரை - தலைமுறை
தீர்க்கம் - ஆழமான, உறுதியான,முழுமையான
சுகம் - நலம்
நியதி - நெறி , முறைமை
மர்மம் - புதிர்
சமீபம் - அண்மை
மதியம் - நண்பகல், உச்சி
புளகாங்கிதம் - பெருமகிழ்ச்சி
தானம் - கொடை

ஏனிந்தக் கொலைவெறி?

2011-11-03T07:32:00.000-07:00

இன்றைய கல்விமுறை எத்திசையில் போகிறது என்பதற்கு விடைகள் பலவுண்டு.கல்வி என்பது வயிற்றை நிரப்பும் வழி மட்டும் அன்று, . அது மனிதனை மனிதனாக்கும் ஒன்று என்பது பலருக்கும் தெரியுமோ என்று புரியவில்லை. இன்றைய பள்ளிக் குழந்தைகளைப் பார்த்தால் ஒன்று மட்டும் உறுதியாகத் தெரிகிறது.எதிர்காலத்தில் பணம் சம்பாதிக்கும் இயந்திரங்களாகத்தான் அவர்கள் உருவாக்கப்படுகிறார்கள்.

காலையில் ஒரு தம்ளர் பால் மட்டும் அருந்திவிட்டுப் பள்ளி செல்லும் எத்தனையோ குழந்தைகளை நான் பார்த்திருக்கிறேன். மீறினால் ஓரிரண்டு இட்லிகள் அல்லது பிரட் துண்டுகள் அதனுடன் உண்பார்கள். மதிய உணவாக டப்பவில் அடைக்கப்பட்ட ஜங்க் வகை உணவு.மாலையில் ஏதேனும் கொறித்துவிட்டு ட்யூஷன். "மாலை முழுதும் விளையாட்டு " என்று பாடினார் பாரதியார். மாலையில் பள்ளி விட்டதும் குறைந்தது ஒருமணி நேரமாவது விளையாடுவது என்பது குழந்தைகளில் எத்தனை பேருக்கு வாய்க்கிறது?சக வயதுக் குழந்தைகளோடு சுதந்திரமாக விளையாடுவது எவ்வளவு பயனுள்ளது என்பது பலருக்கும் புரிவதில்லை. உடற்பயிற்சியின் நன்மைகள் மட்டுமின்றி குழு மனப்பான்மை , தலைமைப்பண்பு, வெற்றி தோல்விகளை ஏற்றுக்கொள்ளும் பக்குவம், என எத்தனையோ பண்புநலன்களை விளையாட்டுக்கள் கற்றுத்தரும். வெறும் வாய்பாடுகள், வினாவிடை, சூத்திர மனனங்கள் மதிப்பெண் பெற உதவுமே தவிர வாழ்வுசார் அனுபவங்களைக் கற்றுத்தரா. வாய்பாடுகளும் வினாவிடைகளும் வேண்டாமென்று சொல்லவில்லை. பள்ளியில் காலை யில் இருந்து அதைத்தானே கற்கிறார்கள்? பிறகு எதற்கு ட்யூஷன்? பெற்றோர்கள் வீட்டுப்பாடத்தை மேற்பார்வையிட வாய்ய்ப்புகள் இல்லாத போது ட்யூஷன் வேண்டும்தான். எனில் அதனை ஆறு மணிக்கு மேல் வைத்துக் கொள்ளலாமே!

" முற்றாத பிஞ்சு மூளைக்குள்ளே வந்தவன் போனவன் வைக்கோல் திணித்ததில் " என்பார் கவிப்பேரரசு வைரமுத்து. குழந்தைகளின் கல்வி இன்றியமையாததுதான் , ஆனால் விளையாட்டுகளும் உடர்பயிற்சியும் சேர்ந்ததுதான் முழுக்கல்வி என்பதை நம்மில் பலரும் உணரவில்லை என நினைக்கிறேன். மதிப்பெண் நோக்கக் கல்வியில் நாம் காட்டும் அக்கறையை சரிவிகித உணவும், நல்ல ஓய்வும், போதுமான உடற்பயிற்சியும் வழங்குவதில் நம்மில் பலரும் காட்டுவதில்லை என்பதே உண்மை!

சமன்பாட்டின் உண்மைத்தன்மை

2011-10-29T21:32:00.000-07:00

நழுவி ஒழுகும்
தீராத கணங்களுக்குள்
நுழைந்து,
அறுதியிடப்படாத
சமன்பாட்டின்
உண்மைத்தன்மை புலப்படாமல்,
வழிந்து பெருகும்
இருளோடை கிழிய
எங்கோ கூவும் அடிமனக் குரலின்
சுவடைப்பற்றி ஓடுகின்ற
சிறு பொழுதில்தான் தோன்றியது,
காலத்தைச்சேமிக்கும்
கலைக்குப் பெயர்தான்
மரணம் என்று!

எத்தனை இட்டும்,
எத்தனை எடுத்தும்
வாழ்வுப் பெருவெளியில்
தீராத தேடலுடன்
மூச்சிரைக்க ஓடி ஓடி,
தெரியாத கனவிலும்
தெரியாத வளைவிலும்
கண்டும் , கேட்டும், உண்டும், உயிர்த்தும்
உற்றறிந்த
புலன்களின் ஊடே முளைத்த
மயக்க வினாக்களின் முன்னே
யாவும் முயங்கித்தான் கிடக்கின்றன.

தூய தமிழ் - சில ஐயங்கள்

2011-10-28T08:44:00.000-07:00

உலோகத்துக்குச் சரியான தமிழ்ச்சொல்லாக மாழை என்ற அரிய தகவலை நண்பர் பின்னூட்டத்தில் குறிப்பிட்டிருந்தார். கனிமங்களில் உலோகம் , அலோகம் என்று இரு பிரிவுகள் உண்டு. பள்ளிப் பருவத்தில் 'ம்' என்ற எழுத்தில் முடிவன எல்லாம் (கந்தகம் பாஸ்பரம் தவிர..) உலோகம் என்றும், 'ன்' என்ற எழுக்தில் முடிவன எல்லாம் அலோகம் என்றும் சொல்லித்தந்தார்கள். ஆங்கிலத்தில் ....M ,N ( SODIUM, POOTTAASIUM--... METALS.OXYGEN , HYDROGEN -- NONMETALS)

உலோகங்கள் பொதுவாக எளிதிற்கடத்தியாகவும், கம்பியாகவும் , தகடாகவும் மாற்றக்கூடிய வகையிலும்,கார ஆக்சைடுகளைத் தரும் வகையிலும், அலோகங்கள் இவற்றினின்று மாறுபட்டும் இருக்கும் . அலோகத்துக்குச் சரியான தமிழ்ச்சொல் வேண்டும். யாராவது சொல்லுங்கள்.

தூரம் என்பது தமிழ்ச்சொல்லாக இருக்கலாம் என நண்பர் கோவிகண்னன் குறிப்பிட்டிருந்தார். தூர் என்ற தமிழ்ச்சொல் தூரம் என்றாகியிருக்கலாம். என்பது சிந்திக்க வேண்டிய கருத்து. ஆனால் தூர் என்பது தோண்டுவது என்றானால் அதை ஆழம் என்றுதான் சொல்வோம், தூரம் என்றோ தொலைவு என்றோ கூறுவது மரபன்று. அதேபோல். சயனம் என்பது சாய், சாய்தல் என்பவற்றிலிருந்து வந்திருக்கலாம். ஆனால், சகரத்தில் துவங்குவன தமிழ்ச்சொற்கள் அல்ல என்று படித்திருக்கிறேன். ஆனால் சகரம் தமிழிலக்கியங்களில் நீண்ட கால்மாக்வே பயன்பட்டு வருகிறது. தொடர்பு எங்கு அறுந்தது என்று தெரியவில்லை. ஐந்து எழுத்துகளுக்கு மேல் வருவனவும் தமிழ்ச்சொற்களன்று எனப் படித்த நினைவு. யாராவது விளக்கினால் நலம்.

தூய தமிழ்ச்சொற்கள்

2011-10-27T07:19:00.000-07:00

தமிழில் கலந்துவிட்ட பிறமொழிச்சொற்களைச் சுட்டிக்காட்டுவதே இவ்விடுகையின் நோக்கம். பிழை இருந்தால் பின்னூட்டத்தில் சொல்லவும். அனானியை ஆவலுடன் எதிர்பார்க்கிறேன்.

சயனம்- தூக்கம், உறக்கம்
பூர்த்தி - நிறைவு, முழுமை
புத்தி - அறிவு
தூரம் - தொலைவு
தேகம் - உடல் , யாக்கை, மெய்
கிராமம் - சிற்றூர்
அன்னம் - சோறு

ஆங்கிலம் இனி மெல்லச்சாகும் - உகரத்தின் மீது நமக்கிருக்கும் வெறி - பாகம் 3

2011-10-27T06:47:00.000-07:00

உகரத்தின் மீது நாம் கொண்டிருக்கிற தாளாத வெறியையும் , தீராத மோகத்தையும் இதற்குமுன் இரண்டு இடுகைகளில் கண்டோம்.மெய்யெழுத்துகளில் எந்தவொரு தமிழ்ச்சொல்லையும் உகரஞ்சேர்த்து முடிக்கும் நமது பண்பாடு ஆங்கிலத்தையும் விட்டுவைக்கவில்லை. ஒவ்வொரு மொழிக்கும் ஒவ்வொரு உச்சரிப்பு முறை உண்டு. ஆனால் ஆங்கிலமானது இந்தியாவில் எந்தவொரு மாநிலத்திலும், அங்கு புழங்குகின்ற மொழியின் உச்சரிப்பிலேயே வழங்கப்பட்டு வருகிறது. மலையாளிகள் ஆங்கிலத்தை மலையாள உச்சரிப்பிலும்,. இந்திக்காரர்கள் இந்தியயி போலவும் , கல்தோன்றாக் காலத்து மொழியைப் பேசும் நாம் தமிழே போலவும்பேசி, ஆங்கிலேயர்கள் நம்மை அடிமைப்படுத்து வைத்திருந்ததற்குப் பழி வாங்கிக் கொள்கிறோம்.

தொலைக்காட்சிகளில் பேட்டி தரும் புன்ணியாத்மாக்கள் பலரும் ஏன் ஆங்கிலத்தில் பேசிக்கொண்டிருக்கும் போதே இடையிடையெ தமிழ்ச்சொற்களையும் கலந்து கட்டுகிறார்கள் எனத் தெரியவில்லை!ஆங்கிலத்தை என்ன் முழுமையாகக் கற்றுக் கொள்ளாமல் இருக்கிறார்கள் என்பது இன்னமும் எனக்குப் புரியாத புதிராகவே உள்ளது!!அண்மையில் ஒரு நண்பர் தனது மகளின் படிப்பைப் பற்றி என்னிடம் பேசிக்கொண்டிருந்தார்."தேர்டு ஸ்டேன்டர்டு படிக்கிறா... ஃபோர்த்துக்கு வேற ஸ்கூல் பாக்கணும்" என்கிற விதத்தில் பேசிக்கொண்டிருந்தார்.

தேர்ட் ஸ்டாண்டர்ட் என்பதி தேர்டு என்று உதடு குவித்து முடிப்பதென்பது நமது க்ரொமோசோமில் நடந்து விட்ட கோளாறு!ஆங்கிலத்தில் THIRDU STANDARDU என்றுயாரும் எழுதுவதில்லை. விளக்கக் கூட்ட்டமொன்றில் ஏஜு ப்ரூஃபு என்ற சொல்லை ஒருவர் அடீக்கடிப் பயன்படுத்திக் கொண்டிருந்தார். ஏஜ்ப்ரூஃப்(age proof) எனபதில் u எங்கிருந்து வந்து சேர்ந்து கொண்டது எனத் தெரியவில்லை. செகண்டு கொஸ்டின் , தேர்டு கொஸ்டின் என்று எங்கெங்கு காணினும் உ கரமாக்வே இருக்கிறது. தமிழில் பேசுவது கேவலம் என்ற நினைப்பில் ஆங்கிலம் பேசி மாய்கிறார்களே இந்த அரைகுறைகள், ஆங்கிலத்தைத் தாய்மொழியாகக் கொண்டவர்கள் இவற்றையெல்லாம் கேட்டால் கண்ணீர்மல்கிக் கதறுவார்களே என்ற ஈவிரக்கம் சிறிதளவும் இன்றி தமிழில் தற்குறி, ஆங்கிலத்தில் அரைகுறை என்ற வெட்கமின்றி உலவிவருவது பெரும் வேடிக்கை. ஆங்கிலத்தில் பேச வேண்டாமென்று சொல்லவில்லை. முழுக்க ஆங்கிலத்தில் பேசுங்கள், பார்க்கலாம் உங்கல் அறிவுத்திறனை!

உயிர்க்கொல்லி!

2011-10-27T06:05:00.000-07:00

ஆயிரம் அர்த்தங்களுடன்
உன்னைநான் பார்ப்பது
உனக்குப் புரிபடுவதில்லை!
ஆனால் நீ
அரைநொடி என்னைப் பார்ப்பதே

ஆயிரம் அர்த்தங்களைச்
சொல்லிவிடுகிறது!

உனது பார்வையை
எப்படித் தயாரிக்கிறாய்?
கொல்லவும் பார்க்கிறது: உயிரைக்
கொடுக்கவும் பார்க்கிறது!!

காதல்புலம்

2011-10-24T09:42:00.000-07:00

காந்தவிசை
பரவியிருக்கும் இடத்தைக்
காந்தப்புலம் என்கிறார்கள்!
உன்
காதல்விசை
பரவியிருக்கும் இடத்தைமட்டும் ஏன்
காதல்புலம் என்று சொல்லாமல்
பிரபஞ்சம் என்று சொல்கிறார்கள்?

தாவணிக்கனவுகள்

2011-10-23T07:56:00.000-07:00

உனது இரட்டைச்சடைகளில் ஒன்று,
எனது ஆழ்மனக்கிணற்றிலிருந்து
கவிதைகளை மொண்டெடுக்கும்
கயிறாகவும்,
மற்றொன்று,
பார்க்கும் போதெல்லாம்
உனது துப்பட்டாவைப் பிடித்துக் கொண்டு
பின்னாலேயே ஓடிவரும்
என்மனதை இழுத்துப்பிடிக்கும்
லகானாகவும் இருக்கின்றன..!

தூய தமிழ்ச்சொற்கள்

2011-10-23T07:22:00.000-07:00

தமிழ்ச்சொற்கள் என்று நினைத்து நாம் பயன்படுத்திக்கொண்டிருக்கும் பிறமொழிச்சொற்கள் சிலவற்றையும் , அவற்றுக்கிணையான தமிழ்ச்சொற்களையும் இங்கு தந்துகொண்டிருக்கிறோம். அந்த வரிசையில் மேலும் சில இதோ:
குஷி - களிப்பு, உவகை, மகிழ்ச்சி
தாலுகா - வட்டம்
தீபம் - ஒளி, சுடர்,பிழம்பு
உலோகம் - கனிமம்
மமதை - செருக்கு, ஆணவம், திமிர்
நிச்சயம் - உறுதி
லாபம் - பயன்
போதை - கிறக்கம்
தம் - மூச்சு
தசம்- பத்து

தமிழைப் போற்றுவோம்!

ஆச்சரியம் அதிசயம்

2011-10-21T06:08:00.000-07:00

நபர் ஒன்றுக்கு .... என்னும் தொடரில் என்ன பிழை உள்ளது எனக்கேட்டிருந்தோம். நாம் அடிக்கடிக் கேள்விப்படும் சொற்பயன்பாடுகளுள் இதுவும் ஒன்று.நபர் என்பது தமிழ்ச்சொல்லன்று, அதற்கிணையான சொல்லாக "ஆள்" என்பதைக் கூறலாம்.ஆள் என்பவர் உயர்திணையாதலால், ஒன்று என அஃறிணைப் பயன்பாட்டைத்தவிர்த்து ஆள் ஒருவர்க்கு எனலாம். இதிலும் ஆள் என்பது தேவையில்லை. சுருக்கமாக ஒருவர்க்கு எனக் கூறிவிடலாம். தலைக்கு எனக் கூறுவது மரபு. தமிழறிவோம்! அதேபோல "வந்திருந்தவர்கள் எல்லாம் வியப்பிலாழ்ந்தார்கள்" என்பது போன்ற பயன்பாடுகளைக் காண்கிறோம்.வந்திருந்தவர்கள் என்பது உயர்திணையாதலின் எல்லாம் என்பதை விட எல்லாரும் எனக்கூறுவதே சரி.வியப்பிலாழ்ந்தார்கள் என்பதை விடவும் வியப்பிலாழ்ந்தனர் என்பது இன்னும் இனிமை..அதிசயித்தனர், ஆச்சரியப்பட்டனர் என்பனவெல்லாம் தமிழ்ச்சொற்களன்று!வியந்தனர் என்பது தமிழ்ச்சொல்.

தூய தமிழ்ச்சொற்கள்

2011-10-17T22:30:00.000-07:00

தமிழில் கலந்துவிட்ட பிறமொழிச்சொற்களைப் பட்டியலிட்டு அவற்றுக்கான தமிழ்ச்சொற்களையும் தந்துள்ளேன். பயன்படுத்தித் தமிழை நிலைநிறுத்துவோம்.
கோபம் - சினம்
உத்தரவு - ஆணை, கட்டளை
யுத்தம் - போர், சண்டை
புஷ்பம் - பூ, மலர்
கும்பம் - குடம்
கீதம் - இன்னிசை, பாடல்
அமோகம்- மிகுதி, பெருக்கு, மிகை
யாத்திரை - பயணம்
ஜன்னல் - பலகணி, சாளரம்
மாருதம் - காற்று, வளி.

புவிமிதிக்கும் திருவிழா!

2011-10-17T22:05:00.000-07:00

வீட்டு வாசற்படியிலேயே
காலணி அணிந்துகொள்கிறாய்!
எப்போதாவது அதிசயமாக
வெறுங்காலால் நடப்பதைப்
புவிமிதிக்கும் திருவிழா என்று கூறினேன்;
புவி சொன்னது,
"இல்லை, இல்லை, இது என்னைப்
பூ மிதிக்கும் திருவிழா என்று!"

அழகுக் குறிப்புகளைக் கேட்டு
அழகாகியவர்கள் இருக்கிறார்களா எனத்
தெரியவில்லை. ஆனால்,
நீ கேட்கும் போதுதான்
வெறுங்குறிப்புகள் கூட
அழகுக்குறிப்புகளாகிவிடுகின்றன.

நூறாவது பதிவு.

2011-10-16T00:15:00.000-07:00

இது எனது நூறாவது பதிவு. எனக்குப் பிடித்த சில பதிவுகளை எனது வலைப்பூவிலிருந்து இங்கு ப்கைர்ந்து கொள்கிறேன். நூறு என்பது ஒரு எனது நெடும்பயணத்தில் ஒரு கட்டம் நான் செல்ல வேண்டிய தொலைவு இன்னும் நிறைய உள்ளது. உங்கள் வருகைக்கும் ஆதரவுக்கும் நனறி!!

அழகுச்சுளை

சுவாசித்துச் சுவாசித்துக்
காற்றை அழகாக்குகிறாய்;
குளித்துக் குளித்து
ஆற்றையும் அழகாக்குகிறாய்!

courtesy:http://www.chakpak.com/celebrity/amala-paul/43675

ஐம்புலன்களாலும்
அழகை
அனுப்பி வைக்கிறாய்!
அதனை ரசிக்கவோ
ஐயாயிரம் புலன்கள்
வேண்டும் போலிருக்கிறது.

http://movies.sulekha.com/stargallery/amala-paul/91.htm

மெழுகுச்சிலை போல்

அமர்ந்திருந்தாய்!
கண்டு
உருகிக் கொண்டிருக்கிறது என்

http://movies.vinkas.in/2011/04/amala-paul-shares-her-love-matter-with-us/

காதல்!

இரு விழிகளாலும் உன்னை

அள்ளி அள்ளித் தின்றாலும்
காதல் பசி
தீரவே மாட்டெனென்கிறது!

உகரத்தின்மீது நமக்கிருக்கும் வெறி

'அ' கரம் முதலான அருந்தமிழ் மொழியில், 'உ'கரம் மூன்றாமெழுத்தாக அமைந்துள்ளது.ஒருமாத்திரை அளவுடைய இந்த 'உ'கரம் தான் நம்மை எப்படியெல்லாம் ஆட்கொண்டுள்ளது எனப் பார்த்தால் பெருவியப்பு மேலிடும்.

'உ' எனும் இவ்வுயிரெழுத்துப் பிறக்குமிடமானது இதழகளாகும். இதழ்கள் குவியும்போது 'உ' பிறக்கிறது. (நன்னூல்)

பொதுவாகக் கைநொடிக்கும் கால அளவையோ அல்லது கண்ணிமைக்கும் கால அளவையோ ஒரு மாத்திரை என்கிறோம். குறிலுக்கு ஒரு மாத்திரை யும் , நெடிலுக்கு இரண்டு மாத்திரை அளவும், மெய்யெழுத்துகளுக்கு அரை மாத்திரை அளவும் ஒலியளவு ஆகும்.ஆனால், ஒரு சில இடங்களில், 'உ'கரமானது தனக்குரிய ஒரு மாத்திரை அளவிலிருந்து குறைந்து அரை மாத்திரை அளவினதாய் ஒலிக்கும். அதனை நாம் குற்றியலுகரம் என்று , கூறுகிறோம்.

வல்லுகரங்களான கு,சு,டு,து,பு,று ஆகிய ஆறும் வல்லின மெய்யைத் தொடர்ந்து வருவதுசொல்லின் இறுதியில் வன்றொடர்க் குற்றியலுகரம் ஆகும்.

சான்று:

நாக்கு

மூச்சு

பாட்டு

கூத்து

காப்பு

கூற்று.

மெல்லின மெய்யைத் தொடர்ந்து இவ்வாறு உகரங்களும் வருவது மென்றொடர்க் குற்றியலுகரமாகும்.

சான்ரு:

பங்கு

பஞ்சு

வண்டு

பந்து

அம்பு

கன்று.

இடையின மெய்யைத் தொடர்ந்து சொல்லின் இறுதியில் இவ்வாறனுள் ஏதேனும் ஒன்று வருவது இடைத்தொடர்க் குற்றியலுகரமாகும்.

சான்று:

பல்கு

ஆய்சு

மார்பு

கொய்து.

சொல்லின் இறுதியில் இவ்வாறும் அமைந்து, அவற்றுக்கு முன் நெடில் இருந்தால் , அது நெடிற்றொடர்க் குற்றியலுகரமாகும்.

சான்று:

பாகு

காசு

நாடு

பாபு (கதவு)

ஆறு.

ஆய்த எழுத்தைத் தொடர்ந்து சொல்லின் இறுதியில் இவை வந்தால் ஆய்தத் தொடர்க் குற்றியலுகரமாகும்.

சான்று:

எஃகு

கஃசு

அஃது

இஃது.

சொல்லின் இறுதியில் இவ்வாறனுள் ஏதேனும் ஒன்று அமைந்திருந்து, அதற்கு முன் உயிர்மெய்யாக இருந்தால் , உயிர்த்தொடர்க் குற்ரியலுகரமாகும்.

சான்று:

மதகு

அரசு

பகடு

பழுது

மரபு

வயிறு.

அதே போலத் தனி எழுத்தாக உள்ள எல்லா உகரங்களுமே முற்றியலுகரமாகும்.

தனிக்குறிலை அடுத்து வரும் உகரம்,(நகு,பசு,படு,அது,தபு,மறு,கரு,புழு,கணு போன்றவை)

தனி எழுத்தாக வரும் உகரம்,(உ, கு,சு,து,ணு,டு,பு,று,ளுஆகியவை)

இருகுறிலை அடுத்துவந்த , கு,சு,டு,து,பு,று அல்லாத பிற உகரங்கள்,(கதவு,அரவு,அலமு,விழவு,உழவு போன்றவை)

ஆனால் நமது பேச்சு வழக்கில் மெய்யில் முடியும் சொற்களைப் பெரும்பாலும் உகரம் சேர்த்தே முடிக்கிறோம்.

சான்று:

பல்-பல்லு

நெல்-நெல்லு

வயல்-வயலு

கள்-கள்ளு

மண்-மண்ணு

தேள்-தேளு

தேன் -தேனு

தேர் - தேரு

நான் - நானு

மீன் - மீனு

பேன் - பேனு

யாழ் - யாழு

வால் - வாலு

பகல் - பகலு

திடல் - திடலு

பார் - பாரு

வேர் - வேரு

செய்யுள் - செய்யுளு

பட்டியல் மிக நீளமானது. இதைக் கூடச் சகிப்பே, ஆனால். ஆங்கிலத்தின் நிலைதான் பரிதாபகரமானது.

CAKE-கேக் - கேக்கு

LAND -லேன்ட் - லேன்டு

AND - அன்ட் - அன்டு

ROAST-ரோஸ்ட் - ரோஸ்ட்டு

SONGH - சாங் - சாங்கு

GROUND -க்ரௌன்ட் - க்ரௌன்டு

PRINT- ப்ரின்ட் - ப்ரின்ட்டு

PANIT-பெயின்ட் - பெயின்ட்டு

POINT-பாயின்ட் - பாயின்ட்டு

போன்றவை .

இதைக்கூடச் சகிப்பேன். ப்ரின்ட் ப்ரிவ்யூ(PRINT PREVIEW) என்பதை, கூட்டுச் சதி, பாட்டுப் பெட்டி, பூட்டுக்காரன் பாட்டுக்காரன் என்பது போல ப்ரின்ட்டுப் பிரிவியூ என்று சொல்வதுதான் குருதி அழுத்தத்தைக் கூட்டுகிறது. ஆங்கிலத்தைத் தாய்மொழியாகக் கொண்டவர்கள் நாம் ஆங்கிலம் பேசுவதைக் கேட்டால் , நாம் ஆங்கிலம்தான் பேசுகிறோம் என்று சத்தியம் செய்தால் தான் நம்புவார்கள்.தமிழில் பேச வேண்டிய இடங்களில் அல்லது பேசக்கூடிய இடங்களில் எல்லாம் ஆங்கிலத்தில் பேசுவது அல்லது ஆங்கிலம் கலந்து பேசுவது என்பது தமிழுக்குச் செய்கிற துரோகம். அவ்வாறுபேசுகிற ஆங்கிலத்தையும் தமிழைப் போலப் பேசுவது ஆங்கிலத்துக்குச் செய்கிற துரோகம்.

ஒருமொழி கொன்றும் ஓய்ந்திடாமல், பிறமொழியும் கொன்றால்தான் பிறவிப்பயன் தீருமோ எனத் தோன்றுகிறது.

செழித்த தளங்களில் ஊடாடும் வினாக்கொக்கிகள்

என் இதயத்தின் இடுக்குகளில்

எப்போதும் ஒரு தேன்கூடு ததும்பிச்சொரிந்து

நினைவுகளை அழிக்கிறது!

நாசியின் முன்னால் விரவிய

நறுமணம் எப்போதும்

கடந்தகாலத்தை மூச்சிறைக்கச் செய்கிறது.

என் கவிதை ஏட்டின்

பக்கங்களில் மடித்து வைத்திருக்கும்

வானவில்

எழுத்துக்களை உறிஞ்சிக் கொள்கிறது.

நிம்மதி பாவும்

தளத்தின் புல்வெளிகளுக்குள்

எப்போதும் ஒரு புதைகுழி

ஒளிந்து கொள்கிறது.

வாழ்க்கையில் என் இருப்பை

முடிவு செய்வது

யார் என்பதைத்தான்

அறிய முடிவதே இல்லை1

ட்வீட்டுகள்

http://twitter.com/#!/rpsinghh/

ஓட்டலுக்குத்தனியாகச்செல்கையில் சப்ளையர்சீக்கிரம் வராவிட்டால்கடுப்பாகும் மனசு, கேர்ள்ஃப்ரண்டுடன் செல்லும்போது மெதுவாக வரட்டுமெனப்படபடக்கிறது

ஆனாலும் ஒரிஜினல் ப்ரொஃபைல் போட்டோவோடு ட்வீட்டுவது என்பது பல சமயங்களில் சிக்கலாகத்தான் இருக்கிறது!

இந்த இரன்டு வரி ட்வீட் தான் உலகையே மாற்றியமைக்கப் போகிறது என்று நினைத்துத்தான் எல்லா ட்வீட்டுகளுமே வெளிப்படுகின்றன.

அழைப்பின் பேரில் விழாக்களுக்குச் செல்வதன் நோக்கம், வாழ்த்துவதை விடவும் மொய் வரவுசெலவுகளையே அதிகம் சார்ந்திருக்கிறது.

கட்டளைக் கலித்துறை எழுதுவதன் நவீன, எளிய வடிவந்தான் ட்வீட்டுவது!

டூவீலரின் ஜெயன்ட் சைஸ் பேக் டயர்கள்தாம் ஆண்களின் 'எக்ஸ்ட்ரா சமாசாரத்தின்' வெளிப்பாட்டு வடிகால்!(புரிகிறதோ?)

முழு இரவும் தெரியும் முழுநிலவை விட, அது நூறு நிமிடங்கள் பூமியால் மறைந்து விடுவதைத்தான் மக்கள் அதிகம் ரசிக்கின்றனர்.#சந்திரகிரகணம்

நிறைவேறாத ஆசைகள்தாம் கனவுகளாக வருகின்றன அல்லது ட்வீட்டுகளாக வெளிப்படுகின்றன!

எல்லாருக்கும் மாதக் கடைசிகள் வரவே செய்கின்றன.ஆனால் தேதிகள்தான் ஆளாளுக்கு மாறுபடுகின்றன.#புலம்பல்

நடன,இசைநிகழ்ச்சிகளில் நடுவராக இருப்பவர்கள் திறமையை மதிப்பிட வருபவர்களா, 'தெறம' காட்டவருபவர்களா என்ற சந்தேகம் எனக்கு ரொம்பநாளாக் இருக்கிறது!

சொன்னால் என்ன நினைப்பார்களோ என்று நினைக்கும் விஷயங்கள்தாம் ட்வீட்டுகளாக வெளிப்படுகின்றன!

நிச்சயிக்கப்பட்ட ஆயுளிலிருந்து ஒரு வருடம் குறைந்து போய் விட்டதே எனத் துக்கித்துக்கொண்டிருக்கையில் பிறந்த நாள் வாழ்த்துக்கள் வருகின்றன!

கோவையின்வணிகவளாகமொன்றில் ஏறுகிறேன்..பெயின்ட்அடித்திருக்கிறோம் இன்னும்காயவில்லைஎன்றுசொன்னாலும் தொட்டுப்பார்த்தால்தான்மனசுகேட்கிறது.

டாப்- 4 பட்டியலில் நாங்கள் இருக்கிறோம் என்று யாராவது சொன்னால் அவர்கள் நாலாவது இடத்தில் இருக்கிறார்கள் என்று அர்த்தம்!

புரிந்து கொள்ளாத ஜென்மம் என்கிறார்கள், புரிந்து கொள்வது எளிதாகத்தான் இருக்கிறது, ஒப்புக் கொள்வதுதான் கடினமாக இருக்கிறது!

அதி நவீன பார் வசதி என்று போர்டு வைக்கிறார்களே , அவர்களுக்கெல்லாம் மனசாக்ஷியே கிடையாதா?

பிசாசின் சொற்கள் இனிமையானவை என்று சொல்கிறார்கள். மனைவியின் சொற்கள் கடுமையானவை என்று அனுபவஸ்தர்கள் சொல்கிறார்கள்! என்ன லாஜிக்கோ?

நடந்து முடிந்ததைப் புட்டுப் புட்டு வைப்பார் என்று சிலரைப் பார்க்க ஓடுபவர்களுக்கெல்லாம் ஷார்ட் டெர்ம் மெமரி லாஸ் ப்ராப்ளம் இருக்குமோ?

அருகிலிருக்கும் தேநீர்க்கடையில் வெந்நீர் வாங்கி, மாத்திரை விழுங்கியபின் பேருந்தைக் கிளப்பும் ஓட்டுநரைக் காணும்போது மனதை என்னவோ செய்கிறது!

கனவில் வரட்டுமா?

நேரிசை வெண்பாக்கள்:

மூன்றாம் கோணம் வலைபத்திரிகை- கவிதைப்போட்டி-

http://inthiya.in/ta/?p=7304

மூன்றாம் கோணம் வலைபத்திரிகை அறிவித்துள்ள கவிதைப்போட்டிக்காக அவர்கள் கொடுத்திருந்த படத்தை வைத்து எழுதிய கவிதை இது.

சூழ்ந்த துயரும் சுகமும் மறந்திரவில்

ஆழ்ந்து துயிலும் அழகேநான் - வாழ்ந்து

பெறுவது வேறென்ன பெண்ணரசி உன்றன்

குறுநகை யன்ன கொடை!

திறவாயோ என்றுன் திருவடியில் சாய்ந்தே

உறங்காமல் பார்த்திருப்பேன் உன்னை - நிறமொளிரும்

ஓவியம்போல் எவ்வா றுறங்குகிறாய் பக்தன்போல்

சேவித்து நின்றேன் சிலிர்த்து!

தங்கத் தளிர்க்கொடியே தாமரையே வான்மதியே

பொங்கிப் பெருகுதடி பொன்முகத்தில் ‍- ‍ தங்கித்

தினவெடுக்கும் பேரழகைத் தீண்ட வருவேன்

கனவிலுன்மேல் மேகமாய்க் கவிழ்ந்து!

தூங்கிப் புரள்கிறாய் தோகையே கண்டுள்ளம்

ஏங்கித் தவிக்கிறது எப்படித்தான் -தாங்கிக்

கழிப்பேனோ வாழ்வைநான் காதல்நோய் தீண்டக்

கிழியாதோ என்னிதயம் கேள்!

நிலவும் கவியெழுதும் நீயுறங்கும் சீரைச்

சிலநொடி பார்த்தாலே சிந்தை - கலைந்துவிடும்

நில்லாதே என்னாவி நெஞ்சுக்குள் தூக்கத்தால்

கொல்லாதே மூடியகண் கொண்டு!

புரண்டு படுக்காதே பூகம்பம் என்னுள்

திரண்டு பிதுங்கித் திமிறும் - இரண்டு

மலைகள் நிகர்த்த மதுக்கலசம் கண்டு

நிலைகுலையச் செய்யும் நிமிர்ந்து!

அள்ளிக் கரங்களில் அப்படியே தூக்கிவிடத்

துள்ளிக் குதித்துத் துடிக்குதடி - உள்ளம்

கனவில் ஒருமுறைநீ கண்டுவிட என்னைத்

தினமும் புரிவேன் தவம்!

சிற்பமாய் உன்னைச் செதுக்கிய ப்ரம்மனின்

கற்பனைதான் என்னேபோ கண்டவுடன் - பொற்சிலைதான்

தூங்குகிற தென்றே துணிவர் எவரும்நீ

தூங்குகிற பேரழகு பார்த்து!

உறங்குகிறாய் அங்கே உருகிநான் இங்கே

கிறங்குகிறேன் வண்ணநிறைக் கிண்ணந் - திறந்தூற்றிப்

பெய்து முகிலும் பிசகில்லா மெத்தையை

நெய்து கொடுத்ததோ சொல்!

பின்னிரவில் மெல்லப் பிறைநிலவும் வந்தெட்டிச்

சன்னல் வழியே சரிந்தபடி - கன்னிநீ

தூங்குவதைப் பார்த்தபடி தொண்டை செருமிவிடும்

ஏங்கிப்போய் ஓர்பெரு மூச்சு!

ட்வீட்டுகள்

மட்டமான மனிதர்கள் மனிதர்களையும்,சாதாரண மனிதர்கள் சம்பவங்களையும்,வெற்றியாளர்கள் கருத்துக்களையும் பற்றித் தங்களுக்குள் பேசிக்கொள்ளுகிறார்கள்

மழைநீர்க்குழாய் என்ற ஒன்றுமட்டும் கண்டுபிடிக்கப்படாமல் இருந்திருந்தால், கிரைம் நாவல்கள் பல எழுதப்படாமலே போயிருந்திருக்கும்.

பார்ப்பதை எல்லாம் ட்வீட் செய்கிற பக்குவம் உங்களுக்கு வந்துவிட்டது என்றால்....நிச்சயம் உடனே நீங்கள் மருத்துவரைச் சந்திக்கவேண்டும்!

எந்தப்பக்கம்திருகினால் தண்ணீர்வரும் என்பதைக்கண்டுபிடிக்க முடியாதஅளவுக்குவாஷ்பேஸின்குழாய்களைடிசைன் செய்வதற்குத்தான்எவ்வளவுமெனக்கெடுகிறார்கள்?

பத்துப் பேர் கூட இல்லாத பஸ் ஸ்டாப்பில் பத்து லட்சம் பேர் தன்னையே பார்ப்பது போன்ற தன்னுணர்வுடன் நடக்கிறீர்கள் என்றால் , நீங்கள் ஒரு பெண்!

ப்ரியமான் ஸகாக்களோ, ஸகியோ விடைபெறும்போது TATA சொல்வதுதான் எவ்வளவு திவ்யமாக உள்ளது! FEEL பண்ணிப் பாருங்கள்!!

கல்கி இதழில் வெளிவந்த நையாண்டிக் கவிதை, நான் இன்றும் ரசித்து மகிழ்வது:நான் நீ அவன் இவன் டாஸ்மாக்! (ஒண்ணுங் கீழ் ஒண்ணு)

எதற்கெல்லாமோ எக்சேஞ்ச் ஆஃபர் தருகிறார்கள் என்று அலுத்துக்கொள்கிறார் அறுபது கடந்த நண்பர் ஒருவர் மனைவியுடன் சண்டை போட்டு விட்டு வந்த பிறகு!

ஜீன்ஸ் பேன்ட்டின் மீது பெல்ட்டுக்குப்பதிலாக அரைஞாண் கயிற்றைச் சுற்றிக் கொள்பவர்கள் எல்லாம் உள்ளே கோவணம் கட்டியிருக்கமாட்டார்கள்# நம்பிக்கை

சங்கீதம் என்ற வார்த்தைக்குப் பிறகு சந்தோஷம் என்ற வார்த்தை இல்லாத எந்தத் திரைப்படப் பாட்லையும் நான் கேட்டதே இல்லை

வளர்ச்சியடைந்த நாட்டுக்கான அறிகுறி, அதன் நடுத்தர மக்கள் அடிக்கடிவெளியே சென்று சாப்பிடுவதுதா - பொருளாதார நிபுணர்கள்(தினத்தந்தி- 14.08.2011)

நிலாவில் கவிதை ஊற்றுகள் ஏதேனும் சுரக்கின்றனவா என்று அடுத்த முறை செல்பவர்கள் கண்டறிந்து வரவேண்டும்!

you will only get what you deserve , not what you desire . #first rank in test cricket

உங்கள் வலைப்பதிவைப் பிரபலமாக்கச் சில யோசனைகள்!

வேறுவேறு பெயர்களில் மின்னஞ்சல் முகவரிகளை உருவாக்கித் தனக்குத் தானே பின்னூட்டமிட்டுக்கொள்வது, தொடர்பதிவர்களாகக் காட்டிக்கொள்ள வேறுவேறு பெயர்களில் வலைப்பூக்களை உருவாக்குவது இத்யாதி இத்யாதி.... இவையெல்லாம் ஓல்ட் டெக்னிக்ஸ்!உண்மையிலேயே உங்கள் வலைப்பதிவு பிரபலமாக வேண்டுமா? இதோ ... லட்டு லட்டாகச் சில ஐடியாக்கள்!

### உங்கள் பதிவைப் படிப்பவர்களின் எண்ணிக்கை பெருக வேண்டுமானால் கணினி வைத்திருப்பவர்களின் எண்ணிக்கை பெருக வேண்டும். எனவே நீங்கள் வீட்டுக்கு வீடு இலவச கணினி கொடுக்கலாம். (என்னிலிருந்தே ஆரம்பிக்கலாம் )

###பின்னூட்டமிடத் தலைக்கு ஆயிரம் ரூபாய் தரலாம்!(அக்கவுன்ட் நம்பர் அனுப்பட்டுமா?)

###ரஜினி, கமல்,விஜய்,மணிரத்னம்,ஷங்கர் போன்றோரின் படங்களை ரிலீஸ் ஆகும்முன்னே எப்படியாவது பிரதி யெடுத்து வலைப்பூவில் ஓட்டலாம்(வேலூரில்)

!###நமது ப்ராடக்டை மார்கெட் செய்ய அதாவது போணி பண்ண விளம்பரங்கள் அவசியம்! எனவே தமிழ்த் தொலைக்காட்சிகள் (சன் டிவி, விஜய் டிவி உட்பட)அனைத்திலும் ப்ரைம்டைமில் உங்களது வலைப்பூவைப் பற்றி நாள்தோறும் விள்ம்பரம் செய்யலாம். வார, நாளிதழ்களிலும் தொடர்ந்து அரைப்பக்க அளவில் விளம்பரம் செய்யலாம்.(அரைப்பக்கம் போதும்)

###விக்கிலீக்ஸ் அஸ்ஸாஞ்ச் மாதிரி வல்லரசு நாடுகளின் ராணுவ ரகசியங்களைக் கண்டறிந்து வெளியிடலாம்.(சி.ஐ.ஏ., மொஸ்ஸாட் வகையறாக்கள் லாடம் கட்டினால் என்ன, பிரபலமாவதுதானே நமக்கு நோக்கம்?)

###வாராவாரம் ஒரு வி.ஐ.பி.(சச்சின், ஏ.ஆர்.ரகுமான்,அமீர்கான்,அப்துல்கலாம்,ஒபாமா போன்றோரிடம்) பேட்டி எடுத்து வெளியிடலாம். (பேட்டி கொடுக்க நானும் தயார்)

###சக வலைப்பதிவர்களின் இடுகைகளைச் சகட்டுமேனிக்குத் திட்டித்தீர்த்துப் பின்னூட்டமிடலாம்.அப்பொழுதுதான் திருப்பித் திட்ட அவர்களும் உங்களது வலைப்பூவுக்கு வருவார்கள்!(நமக்குத் தேவை அதிகப் பின்னூட்டங்கள், அவ்வளவுதான்!)

###சக பதிவர்களின் இடுகைகளைத் திருடி வெளியிடலாம்.நிச்சயமாக அவற்றை எழுதியவர்களாவது வந்து பார்ப்பார்கள்!(வீட்டுக்கு அரிவாளோடு..?)

###இது போன்ற பயனுள்ள தகவல்களைத் தொடர்ந்து வெளியிடலாம்!(இதுவரைக்கும் எத்தனை பேர் இதேபோலப் பதிவு செய்தார்களோ, நான் வலைப்பதிவுலகத்துக்கு ரொம்பப் புதுசு.)

###உலகில் இதுவரை யாராலும் தீர்வு காண் முடியாத விஷயங்களுக்குத் தீர்வு கண்டு பதிவேற்றலாம், கூட்டம் அம்மும்!மனைவி நம்பும்படிப் பொய் சொல்வது, பொது இடங்களில் எச்சில், சிறுநீர் மற்றும் இன்னபிற இதர கழிவுச் சமாச்சாரங்களைக் கொட்டாமல் தடுப்பது, மாதச் சம்பளத்தில் மிச்சம் பிடிப்பது போன்றவை. (எனக்கு இன்னும் கல்யாணம் ஆகலீங்)

###சில நோய்களின் பெயர்களைப் பட்டியலிட்டு, அவையெல்லாம் உங்களது பதிவைப் படிக்கும்போது குணமாவதாக ஒரு மேட்டரை நீங்களே கிளப்பி விடலாம்!(படித்தபின் பி.பி.யோ மனநோயோ வந்தால் என்ன செய்வது?)

###சர்வதேச ஸ்டைலில் பெயர்வைத்துக்கொண்டு ஓர் அமைப்பை உருவாக்கி அதன் விருதை உங்கள் வலைப்பூவுக்குத் தரலாம்.(நீங்கள் மட்டுமே அதில் உறுப்பினர்)

###ஏகப்பட்ட எழுத்துப் பிழைகளோடு பதிவேற்றலாம்!(ஒரு கவன ஈர்ப்புக்குத்தான்)

### அரை மணி நேரத்துக்கு ஒரு இடுகை என்ற வீதத்தில் கூகுளையே கும்மியெடுக்கலாம். (அதென்ன சைபர் க்ரைமா, குண்டாஸா.... நமக்கு சட்ட நுணுக்கமெல்லாம் அவ்வளவாத் தெரியாது!)

###பதிவுகள் மூலமாக முதியோர் கல்வி நடத்தலாம்! (கிராமப் புறங்களில் பெரும் வரவேற்பிருக்கும்!)

ஓகே பாஸ்,போய்க் கலக்குங்க! வாழ்த்துக்கள்!!

வலைமொழிகள்

பழமொழிகளை வலைமொழிகளாக மாற்றிப்பார்த்தேன்! ஐடியா தோன்றியதும் 'டக்' கென நினைவில் வந்த பழமொழிகளை மட்டும் மாற்றியிருக்கிறேன்!

#ஊரார் வலைப்பூவைப் பின்ன் ஊட்டி வளர்த்தால் தனது வலைப்பூ தானே வளரும்!

( ஊரார் பிள்ளையை ஊட்டி வளர்த்தால் தன் பிள்ளை தானே வளரும்)

#பதிவரின் மனது இடுகையில் தெரியும் .

(அகத்தின் அழகு முகத்தில் தெரியும்)

#புத்தியில் இருந்தால்தானே இடுகையில் வரும்.

(சட்டியில் இருந்தால்தானே அகப்பையில் வரும்)

#வலைப்பதிவருக்கு ட்விட்டர் கற்றுத் தர வேண்டுமா?

(மீன்குஞ்சுக்கு நீந்தக் கற்றுத் தர வேண்டுமா?)

#கூறு கெட்ட வலைப்பதிவர் ஏழு, எட்டுனு பதிவிட்டாராம்.

( கூறு கெட்ட எருமை மாடு ஏழுகட்டுப் புல் தின்னதாம்!)

#தட்டச்சு செய்வது கால்மணி நேரம்! திரட்டிகளில் பதிவது முக்கால் மணிநேரம்!!

(சுண்டக்கா காப்பணம், சுமைகூலி முக்காப் பணம்!!!)

#கும்பகோணத்தில் பதிவேற்ற குத்தாலத்தில் டைப் செய்தானாம்!

(கும்பகோணத்தில் மூட்டை தூக்க குத்தாலத்தில் முண்டாசு கட்டினானாம்!)

#இட்டதெல்லாம் இடுகையல்ல!

( மின்னுவதெல்லாம் பொன்னல்ல! )

#எழுத மாட்டாதவன் கைகளுக்கு எழுபத்தெட்டு வலைப்பூக்களாம்!

( அறுக்க மாட்டாதவன் கைகளுக்கு அம்பத்தெட்டு அரிவாளாம் ! )

#ஈ ன்னு இளிக்க இ‍‍-மெயில் ஐடி இல்லாதவன் ப்ளாக்குக்குப் பேரு பெருச்சாளின்னு வெச்சானாம்!

(அடியேன்னு கூப்பிடப் பொண்டாட்டி இல்லாதவன் புள்ள பேரு அருணாச்சலம்னு வெச்சானாம்!)

#வம்பளந்து கொண்டே இருப்பவன் வலைப்பதிவு செய்யமாட்டான்!

( குரைக்கிற நாய் வேட்டைக்கு ஆகாது)

#சீரியல் பாக்குறவனுக்குத் தெரியுமா வலைப்பதிவோட வாசனை !

(கழுதைக்குத் தெரியுமா கற்பூர வாசனை ?_)

#ப்ளாக்குக்கு ப்ளாக் ஸ்பெல்லிங் மிஸ்டேக்!

( வீட்டுக்கு வீடு வாசப்படி !)

# அழுதாலும் பதிவு அவந்தானே இட வேண்டும்!

( அழுதாலும் பிள்ளை அவள்தானே பெற வேண்டும் !)

#ஒரு பின்னூட்டம் கொடுத்துக் கருத்துக் கேட்டவன் ஒன்பது பின்னூட்டம் தந்து விளக்கம் சொன்னானாம்.

( ஒரு ரூபா தந்து அழச்சொன்னவன் ஒன்பது ரூபா தந்து ஓயச் சொன்னானாம் !)

#ப்ளாக்கர் கண்ணுக்கு கண்டதெல்லாம் இடுகை!

( அரண்டவன் கண்ணுக்கு இருண்டதெல்லாம் பேய்!)

#டெம்ப்ளேட் நாறினாலும் போஸ்டிங் நல்லா இருந்தா சரி !

(கோழி குருடானாலும் சாறு ருசியா இருக்கணும் & ஓட்டைச் சட்டியானாலும் கொழுக்கட்டை வெந்தால் சரி! )

#எஸ்.எம்.எஸ். அனுப்பத் தெரியாதவன் ப்ளாக் ஆரம்பிச்சு ப்ரைஸ் வாங்கறேன்னு சொன்னானாம்!

(கூரை ஏறிக் கோழி பிடிக்க முடியாத‌வன் வானம் ஏறி வைகுண்டம் காட்டப் போறேன்னு சொன்னானாம் !)

வெண்பா எழுதுவது எப்படி?

யாப்பருங்கலத்தை அலசி ஆராய்வதற்காகத்தான் இவ்வலைப்பூவை நாம் ஆரம்பித்திருந்தாலும், வெண்பா எழுதுவது எப்படி எனச் சற்றுத் தனித்துப் பார்ப்போம்!

தமிழின் பெருங்கொடைகளுள் வெண்பாவும் ஒன்று!தமிழ்க் கவிதையின் பெரும்பிரிவுகளுல் ஒன்றான வெண்பாவுக்குத் தனியிடம் உண்டு.வெண்பாவானது பாடுவதற்குச் சற்றுக் கடினமானதும்,நுட்பமானதும், படிப்பதற்கு இன்பமானதுமாம்.வெண்பா என்றாலே என்னவோ ஏதோ எனத் தெறிப்பவர்க்கும்,அஃது ஏதோ ஒரு புரியாத புதிர் என்பவர்க்கும்,நமக்கெல்லாம் அவ்வளவு எளிதில் வெண்பா வராது என்பவர்க்கும்,அதன் அழகையும் .இயற்றும் முறையையும்,விளக்குவதும் வெண்பா என்பது எவ்வளவு வசீகரமான ஒன்று என்பதைப் புரிய வைப்பதும்,இவ்விடுகையின் நோக்கம்.தமிழில் குறிலும் நெடிலும் தெரிந்திருந்தால் போதும், வெண்பா இயற்றி விடலாம்.

வெண்பாவுக்கென்றுள்ள விதிமுறைகளை ஒவ்வொன்றாய்ப் பார்ப்போம்.ஓர் எழுத்து மாறும்போதுகூட வெண்பா இலக்கணம் கெட்டு, பாடலே சிதைந்துவிடும்.

#வெண்பா இரண்டு அடிகளுக்குக் குறையாமல் வர வேண்டும்.

#இயற்சீர் மற்றும் வெண்சீர் வெண்டளைகள் மட்டுமே வர வேண்டும்.

#ஒவ்வோரடியும் நான்கு சீர்கள் பெற்றும் , ஈற்றடி ( இறுதியடி ) மட்டும் மூன்று சீர்கள் பெற்றும் வர வேண்டும்.

#ஈற்றடியின் ஈற்றுச் சீர் நாள், மலர், காசு, பிறப்பு, என்னும் வாய்பாடுகளுள் ஒன்றினைப் பெற்று வருதல் வேண்டும்.

#செப்பலிசை பெற்று வர வேண்டும்.

மாமுன் நிரையும், விளமுன் நேரும், காய்முன் நேரும், வருவனவே வெண்பாவுக்குரியவை.ஒவ்வோரடியிலும் நான்கு சீர்கள் ( அளவடி) வரவேண்டும் எனப் பார்த்தோம்.இச்சீர்கள் ஈரசைச்சீர்களாகவோ (இயற்சீர்) காய்ச்சீராகவோ மட்டுமே வெண்பாவில் இருக்க வேண்டும் .

ஈரசைச் சீர்களாவன,

நேர்நேர் - தேமா

நிரைநேர்-புளிமா

நேர்நிரை- கூவிளம்

நிரைநிரை- கருவிளம்

காய்ச்சீராவது நேரசையில் முடியும் மூவசைச் சீராகும்.ஒருசீர் நிரையசையில் முடிந்தாலோ, காயில் முடிந்தாலோ அதற்கு அடுத்து வரும்சீர் நேரசையில் தொடங்க வேண்டும்.நேரசையில் ஒரு சீர் முடிந்தால் அடுத்த சீர் நிரையசையில் தொடங்க வேண்டும்.இவ்வளவுதான் தளை!

நேர், நிரை என்று சொன்னோமே , அப்படிஎன்றால் என்ன?

#குறில் தனித்தும் (எ.கா: 'க' )

#குறில் தனித்தும் ஒற்றடுத்தும் (எ.கா: 'கல்")

#நெடில் தனித்தும் (எ.கா: 'நா')

#நெடில் ஒற்றடுத்தும் (எ.கா: 'நாள்')

வருவனவெல்லாம் நேர் அசையாகும்.

#குறிலிணைந்தும் (எ.கா: ' பல')

#குறிலிணைந்தும் ஒற்றடுத்தும் (எ.கா: ' களம்')

#குறில் நெடில் இணைந்தும் (எ.கா: ' பலா')

#குறில் நெடில் இணைந்தும் ஒற்றடுத்தும் (எ.கா: 'விளாம்')

வருவனவெல்லாம் நிரையசையாகும்.

ஈற்றடியின் ஈற்றுச் சீர் மட்டும், தனித்த நேரசையாகவோ, நிரையசையாகவோ வருதல் வேண்டும் அல்லது குற்றியலுகரத்துடன் சேர்ந்த நேரசையாகவோ , நிரையசையாகவோ வருதல் வேண்டும். குற்றியலுகரம் அறிய :(http://sezhunkaarikai.blogspot.com/2011/06/blog-post.html)

சூரல் பம்பிய சிறுகான் யாறு' என்ற தலைப்பில் அண்மையில் நான் எழுதிய மரபுச் செய்யுள் தொகுப்பில் முத்தத்துவம் என்ற தலைப்பில் நான் எழுதிய வெண்பாக்களுள் ஒன்றை எடுத்துக் கொண்டு விளக்கலாமென விரும்புகிறேன்.

"கள்வடியும் பூவிதழ்க் காரிகையைக் கைகளில்

அள்ளினேன் பந்துபோல் அப்படியே - துள்ளும்

இதழில் கவிதை எழுதினேன் சொர்க்கக்

கதவும் திறந்தது கண்டு"

இவ்வெண்பா நேரிசை வகையைச் சேர்ந்தது. ஒவ்வொரு சீராக, அசையாக, தளையாக, அடியாகப் பார்ப்போம்.

முதல் அடியில் முதற்சீர்

கள் வடி யும் - இது மூவசைச் சீர் . காயில் முடிந்துள்ளது

கள் - குறில் ஒற்றடுத்தது - நேர்

வடி - நெடில் இணைந்தது - நிரை

யும் - குறில் ஒற்றடுத்தது - நேர்

கூவிளங்காய் வாய்பாட்டில் காய் என முடிந்துள்ளதால் , அடுத்த சீர் நேரசையில்தான் தொடங்க வேண்டும்.

இரண்டாவது சீர்

பூவிதழ்க் - ஈரசைச்சீர்

பூ - நெடில் தனித்தது - நேர்.

விதழ்க் - குறிலிணைந்து ஒற்றடுத்தது - நிரை

முதற்சீர் காயில் முடிந்ததால் , இரண்டாவது சீர் நேரில் தொடங்கியது. அதேபோல , இரண்டாவது சீர் நிரையில் முடிந்ததால் மூன்றாஞ்சீர் நேரில் தொடங்கியது.

கா/ ரிகை /யை - நேர்நிரைநேர்-கூவிளங்காய்

கை/களில்/- நேர்நிரை -கூவிளம்

அள்/ளினேன் - நேர்நிரை-கூவிளம்

பந்/துபோல்- நேர்நிரை-கூவிளம்

அப்/படி/யே/- நேர்நிரைநேர்-கூவிளங்காய்

துள்/ளும்/- நேர்நேர்-தேமா

இத/ழில்/- நிரைநேர்-புளிமா

கவி/தை/- நிரைநேர்- புளிமா

எழு/தினேன்/- நிரைநிரை-கருவிளம்

சொர்க்/கக்/- நேர்நேர்-தேமா

கத/வும்/ - நிரைநேர்-புளிமா

திறந்/தது/- நிரைநேர்/புளிமா

கண்/டு- நேர்பு- காசு

நிரையிலும் காயிலும் முடிந்த சீர்களெல்லாம் நேரில் தொடங்குவதையும், நேரில் முடிந்த சீர்களை அடுத்து வருபவையெல்லாம் நிரையில் தொடங்குவதையும் பார்க்கலாம்.வெண்பா எழுதும்போது கவனிக்கவேண்டிய பொதுவான சிலகருத்துக்கள்:

#வெண்பாவுக்குப் பொழிப்பு மோனை வருதல் சிறப்பு.

ஓரடியின் முதற்சீரும் மூன்றாம் சீரும் ஓரினிவெழுத்துகளால் அமைய வேண்டும்.

மேற்கண்ட பாடலில்,

"கள்வடியும் பூவிதழ்க் காரிகையைக் கைகளில்

அள்ளினேன் பந்துபோல் அப்படியே - துள்ளும்

இதழில் கவிதை எழுதினேன் சொர்க்கக்

கதவும் திறந்தது கண்டு"

வண்ணமிட்டுக் காட்டப்பட்டவை பொழிப்பு மோனையாகும்.

#எதுகை நயம் பெறாது வருதல் வெண்பாவுக்கு அழகன்று!அடியின் முதற்சீரில் இரண்டாமெழுத்து ஒன்றி வரத் தொடுப்பது எதுகையாகும். பாடலைப் பாருங்கள்!

"கள்வடியும் பூவிதழ்க் காரிகையைக் கைகளில்

அள்ளினேன் பந்துபோல் அப்படியே - துள்ளும்

இதழில் கவிதை எழுதினேன் சொர்க்கக்

கதவும் திறந்தது கண்டு"

நேரிசை வெண்பாவினிரண்டாம் அடியின் இறுதியில் வரும் தனிச்சொல்முதற்சீரின் எதுகையைப் பெறுதல் வேண்டும்.

#செப்பலிசை என்பது இருவர் உரையடிக் கொள்ளுதல் போன்று அமையும்.வெண்பாக்களை வாய்விட்டு ஓசை நயத்துடன் பலமுறை சொல்லச் செப்பலிசை புலப்படும். அதனை உணர்ந்த பிறகு, செவிகளால் கேட்பதன் மூலமே ஒரு வெண்பாவானது தளை தட்டுகிறதா, பிழையில்லாமல் பாடப்பட்டுள்ளதா எனக் கண்டுகொள்ளலாம்.

#மூவசைச் சீரின் இரண்டாம் அசையானது, 'விளாம்' ஆக வரக்கூடாது.வரின் ஓசை சிதையும்.

சான்று:- போய்/விடா/மல்/-நேர்நிரைநேர்-கூவிளங்காய்

இது வெண்பாவில் வரக்கூடாது.

'விடா' என்பது குறில் நெடில் இணைந்த நிரையசை. இத்தகைய நிரையசை இயற்சீரில் வரலாம்.வெண்சீர் என்னும் மூவசைச்சீரின் இடையில் வரக்கூடாது.நாம் சான்று காட்டிய பாடலில், கா/ரிகை/யை/- என்னும் மூவசைச்சீரின் ரிகை என்பது குறில் நெடில் இணைந்த நிரையசை தான் எனினும், இங்கு என்பது குறுகி ஒருமாத்திரை யளவினதாய் ஒலித்து ஐகாரக் குறுக்கமாகிவிடுவதால், செப்பலிசை சிதைவதில்லை.

#விகற்பங்கள், மோனை, எதுகைவகைகள், ஆசு முதலியவற்றையும்வெண்பாவின் வகைகள் மற்றும் இனங்கள் ஆகியவற்றையும் யாப்பருங்கலக் காரிகைப் பாடல்களை நாம் ஒவ்வொன்றாக விளக்குகையில் கண்டுகொள்லலாம்.

#நளவெண்பாவை நான்குமுறை படிக்க வெண்பா எளிதில் கைவரப் பெறும்.முன்னர்ச்சொன்ன "சூரல் பம்பிஒய சிறுகான் யாறு" நூலில் வெண்பாவின் இலக்கணத்தை வெண்பாவிலேயே பாடியிருக்கிறேன்.மேலும் வெண்பா தவிர அனைத்துப் பாக்கள் மற்றும் பாவினங்களையும் இலக்கண விள்க்கத்துடன் பாடியுள்ளமை கண்டுகொள்ளலாம்.

# வெண்பா எழுதுவதும் ஒரு கணித சூத்திரம் போலத்தான். நுட்பமான அழகுடையது வெண்பா.புலமை கைக்கூட எளிதாகும்.

கோழிவறுத்த கறியின் சொல்லாட்சி!

சென்ற வாரத்திலொருநாள் கோயம்புத்துர்ரின் புகழ்பெற்ற உயர்தர அசைவ உணவகமொன்றின் 'மெனு கார்டில்' 'கோழி வறுத்த கறி' என்ற ஓர் அயிட்டத்தைப் பார்த்தேன். வறுத்த கோழிக்கறி என்பதைப் பலமுறை கேள்விப்பட்டிருக்கிறேன்;விரும்பிச் சுவைத்துமிருக்கிறேன். ஆனால் , கோழி வறுத்த கறி என்பதை இங்கு பார்த்துச் சற்றுக் குழம்பி விட்டேன். சமையல்காரர் வறுத்த கறியா அல்லது கோழியே வறுத்த கறியா என்னும் குழப்பம் ஏற்பட்டாலும் , சிக்கன் மசாலா, சிக்கன் 65, பெப்பர் சிக்கன் , ஜிஞ்சர் சிக்கன், பட்டர் சிக்கன், சில்லி சிக்கன் வகையறாக்களையே மெனுகார்டில் பார்த்துப் பார்த்துக் கண்களும் , நாக்கும் புளித்துச் சலித்து அலுத்துப் போயிருந்ததால், கோழி வறுத்த கறி என்ற பெயரே நாவில் 1/2 காலன் நீரை ஊற்றெடுக்கச் செய்து விட்டது. ஆணையிட்டதும் (ஆர்டர் செய்ததும்) அடுத்த அரை மணிநேரத்தில் ஆவிபறக்க அள்ளி வந்து ( அடேங்கப்பா .... எத்தனை 'அ') மேசையில் வைத்தார். உறைப்பும் கார்ப்பும் நாவைச் சுண்டியிழுத்தன. நிற்க......

'சிக்கன்' என்ற சொல் தமிழ்ச் சொல்லாகிப் பலநாட்களாகி விட்டன. கவிப்பேரரசு சொன்னது போல 'கார்' 'சிக்கன்' போன்ற சொற்கள் தமிழின் எழுத்திலகணத்துக்குட்பட்டு , தமிழே போல ஒலிப்பதால் , இவற்றைத்தமிழ்ச் சொற்களாகக் கருதிச் சொற்களஞ்சியம் பெருக்கலாம் என்று தோன்றுகிறது.

மகிழ்வுந்து என்பது சற்றுச் சுற்றி வளைத்துச் சொல்வது போல வசீகரமற்றுத் தொனிக்கிறது. ஆனால் 'பஸ்' என்னும் சொல் தமிழ்ச்சொல்லாக முடியாது. பேருந்து என்பதே சரியான வடிவம் . 'ஸகர' எழுத்துகள் கிரந்தமாக இருந்தாலும் அவற்றின் வரிவடிவமின்றி ஒலி வடிவத்தைத் தமிழின் 'சகர' எழுத்துகளே நிரப்பிவிடுகின்றன. 'காசு', 'பசை', 'இசை','பசு'.... எனச் சொல்லிப் பாருங்கள்! அதே போலத்தான் 'காகம் ' என்று சொல்கையில் 'KAA' 'HA' Mஎன்று ஒலிக்கும். கிரந்த எழுத்துகளின்றியே தமிழின் இலக்கியங்கள் படைக்கப் பட்டுள்ளன என்பதுவே தமிழின் வளத்துக்குச் சான்று.

அண்மையில் பாலக்காடு சென்றிருந்தேன். கேரளா எனது விருப்பமான இடம் என்பதாலும், கூப்பிடு தூரம்தான் என்பதாலும் அடிக்கடிச் செல்வதுண்டு. கேரள உணவு வகைகள் மீதும் எனக்குமிகப்பெரும் நாட்டம் உண்டு. பேரரசிச் சோற்றை மீன்குழம்பில் ஊறவைத்துத் தின்பதின் சுவை அலாதியானது. பாலக்காட்டின் உணவகம் ஒன்றில் உணவருந்திக் கொண்டிருந்த போது, குழம்பை முடித்து விட்டு ரசத்துக்கு வாங்கும் போதும், உண்டு முடித்துத் தொகை செலுத்தும் போதும், அவர்களது " சோறு வேணுமா?","ரெண்டு சோறு எண்பது ரூபா!" என்ற சொற்பயன்பாடுகள் காதுகளுக்கு இனிமையாக இருந்தன.

தமிழ் குறையும் நல்லுலகை மன்னிக்கவும் தமிழ் கூறும் நல்லுலகை நினைத்துப் பார்த்தேன் !'சோறு' என்ற சொல் அநாகரிகமான சொல்லாகிப் பல்லாண்டுகளாகிவிட்டன. உணவகங்களில், " கொஞ்சம் ரைஸ் வைங்க", "சாப்பாடு தயார்" , "சாப்பாடு இருக்கா?" என்பன போன்ற உரைகளைத் தான் கேட்க முடியும்!

சாப்பாடு என்பது நாகரிகம் என்றும், ரைஸ் என்பது அதிநாகரிகம் என்றும் சோறு என்பது அநாகரிகம் என்றும் ஆழப் பதிந்துவிட்டன நம்மவர்களது மனங்களில்!

"சுத்தம் சோறு போடும்"

"சோழநாடு சோறுடைத்து"

"தேடிச் சோறு நிதந் தின்று"

"வயிற்றுக்குச் சோறிடல் வேண்டும்"

என்பன போன்ற வரிகளை நினைத்து இன்புறலாம்."சோறுண்டான், சோறள்ளித்தின்றான், சோறும் குழம்பும் சுவையாய் இருந்தன"

இவற்றையெல்லாம் சொல்லிப்பாருங்கள்! சொல்லவே சுவை பெருகும்!!

"உமிகொண் டரிசி துறப்பான் - தமிழின்

உலகப் பெருமை மறப்பான்.

தமிழா உன்றன் தலைவிதி மாற்றத்

தரணியில் எவனினிப் பிறப்பான்?"

நன்றி நன்றி நன்றி!

எளிய தமிழ் இனியதமிழ்

2011-10-16T00:13:00.001-07:00

நபர் ஒன்றுக்கு...
இதில் என்ன பிழை உள்ளது எனக் கண்டுபிடித்துப் பின்னூட்டமிடுங்கள்

தூய தமிழ்ச்சொற்கள்

2011-10-13T20:32:00.000-07:00

அர்த்தம் - பொருள்
நிர்மூலம் - அழித்தல், வேரறுத்தல்
பாஷை - மொழி
பரீட்சை - தேர்வு
நபர் - ஆள்
துக்கம் - துன்பம் , துயரம் , வருத்தம்
கோஷம் - முழக்கம்
கோஷ்டி- குழு,அணி
தாலுகா - வட்டம்
தினம் - நாள் . பகல்

இனிய தமிழ்ச்சொற்களை அறிந்து தூய மொழியினைப் பயன்படுத்துவோம்.

காசாளரின் கையொப்பம்!

2011-10-13T06:41:00.000-07:00

நல்ல தமிழைப் பயன்படுத்துவோம்

அண்மையில் வங்கி ஒன்றுக்குச் சென்றிருந்தேன்.அங்கு கண்ட சொற்றொடர்களில் சில!

#தங்க நாணயங்கள் 2,4,8,10,20,50,100 கிராம்களில் கிடைக்கிறது.

#பணம் செலுத்திய ரசீதுகளில் காசாளர் மட்டுமின்றி , வங்கி அதிகாரியின் கையொப்பம் இருக்க வேண்டும்.

மேற்காண் தொடர்களில், தங்க நாணயங்கள் கிடைக்கின்றன எனப் பன்மையில் எழுதினால் எவ்வளவு இனிமையாக இருக்கும்.ஆங்கிலத்தில் எழுதும் போது எந்த மடையனும்"COINS IS AVAILABLE" என்று எழுத மாட்டான்.

அதேபோல இரண்டாம் தொடரைப் பார்ப்போம்.

காசாளரின் கையொப்பம் மட்டுமின்றி வங்கி அதிகாரியும் கையொப்பம் இடவேண்டும் என்றோ, வங்கி அதிகாரியின் கையொப்பமும் இருக்கவேண்டும் என்றோ வந்தால் எப்படி இருக்கும் எனச் சற்றே சிந்திப்போம். இங்கு சொற்றொடரின் அமைப்பை மட்டுமே பேசுகிறோம், அதிகாரி என்ற தமிழல்லாத சொல்லை அன்று.

எவ்வளவு அடிச்சாலும் தாங்குதே, மெய்யாலுமே தமிழ் நல்ல மொழிதான்.

நான் ஏன் தமிழ் நாளிதழ்கள் படிப்பதில்லை?

2011-09-29T06:07:00.000-07:00

எனக்கு ஒன்று மட்டும் புரியவே இல்லை!ஆங்கிலத்தில் பேசும்போதோ, எழுதும் போதோ இலக்கணம் கெட யாரும் பேசுவதுமில்லை, எழுதுவதுமில்லை. அவ்வாறு நிகழ்ந்தாலும் அதனைக் கேட்பவரும் படிப்பவரும் தவறு என உணர்ந்துகொள்கின்றனர். அதனைத் தவறு என ஒப்புக்கொள்ளவும் செய்கின்றனர்.பிழைகளைத் தடுக்கவும் தவிர்க்கவும் இருபக்கங்களிலும் முயற்சிகள் மேற்கொள்ளப்படுகின்றன. ஆனால் தமிழில் எளிய இலக்கணம் கூட மீறப்படும்போது அதனை யாரும் கண்டு கொள்வதில்லை. நாம் தவறாகப் பேசியிருக்கிர்ரோம் அல்லது எழுதியிருக்கிரோம் என்ற சொரணை பேசியவருக்கோ அல்லது எழுதியவருக்கோ ஏற்படுவதே இல்லை.

வாசிப்பவருக்கும் அதனை உணரக்கூடிய திராணி இல்லை எனத் தோன்றுகிறது. சான்றுடன் சொல்ல வெண்டுமானால், நாளிதழ்களை எடுத்துக் கொள்கிறேன். தமிழ் நாளிதழ்களில் வந்த செய்திகளை மேற்கோள் காட்டினால்:

"தகவல்கள் வந்து கொண்டிருக்கிறது"

"உள்ளாட்சி தேர்தல்"

"சாப்பிட மறுத்து போராட்டம்"

"தகவல்கள் வந்து கொண்டிருக்கின்றன"

"உள்ளாட்சித் தேர்தல்"

"சாப்பிட மறுத்துப் போராட்டம்"

என்று வரவேண்டிய சொற்றொடர்கள் அவை!

ஆனால் ஆங்கிலத்தில்

"PRANAB WRITE TO PM", (pranab writes to pm)

என்பது போல எழுதப்பட்டு நான் பார்த்ததே இல்லை.அவ்வாறு எழுதினால் அவ்விதழின் "சர்க்குலேஷன்" ஒரேவாரத்தில் என்னவாகும் என்று அவர்களுக்குத் தெரியும். அவர்களுக்கு அவ்வாறு எழுதவும் வாராது. ஆனால் தமிழின் நிலைமையை நினைத்துப் பார்த்தால் உணமையாகவே பாவமாக இருக்கிறது. பெரும்பாலான் செய்திகளிப் பிழையாகவே எழுதுவதன் காரணங்களைச் சிந்தித்துப் பார்த்தேன்.:

தமிழில்

#எப்படி எழுதினாலும் பொருள் புரிந்துகொள்ள முடியும், அந்த அளவுக்குத் தமிழில் நெகிழும் தன்மையும், வலிமையும் உள்ளது என நினைத்திருகலாம்..

#படிப்பவர்கள் எல்லாம் கோமாளிகள் என்றும் கூமுட்டைகள் என்றும் நினைத்திருக்கலாம்.

#எழுதுபவர்கள் எல்லாரும் எட்டாங்கிளாசைத் தாண்டாதவர்களாக இருக்கலாம்.

#இலக்கண சுத்தமாக எழுதினால் உடம்பில் சொறி , சிரங்கு வந்து விடும் என்பன போன்ற மூடநம்பிக்கைகள் காரணமாக இருக்கலாம்.

#"மேட்டர் புரிஞ்சாப் போதாதா" என்ற மனநிலைக்கு வந்துவிட்ட வாசகர்களுக்கு இதுவே போதும் என நினைத்திருக்கலாம்.

#"எழுதப்பட்டுள்ளது தவறு" எனப் புரிந்து கொள்ள முடியாத அளவுக்கு வாசகர்களிருக்கிறார்கள் என நம்பியிருக்கலாம்.

வேறு காரணங்களாகக் கூட இருக்கலாம். என் சிற்றறிவுக்கு எட்டியவை இவைதாம்.

நாம் அவர்களை வெண்பாவும் மருட்பாவும் பாடச் சொல்லவில்லை.

"எடுத்து தந்தான் " என்பதை

"எடுத்துத் தந்தான் " என்றும்

"சரக்கு கப்பல்கள் வந்து சேர்ந்தது " என்பதை

"சரக்குக் கப்பல்கள் வந்து சேர்ந்தன " என்றும் எழுதினால் போதும் என்றுதான் சொல்ல வருகிறோம்.

நாளிதழ்கள் பல்லாயிரம் மக்களைச்சென்று சேர்கின்றன.நல்ல தமிழை விதைப்பதில் நாளிதழகளுக்கும் பெரும்பங்கு இருக்கிறது.நாளிதழில் இருந்துதான் எனது வாசிப்புப்பழக்கம் 5 வயதில் தொடங்கி இன்றி விரிவடைந்துள்ளது.நாளிதழ் ஒன்றின் நிறுவனர் ஒருவரிடம் ஏன் உங்கள் இதழில் இவ்வளவு சந்திப்பிழைகள் இடம் பெறுகின்றன எனக் கேட்டார்களாம். அதற்கு அவர் ,"எங்களது செய்திகள் எளிய மக்களையும் சென்று சேரவேண்டும் என்பதுதான் நோக்கம், இலக்கணம் கற்பிப்பதல்ல" என்றாராம்.

எளிய மக்கள் இலக்கணம் வேண்டாம் என்றோ, எளிய தமிழை இனிமையாக இலக்கண சுத்தமாக இருந்தால் படிக்கமாட்டோம் என்றோ எப்பொழுது சொன்னார்களோ தெரியவில்லை.ஒருகட்டத்தில் வெறுத்துப்போய்த்தான் இன்று ஆங்கில இதழ்களை மட்டும் வாசித்து வருகிறேன். TIMES OF INDIA, THE HINDU, DECCAN CHRONICLE, THE NEW INDIAN EXPRESS ஆகிய நான்கு ஆங்கில நாளிதழகள் கோயம்புத்தூரில் அச்சாகின்றன.பெரும்பாலும் நான்கையும் வாங்கி ஏதேனும் ஒன்றை ஆழமாகவும், மற்றவற்றை மேலோட்டமாக்வும் படிக்கிறேன்.இது ரொம்ப ஓவராக இல்லையா என்று ஒரு சிலதுகள் கேட்கத்தான் செய்கின்றன. உலக நடப்புகளை அறிவது முக்கியமில்லையா எனக் கேட்கின்றனர்.

ஆங்கில நாளிதழகள் மூலாமாக அறிந்துகொண்டால் போதும் என்று சொல்லிவிட்டேன்.. தமிழ்தான் எமது உலகம். வேறு உலகத்தைப் பற்றித் தரங்கெட்ட தமிழில் தெரிந்துகொள்ல வேண்டியதில்லை. மயிர்நீப்பின் உயிர்வாழாக் கவரிமான் இனமிது.

ஐநூறா ஐந்நூறா ?

2011-09-27T00:42:00.000-07:00

ஐநூறா ஐந்நூறா ?

ஐநூறு என்று எழுதுவதா ஐந்நூறு என்று எழுதுவதா என்ற குழப்பம் இன்று நம்மில் பலருக்கும் உள்ளது.
தமிழுக்கு இலக்கணம் வகுத்துத்தந்த தொல்காப்பியத்தையே இங்கு எடுத்துக்கொள்கிறோம்.

"நூறு முன் வரினும் கூறிய இயல்பே" (தொல்காப்பியம்,எழுத்ததிகாரம், குற்றியலுகரப் புணரியல், நூற்பா எண் 460)

இதன் பொருள் யாதெனில் , ஒன்று முதல் ஒன்பது வரை உள்ள எண்களின் முன்னால் நூறு என்ற எண் வரும்போது , பத்து என்ற எண்ணுக்கு என்ன இலக்கணம் கூறப்பட்டதோ அதுவே பொருந்தும் என்பதாகும்.462 ஆம் நூற்பாவில் "நான்கும் ஐந்தும் ஒற்றுமெய் திரியா" என்று தொல்காப்பியர் கூறுவதால் ,
ஐந்து + நூறு = ஐந் + நூறு ( 460 ஆம் நூற்பாவின்படி 'து' கெட்டது)
=ஐந்நூறு (462 ஆம் நூற்பாவின்படி 'ந்' என்ற ஒற்று திரியாமல் அப்படியேநின்றது.)

ஆக, இந்திய ரூபாய் நோட்டில் உள்ளது போல "ஐந்நூறு"என்பதே சரியெனத் துணியலாம்.நமக்கெல்லாம் ஃபை ஹ‌ன்ட்ரட் என்று சொன்னால்தான் சோறு இறங்கும் என்பவர்களுக்கு இப்பதிவு தேவையில்லை!

முத்தத்துவம் - மூன்றாம் பகுதி

2011-09-26T07:17:00.000-07:00

கோவைப் பழச்சிவப்புக் கொஞ்சும் இதழ்கொண்ட
பாவையைக் கொஞ்சமாய்ப் பார்த்தாலே - சாவையும்
வாரி அணைத்திடுவேன் வாழ்வில் இனியும்நான்
சேர எதுவுண்டு செப்பு!

கொத்துச் சுளையாய்க் குவிந்த குலையிதழைக்
கொத்திச் சுவைத்துக் குடிக்கையில் - மெத்தைமேல்
வித்தை புரிந்தாள் விதவிதமாய் என்னுடன்
அத்தை மகள்தான் அணைத்து!

பதமாய்ப் படர்ந்தாள் பரவசந் தந்தாள்
மிதமாய் இதழிசை மீட்டி - முதலில்
இதமாய்த் தழுவினாள்; இன்னமு தூறும்
இதழால் சிறைசெய்தாள் ஈர்த்து!

தொட்டுச் சுவைத்தேனத் தோகையின் செவ்வருந்தேன்
சொட்டும் இதழின் சுகத்தினை - விட்டேனா
கொட்டினேன் கன்னத்தில் கோடிமுத்தம் கேளுங்கள்
கட்டிலும் வெட்கியது கண்டு

போதும் இறைவா புவியில் வரமாக
ஏதுமினி வேண்டாம் எனக்கென - மாதவள்
ஒற்றைச் சிறுமுத்தம் இட்டாளே அப்போதே
பெற்றேன் பிறப்பின் பயன்!

முனைவர் ஆலந்தூர் மோகனரங்கன் - ஒரு சமகால ஆளுமை

2011-09-25T23:14:00.000-07:00

சென்ற வாரத்தில் தமிழின் முதுபெரும் கவிஞரும், தமிழாய்ந்த புலவருமான முனைவர் ஆலந்தூர் . திரு . மோகனரங்கன் அவர்கள் எனக்கு அவருடைய நூல்களில் நான்கை அன்பளிப்பாக அனுப்பி வைத்திருந்தார்.அவற்றுள் வண்ணச்சரபம் தண்டபாணி அடிகளாரைப் பற்றிய சிறப்பாய்வு நூலான தமிழ்க்கவிதைகளில் சந்த அமைப்பு என்ற நூலைக் கடந்த ஆண்டு கோயம்புத்தூரில் நடந்த செம்மொழி மாநாட்டுப் புத்தகக் கண்காட்சியில் வாங்கியிருந்தேன். ஆழமான ஆய்வு நூலது. அவரது "பிறர் வாழப் பிறந்தவர்கள்" என்றநூலை இன்று படித்து முடித்தேன்.

படிக்கப்படிக்க இனிக்கும் பாக்கள் நிரம்பிய அந்நூலில் மரபானது அவருக்கு எவ்வளவு இயல்பாக வாய்த்திருக்கிறது என்பதை உணர முடிந்தது.தங்குதடையின்றிப் பாயும் அருவிபோலச் சொற்கள் வந்து விழுந்திருக்கின்றன.. என்னைப் போன்ற மரபு ஆர்வலர்களுக்கு இந்நூல் ஓர் உந்துதலாகவும், வழிகாடியாகவும் இருக்கும். நான் சுவைத்து மகிழ்ந்த பாக்களை இங்கு பகிர்ந்து கொள்கிறேன்.

காசும் பிறப்புமாய் முடிந்த குரள் வெண்பாக்களாலான "திருவள்ளுவர் ஒரு பூந்தமிழ்த்தோட்டம்" என்ற முதற்பாடல் வெகு அருமை.

"பொய்யைப் பிளந்து" என்ற சொற்பயன்பாடு பாரதியாரை நினைவுக்குக் கொண்டு வந்து நிறுத்துகிறது.இப்பாக்களைப் படித்ததும் திருவள்ளுவமாலை படித்த நிறைவு கிட்டியது.வெறுமனே மனப்பாடம் செய்தால் போதாது என்று விருத்தத்தால் விளக்கிய பாங்கு அழகு.

எனது அதிவிருப்பக் கவிஞர் பாரதியைப் பற்றி எழிதிய நேரிசை வெண்பாக்களை மிகவும் ரசித்தேன். "அச்சத்தை எச்சரித்தான் ஆற்றலை உச்சரித்தான்" என்ற வரிகல் இனிமையும் வலிமையுமானவை. அதே பாவகையில் பாரதிக்குத் தாசனையும் பாடுய பாங்கு படிக்கப் பரவசமாய் இருந்தது.

"பண்பின் துணை காந்தியடிகள்" என்ர தலைப்பில் எழிதிய குறள்வெண்செந்துறையில் அண்ணலின் அமைதி நெறியையும், அன்பு நெறியையும் உணர்த்தியவிதம் அருமை.

"சின்னப்பா செய்தா யப்பா

சிறுபாப்பா சிரித்த தப்பா

என்ன்பப்பா அந்த விந்தை

எழுந்துநீ சொல்லு வாயா?"

என்று அழ.வள்ளியப்பாவை வினவியது தேனாய் இனிக்கிறது.

மழலைமொழி மாறாத வயதிலேயே அழ.வள்ளியப்பாவை அறிந்து வளர்ந்த தமிழ்ச் சமிதாயம் அல்லவா இது? தமிழின் இனிமையையும் அருமையையும் அறியாப் பருவத்திலேயே அறியச் செய்தவர் அழ. வள்ளியப்பா.

அண்ணா., கலைஞர், பெரியார், எம்.ஜி.ஆர்., என எத்தனையோ செம்மல்கலை எழிலுடன் பாடியிருக்கிறார்.வைரமுத்துவின் வார்த்தைகளில் சொல்வதானால், நுரைத்துக் கொண்டோடும் விருத்தங்களும் சுழித்துக் கொண்டோடும் வெண்பாக்களும் நிரம்பித் ததும்பும் இந்நூல் மிக அருமையானது.

மரபுக்கவிதையின் விந்தையை விரும்புபவர்கள் இந்நூலை மிகவும் ரசிப்பார்கள்!

அன்புத் தமிழர்களே, ஒரு நொடி நில்லுங்கள்.

2011-09-25T07:38:00.000-07:00

தமிழில் கலந்து விட்ட பிறமொழிச் சொற்களை நம்மில் பலரும் தெரியாமலேயே பயன்படுத்துகின்றனர்.தூய தமிழ்ச் சொற்கள் இருக்க நாம் ஏன் பிறமொழிகளிடம் கையேந்த வேண்டும்? பிற மொழிகள் வேண்டாம் என்று சொல்லவில்லை. அவற்றைத் தமிழில் கலக்க வேண்டாம் என்றுதான் சொல்கிறோம்.இனிய தமிழ்ச் சொற்களைப் பயன்படுத்திப் பாருங்கள்.எவ்வளவு இன்பமாக இருக்கும் என்பதை உணர்வீர்கள். எனக்கு உடனடியாக நினைவில் வந்தவற்றை மட்டும் இங்கு பட்டியலிட்டுள்ளேன். பிழைகள் ஏதேனும் தென்பட்டால் சுட்டிக்காட்டுங்கள்.
போஜனம் - உணவு, உண்டி
மகசூல் - விளைச்சல்
ஞானம் - அறிவு
ஞாபகம் - நினைவு
ஞாபகசக்தி - நினைவாற்றல்
சூரியன் - ஞாயிறு, கதிர், கதிரவன் , வெய்யோன்
சேவை - தொண்டு , பணி
சமுத்திரம் - கடல் , ஆழி, வேலை, முந்நீர்
கேசம் - மயிர், கூந்தல் .முடி
வியாதி - நோய், பிணி
ருசி - சுவை

யுத்தம் - போர், சண்டை. பொருதல்
பிரதானம் - முதன்மை
பயம் - அச்சம்
சரித்திரம் - வரலாறு
பரிசுத்தம் - தூய்மை
யாகம் - வேள்வி
ரகம் - வகை, வகுப்பு, பிரிவு, இனம்
ரசம் - சாறு
தானம் - கொடை
திலகம் - பொட்டு

(தொடரும்.......)

என் நோவு அறியாய்!

2011-09-23T23:19:00.000-07:00

ஒருநாள் உணவை ஒழிஎன்றால் ஒழியாய்
இருநாளுக் கேலென்றா லேலாய் - ஒருநாளும்
என்நோ வறியாய் இடும்பைகூ ரென்வயிறே
உன்னோடு வாழ்த லரிது.

இன்று உணவு கிட்டவில்லை, ஒருநாள் மட்டும் பொறுத்துக்கொள் என்றால் கேட்டுத் தொலையாது.இன்று மிகுதியாக உணவு கிட்டியுள்ளது, இரண்டு நாள் உணவை ஏற்றுக்கொள் என்றாலும் அதனால் முடியாது.உணவைப் பெறுவதற்கு நான் படும் பாட்டை உன்னால் அறிந்து கொள்ள முடியாது. உன்னோடு சேர்ந்து வாழ்தல் எனக்கு மிகவும் அரிய செயலாக இருக்கிறது.

வாழ்வியல் தத்துவமும், நையாண்டியும், அங்கதமும் பெருகிவழியும் இந்த நேரிசை வெண்பாவில் ஔவைப் பாட்டி யாரைக் குறிப்பிடுகிறார் என்று தெரிகிறதா? ஒருசாண் வயிற்றைத்தான் இவ்வாறு கூறுகிறார். உண்மைதான், எப்பேர்ப்பட்ட பேராசைக்காரனும் போதும் என்று சொல்லக்கூடிய ஒரே பொருள் உணவுதான்.
சத்திய சோதனையில் காந்தியடிகள் கூறுவார், இவ்வுலகில் உள்ள அனைவருக்கும் போதுமான் அளவு
எல்லாமே உள்ளது. ஆனால் தனிப்பட்ட ஒருவனின் பேராசைக்கு அது போதாது என்று. எவ்வளவு அழகான பாடல் , அழகான கருத்து. ஔவை மொழி அமுத மொழிதான்.

காலவரையற்ற.......

2011-09-22T19:53:00.000-07:00

காலவரையற்ற

பயன்பாட்டில் சுருங்கி, ஒலிப்பில் நொறுங்கித் தமிழனின் வாய்களிலும் கைகளிலும் சிக்கிச் சீரழியும் தமிழ்ச்சொற்களின் பரிதாபப் பயன்பாடுகளுள் மேற்கண்டதும் ஒன்று.

காலவரையறையற்ற என்ற சொற்பயன்பாடுதான் இன்று கால வரையற்ற என்று புழங்கிவருகிறது. விகடனில் மதனிடம் மீனா ஐயர் என்றொருவர் கேட்ட கேள்வி நினைவுக்கு வருகிறது. காலவரையற்ற எனபதுகூட நாளை என்னவாக உலவப்போகிறதோ? இணையத்திலாவது தமிழை வாழவைப்போம்!

முத்தத்துவம் -இரண்டாம் பகுதி

2011-09-22T19:12:00.000-07:00

முத்தத்துவம் என்ற தலைப்பில் எனது சூரல் பம்பிய சிறுகான்
யாறு நூலில் நான் எழுதிய முப்பது வெண்பாக்களை ஐந்தைந்து பாக்களாகப் பதிவேற்றுகிறேன். இது இரண்டாம் ஐந்து பாக்கள்!

பாகிடை ஊறும் பழக்கீற் றுதட்டாளே
போகிறது மெல்லப் பொழுதெலாம் - ஆகவே
புத்தம் புதுப்பூவே போதும் அணைத்தென்னை
முத்த்தத்தால் காதல்தீ மூட்டு!

கள்வடியும் பூவிதழ்க் காரிகை யைக்கைகளில்
அள்ளினேன் பந்துபோல் அப்படியே - துள்ளும்
இதழில் கவிதை எழுதினேன் சொர்க்கக்
கதவும் திறந்தது கண்டு!

மதுவூறும் மல்லிகையோ மன்மதனின் அம்போ
அதுதேவர் தந்த அமுதோ - இதழ்தான்
அடடா அடடா அருந்தி மயங்கிக்
கிடந்தேன் கிறங்கிக் கிளர்ந்து!

பனிமுத்தம் இட்டாள் பளிங்குச் சிலையாள்
இனிப்புத்தேன் சொட்டும் இதழால் - இனியென்

பிணிதீரும் ஏழு பிறப்பிலுமம் முத்தம்
மனத்துயர் போக்கும் மருந்து!

பத்துமுறை மண்ணில் பிறந்தாலும் தேன்முத்தத்
தித்திப்பென் றுஞ்சென்று தீராது - புத்தியில்
நித்தமும் அந்த நினைவேதான் நீதந்த
முத்தத்தில் வாழ்கிறதென் மூச்சு!
(தொடரும்)

ஒரே ப்ரௌசரில் ஒரே நேரத்தில் ஒன்றுக்கு மேற்பட்ட ஜிமெயில் கணக்குகளில் நுழைவது எப்படி?

2011-09-21T07:55:00.000-07:00

நம்மில் சிலர் ஒன்றுக்கு மேற்பட்ட ஜிமெயில் கணக்குகள் வைத்திருக்கலாம். சான்றாக நானே ப்ளாக்கருக்கு ஒன்றும், தனிப்பட்ட பயன்பாட்டுக்கு ஒன்றுமாக இரண்டு கணக்குகள் வைத்திருக்கிறேன். இரண்டையும் ஒரே நேரத்தில் பயன்படுத்த முடியாத நிலையில் சில நேரங்களில் கடுப்பானதும் உண்டு. ஜி மெயில் செட்டிங்ஸை நோண்டிக் கொண்டிருக்கையில் அதற்குத் தீர்வு கண்டுபிடித்தேன். தெரியாதவர்களுக்குப் பயன்படுமே என்று பதிவேற்றுகிறேன்.

படிப்படியாகச் சொல்கிறேன்:
#எதாவது ஒரு ஜிமெயில் கணக்கினுள் நுழைந்து கொள்ளவும்.
#அக்கவுன்ட் செட்டிங்ஸ் (account settings) என்பதனைச் சொடுக்கவும். (மின்னஞ்சல் முகவரியின் மீது கர்சரை வைத்துச் சொடுக்கவும்)
#பர்சனல் செட்டிங்ஸ் (personal settings) என்ற கட்டத்தில் மல்டிபிள் சைன் இன் (multiple sign in)என்ற ஆப்ஷனுக்கு அருகில் உள்ள எடிட் (edit)என்பதச் சொடுக்கவும்.
#அடுத்துத் திரையில் தோன்றும் சன்னலில் On use Multiple Google Accounts in the same web browser எனபதினுள் நுழைந்து அனைத்து செக் கட்டங்களையும் தேர்ந்தெடுத்து சேமித்துக் கொள்ளவும்.
#இப்பொழுது கணக்கினை லாக் ஆஃப் செய்து விட்டு அடுத்த கணக்கினுள் நுழைந்து இதே போல் செய்து கொள்ளவும்.
#லாக் ஆஃப் செய்து விட்டு முதல் கணக்கினுள் நுழைந்து கொள்ளவும்.
#இப்பொழுது ஸ்விட்ச் அக்கவுண்ட் என்று புதிய ஆப்ஷன் ஒன்று மீனஞ்சல் முகவரியைச் சொடுக்கத் தொன்றியிருப்பதைக் காணலாம்.
#அதனைச் சொடுக்க இன்னொரு கணக்கினுள் நுழைய ஆப்ஷன் கொடுக்கப்பட்டிருக்கும்.
#அதனைச் சொடுக்க வழக்கமான ஜிமெயில் லாகின் பக்கம் தோன்றும்.

முயன்று பாருங்கள்!

பூமாலையை என்ன செய்யப்போகிறோம்?

2011-09-18T09:00:00.000-07:00

"அனைத்துக் கட்சிகள் இதில் கலந்து கொள்கின்றன."

இச்சொற்றொடர் நாம் அடிக்கடிக் கேள்விப்பட்ட , பயன்படுத்தும் ஒன்றாகும். . இதனைக் கீழ்க்கண்டவாறு மாற்றும் போது எங்ஙனம் செம்மையாக இருக்கிறது எனப் பாருங்கள்!

"இதில் கட்சிகள் அனைத்தும் கலந்து கொள்கின்றன."

தமிழ் ஓர் அழகான மொழி. நம் கையில் கிடைத்த பூமாலையை என்ன செய்யப்போகிறோம்?

(திரு.மா.நன்னன் அவ்ர்களிடம் கற்றது.)

முத்தத்துவம் -நேரிசை வெண்பாக்கள்

2011-09-18T00:14:00.000-07:00

முத்தத்துவம் என்ற தலைப்பில் முப்பது வெண்பாக்களை எனது "சூரல் பம்பிய சிறுகான் யாறு" நூலில் காணலாம். அவற்றை ஐந்தைந்து பாடல்களாகப் பதிவேற்றலாம் என்று முதல் ஐந்து பாக்களை இங்கு தருகிறேன். எனது நூலில் அதிகம் பாரட்டப் பெற்ற பாக்களுள் இதுவும் ஒன்று. முப்பதையும் படித்து முடித்த பிறகு முத்தமிட்ட உணர்வுக்கு ஆட்பட்டேன் என்று எனது நண்பர் ஒருவர் கூறியதை என்னால் மறக்கமுடியாது.

முத்தேயென் பொற்சிலையே மொட்டவிழ்நத மோகனமே
முத்தக் கவிதை மொழிகிறேன் - மொத்தக்
கதைசொலவுங் கூடுமோ கண்டாலே உன்னை
இதழ்சிவந்து போகும் எனக்கு!

முத்தமல்ல நானுனக்கு மூச்சுமுட்ட இட்டவை
அத்தனையும் அன்பின் அழியாத - முத்திரையாம்
சித்திரமாய்த் தீட்டினேன் செவ்விதழில் நான்கொண்ட
மொத்தக்கா தல்தன்னை மொண்டு!

முத்தமன்று நீயே முதன்முதலில் தந்தது
சொத்தெனக்கு வேறேன்ன சொல்லுவேன் - இத்தரையில்
பெற்றேனுன் முத்தப் பெரும்பே றதன்மூலம்
கற்றேன் எழுதக் கவி!

தேன்பாகில் ஊறும் திராட்சை உதடுகளை
ஏன்தான் படைத்தாய் இறைவனே - நான்கண்டு
கவ்விச் சுவைக்கத்தான் காலமெல்லாம் பாடுபட்டுச்
செவ்விதழைத் தந்தாயோ செய்து!

கரும்போ கனிச்சாறோ கற்கண்டோ பூவின்
அரும்போ இதழிரண்டும் ஐம்பொன் - உருவோ
அருந்தேனோ நானும் அருந்தேனோஎன்றும்
விரும்பிச் சுவைக்கும் விருந்து !
( தொடரும் )

பத்து வகைக் குற்றங்கள்

2011-09-17T05:00:00.000-07:00

நன்னூலார் வகுத்துத்தந்த பத்து வகை அழகு களை முன்னர்ப் பார்த்தோம். அவரே பத்து வகைக் குற்றங்களையும் பட்டியலிட்டுத்தந்துள்ளார். படைப்பாளிகளுக்கும் பதிவர்களுக்கும் இது பயன்படும். ஒன்றைச் சொல்லும்போது எவ்வாறு சொல்லக்கூடாது என்பதற்கு இவையெல்லாம் சான்றாகும்.
"குன்றக் கூறல் மிகைபடக் கூறல்
கூறியது கூறல் மாறுகொளக் கூறல்
வழூஉச்சொல் புணர்த்தல் மயங்க வைத்தல்
வெற்றெனத் தொடுத்தல் மற்றொன்று விரித்தல்
சென்று தேய்ந்திறுதல் நின்று பயன் இன்மை"

குன்றக் கூறல் -சொல்ல வேண்டிய அளவுக்கு இல்லாமல், குறைத்துக் கூறுவது
மிகைபடக் கூறல்-சொல்ல வேண்டிய அளவினைவிடவும் மிகுத்துச் சொல்வது
கூறியது கூறல்- சொன்னதையே திரும்பத்திரும்பச் சொல்லுதல்
மாறுகொளக் கூறல்-முன்னுக்குப் பின் முரணாகக்கூறுதல்
வழூஉச்சொல் புணர்த்தல் -பிழையான சொற்களைப் பயன்படுத்தல்
மயங்க வைத்தல்-குழப்பமான முறையில் கூறுதல்
வெற்றெனத் தொடுத்தல்-தேவையில்லாத அதிகப்படியான சொற்களைப் பயன்படுத்துதல்
மற்றொன்று விரித்தல்-சொல்லவந்ததை விடுத்து வேறொன்றைச் சொல்லுதல்
சென்று தேய்ந்திறுதல் -
செல்லச் செல்லப் பொருள் அடர்த்தி குறைதல்
நின்று பயன் இன்மை-பலசொற்களிருந்தும் பயனில்லாதிருத்தல்

அறிகை அறிக்கை அறிவிக்கை அறிவிப்பிக்கை அறிவிப்பு அறிவு

2011-09-17T04:15:00.000-07:00

அறிகை என்பது தன்வினை. அறிந்து கொள்ளுதல் எனப் பொருள்படும்.
அறிக்கை என்பது பிறவினை. அறியச் செய்தல் எனப்பொருள்படும்.
அதேபோல, அறிவிக்கை என்பது அறிவித்தல் என்னும் பொருளில் தன்வினையாக அமையும் . பிறரை அறிவிக்கச் செய்தல் என்னும் பொருளில் அறிவிப்பிக்கை என வந்து அதுவே பிறவினையாக நிற்கும்.
அறிவித்த அல்லது அறிவிக்கப்பட்ட பொருளை அறிவிப்பு என்றும். அறிந்து கொன்ட அல்லது அறியச்செய்த பொருளை அறிவு என்றும் சொல்வோம்.

மிதித்துவிட்டாவது போ!

2011-09-16T03:01:00.000-07:00

என்னை

இந்தப் பாடுபடுத்துகிறதே,

உயர்த்தி மடித்து

ஒருக்களித்துச் செருகிவைத்த

கொண்டையில்

அப்படி

என்னதான் வைத்திருக்கிறாய்?

நழுவி விரியாதா என்ற

நப்பாசையுடனும்,

பிரிந்து விட்டால்

பின்னி விடலாமே என்ற

பேராசையுடனும் நான்

வெறிபொங்கக் காத்திருக்கிறேன்!

ஒற்றை ரோஜாவுடன்

நீவரும் பாதையில்

காத்திருக்கிறேன்!

உனக்காகவே

உதித்த பூவை

மிதித்துவிட்டாவது போ!

சேலை நெய்யும் போதே

வெட்கத்தையும்

சேர்ந்து நெய்தார்களா

என்று தெரியவில்லை!

பிறகு

சேலை கட்டும் போது மட்டும்

வெட்கம் உனக்கு

எங்கிருந்துதான் வந்து

சேர்ந்து கொள்கிறது?

முயன்று பாருங்கள், முடியும்!

2011-08-27T06:28:00.000-07:00

பாடல் மூலமிங்கொரு வினாவெழுப்பியுள்ளேன். பாவகை மாறாமல் விடையிறுப்பீர் !

என்ன பெயரிட் டெழுதினா ரௌவையார்
தன்னூலுக் குநற் றலைப்பாக - நன்றி
எனத்தொடங்கும் பாட லிரண்டாவ திங்கே
உனக்குத் தெரிந்தா லோது!

கொல்லும் காதல்!

2011-08-27T02:02:00.000-07:00

மண்ணுலகில் நான்பிறந்த
மாயமென்ன அறிகிலேன்!
கண்ணைக்கட்டிக் காட்டில்விட்ட
கதியைநானும் அடைந்திட்டேன்!
பெண்ணொருத்தி என்மனத்தைப்
பிடித்துக்கொண்டு விட்டனள்!
கண்ணிரண்டும் பிதுங்குமளவு
கலங்கிநானும் சோர்ந்திட்டேன்!

சோறுதூக்கம் எதுவும்மறந்து
சோர்ந்துநானும் வீழ்ந்திட்டேன்!
கூறுபோட்டுப் பிளந்த இதயம்
கூவித்துடிக்க மாய்ந்திட்டேன்!
கூறுகெட்ட மடையனாகக்
கொஞ்சமாக மாறினேன்!
வேறுஎன்ன பைத்தியந்தான்
வெந்தும்,அனம் நொந்திட்டேன்!

அவள்நினைவைத் தவிரஎதுவும்
அணுவளவும் வரவில்லை!
அவளில்லாமல் என்னுடலில்
அரைநொடியும் உயிரில்லை!

பொழுதுவிடிந்த நிமிடம்முதல்
போய்ப்பார்க்கும் வெறியினில்
அழுதுபுரண்டு என்னிதயம்
அவளைத்தேடி ஓடிடும்!

பாவிமகள் மாயமந்திரம்
படித்தவளோ அறிகிலேன்!
தேவியவள் திருமுகத்தைத்
தேடிநானும் ஓடுகிறேன்!

பெண்ணுமல்லள் கொடியகாதல்
பேய்தானவள் சொல்கிறேன்!
என்னசெய்ய அய்யய்யோ
என்னையேநான் கொல்கிறேன்1

வா.. என்னில் வசிக்க!

2011-08-25T00:54:00.000-07:00

நீ குளித்தனுப்பிய
நதிநீரைக்
கடலில் கலக்கவிடும்
திட்டத்தின் பெயர்தான்
கடல் நீரைக் குடிநீராக்கும் திட்டம்!

காற்றில் அலையும்

உனது சேலைத்தலைப்பு

எனக்கான

கவிதைகளைக்

காற்றிலேயே விட்டுச் செல்கிறது!

அதுவரை

காற்றைச்

சுவாசித்து வாழ்ந்த நான்

இப்போது காற்றை

வாசித்தும் வாழ்கிறேன்!

உன்னைக் காணும்போதெல்லாம்
என் இதயம் குழம்பி விடுகிறது!
அமைதியின் உருவாக
இப்படி
அழகாக அமர்ந்திருக்கும்
இவள் எப்படி
எனக்குள் மட்டும்
அப்படி ஓர் ஆட்டம்
போடுகிறாள் என்று!

கொடியார் வாரீர்!

2011-08-23T23:33:00.000-07:00

தொலைக்காட்சி மற்றும் திரைப்பட்ங்களை விஷுவல் மீடியம் என்று சாதாரணமாகச் சொல்லிவிடுகிறோம். ஆனாலும் இலக்கியத்தில் கிடைக்கும் இன்பமே அலாதிதான். நளவெண்பாவில், நளன் தமயந்தியின் நினைவால் தன் நெஞ்சம் துடிதுடிக்க நெடுமூச்செறிந்து தளர்வுற்றுப் புலம்புவதைக்கேளுங்கள்!
"பூங்கொடிகளே!இளமையான தமயந்தியின் கச்சணிந்த முலைகளைத் தாங்கிப் பிடித்துத் துவளும் இடைக்கு உவமையாகப் பிறந்துள்ளவர்களே! என்னருகே வாருஙக்ள்"
எனக் கைகூப்பிக் கூப்பிடுகிறான்.

"வாரணியும் கொங்கை மடவார் நுடங்கிடைக்குப்
பேருவமை யாகப் பிறந்துடையீர் - வாரீர்
கொடியார் எனச்செங்கை கூப்பினான் நெஞ்சம்
துடியா நெடிதுயிராச் சோர்ந்து"
(நளவெண்பா- 50)

இடைதான் எவ்வளவு மெல்லியது!" நூலவிழும் இடையழகை நூறுமுறை தின்று" என வைரமுத்துவும்,
"அனிச்சப்பூக் கால்களையாள் பெய்தாள் நுசுப்பிற்கு
நல்ல படாஅ பறை"
என வள்ளுவரும் கூறுவது காண்க.

இதுநாள் வரை

2011-08-23T00:41:00.000-07:00

தமிழுக்குப் பொருத்தமில்லாத, ஆனால் பெருமபாலோர் பயன்படுத்தும் சொற்றொடர்களுள் இதுவும் ஒன்று .
இந்நாள்வரை அல்லது இன்றுவரை என்பனவற்றுள் ஒன்றைப் பயன்படுத்துவோம்.
இயன்றவரை தமிழின் இனிமை காப்போம். ஆங்கிலப் பயன்பாட்டைத் தமிழுக்கு மாற்றுவதைப் போலத் தமிழைச் சரியாகப் பயன்படுத்துவதும் தலையாய செயலாகும்.
இணையத் தமிழ் இனி இனிமைத்தமிழ்!

சுற்றிச் சுற்றி வருவேன்

2011-08-22T22:44:00.000-07:00

எனக்கான உன்பார்வையில்
எனக்காக
எதுவோ வைத்திருக்கிறாய்
என்ற கற்பனையில்தான்
வாழ்க்கை ஓடிக்கொண்டிருக்கிறது!

நீ வரும் வழியில்

மலைபோல
ஓங்கி உயர்ந்து நிற்கிறது என் காதல்!
நீயோ
புகையினூடே
புகுந்து செல்வதைப்போல
அதனை
ஊடறுத்துச் செல்கிறாய்!

மின்விசிறி
சுற்றிச் சுற்றி வந்து
அறையைக் குளிரூட்டிக் கொண்டிருந்தது!
என் காதலோ
உன்னையே சுற்றிச் சுற்றி வந்து
என்னைச்
சூடேற்றிக் கொண்டிருக்கிறது!

என்னத்தச் சொல்றது போங்கோள்!

2011-08-21T22:36:00.000-07:00

நேற்றிரவு கோயம்புதூரிலுள்ள அசைவ உணவகமொன்றுக்கு இரவுணவு அருந்துவதற்காகச் சென்றிருந்தேன்.வரிசைக்கு ஐந்து மேசைகள் என இரண்டு நெடுக்கு வரிசைகளுடன் நீல் செவ்வக வடிவிலைந்த குளிரூட்டப்பட்ட அறை அது. கடைசி வரிசையில் இடம் பிடித்து அம்ர்ந்தேன்.நீள் செவ்வகத்க்டின் இரண்டு குறும்பக்கங்களிலும் ஏறத்தாழ இரணடரை அடி அகலத் தொலைக்காட்சிப் பெட்டிகள் காதைப் பிளக்கும் இரைச்சலுடன் ஓடிக்கொண்டிருந்தன. எனது மேசைக்கு அருகில் இருந்த மேசையைச் சுற்றி ஒரு குட்ம்ப அம்ர்ந்திருந்தது.7 வயது மதிக்கத்தக்க சிறுவன் ஒருவனைக் கவனித்தேன்.உணவகத்தில் தன்னைச் சுற்றி நடப்பவை எவற்றிலுமே துளிக்கூடப் பிரக்ஞையின்றி அரை வாய் பிளந்தநிலையில் தொலைக்காட்சியைப் பார்த்துக் கொண்டிருந்தான்.தொலைக்காட்சி ஏற்படுத்தியிருந்த தலைவலியுடன் , எனக்கான ரொட்டிக்காக நான் காத்துக்கொண்டிருந்தேன்.

இன்றைய குழைந்தைகள்தாம் தொலைக்காட்சி என்ற மந்திரத்தின் முன் எப்படிக் கட்டுண்டு கிடக்கின்றனர் என்று சிந்த்தித்தவாறே மேசைக்கு வந்து விட்டிருந்த ரொட்டியைப் பிய்த்து பாலாடைக்கட்டி மசாலாவில் புரட்டி வாயிலிட்டு மென்று கொண்டிருந்த படியே , பக்கத்து மேசையைக் கவனித்தேன். அச்சிறுவனின் தந்தையும் அரை வாய் பிளந்த நிலையில் தொலைக்காட்சியை வெறித்துப் பார்த்துக் கொண்டிருந்ததை இப்போதுதான் கவனித்தேன். (மதனின் கார்ட்டூன் ஒன்று நினைவுக்கு வந்தது. அதனை இங்கே பகிர முடியவில்லை).

பல்கலைக்கழகத் தன்மை பொருந்திய நல்லதொரு குடும்பமென நொந்து கொண்டு ரொட்டியுட போராடத் தொடங்கினேன். உப்பு அதி'கரித்திருத' ரொட்டியின் இரண்டு மூன்று விள்ளல்களை உள்ளே தள்ளியவுடன் மீண்டும் பக்கத்தில் பார்த்தேன். அதே ரொட்டியைத்தான் அவரும் விழுங்கிக் கொண்டிருந்தார்.கழுத்து நிமிர்ந்து கண்கள் தொலைக்காட்சியிலேயே நிலைகுத்தியிருந்தன.ஓர் உணவகத்தில் ஒரு குறிப்பிட்ட கால இடைவெளியில் சமைத்துப் பரிமாறப் படும் ஒரே வகையான ரொட்டிகள் எல்லாமே ஒரே பக்குவத்தில் பிசையப்பட்ட மாவினாலானவையாகத்தான் இருக்கம் முடியும்.தொலைக்காட்சியில் தன்னை மறந்துவிட்டிருந்த அவருக்கு ரொட்டியில் ஏற்றப்பட்டிருந்த உப்பின் வீரியமெல்லாம் உறைக்கும் வரத்தைத் தேவன் அருளியிருக்கவில்லை.காய்ந்த சருகையும் காகிதத்தையும் வைத்திருந்தால் கூட மசாலாவில்; தோய்த்துத் தின்றிருப்பார் என நினைக்கிறேன். சற்றுத் திரும்பிப் பார்த்தேன். பரிமாறுபவர் முதல் எல்லா மேசைகளிலுமே இதே காட்சிதான் காணக் கிடைத்தது. கல்லாவில் இருந்தவர் கூடக் காசு வாங்கும் தருணங்கள் தவிர்த்து அங்கேதான் வாய் பிளந்திருந்தார்.

அப்படி என்னதான் தொலைக்காட்சியில் மாய மந்திர வித்தைகளைக் காட்டுகிறார்கள் என நானும் நிமிர்ந்த் பார்தேன். சவால்களுல், சவடால்களுமாக உளறிக் கொட்டிக்கொண்டு, ஒரே கையால் ஒன்பது அடியட்களை வீழ்த்தும் கதா நாயகனின் திரைக்காவியத்தைத்தான் மனிதகுலம் அப்படிப் பார்த்துக் கொண்டிருந்தது.நம்மவர்களின் ரசனையை நினைத்துப் புல்லரித்து, ஆனந்தக் கண்ணீர் மல்க ரொட்டிக்கும் பாலுக்கும் தொகை செலுத்திவிட்டு வெளியே வந்தேன்.ஜென் கதை ஒன்று நினைவுக்கு வந்தது.மரணப் படுக்கையில் கிடந்த துறவி ஒருவரிடம் என்ன வேண்டும் எனச் சீடர்கள் கேட்க, அவருக்கு மிகப்பிடித்தமாக்ன இனிப்பு ஒன்றைக் கேட்டாராம். சீடர்கள் கொ0ண்டு வந்து கொடுத்ததும்,அதனை வாஞ்சையுடன் எடுத்துத் துளித்துளியாக ரசித்து ருசித்து அனுபவித்துத் தின்றாராம். ஜப்பானில் தேநீர்த்திருவிழ என்ற ஒன்றைக் கேள்விப்பட்டேன் . ஒரு கோப்பைத் தேநீரை எப்படிக் குடிப்பார்கல் எனக் கேட்டு வியப்பிலாழ்ந்தேன். கவிப்பேரரசு வைரமுத்துவின் கொஞ்சம் தேநீர் நிறைய வானம் என்ர கவிதைத் தொகுப்பிலிருக்கும் 'ஆளுக்கொரு கோப்பை ' என்ற கவிதை நினைவுக்கு வருகிறது.வீர வசனங்களும், வெட்டுக் குத்தும் குத்துப்பாட்டும் கண்களுக்கும் காதுகளுக்கும் விருந்தாக இல்லாதபோதுதான் சிறிதுணவை வயிற்றுக்கும் நாம் ஈய வேண்டும்!

கவிதை வனைவதன் சாத்தியம்

2011-08-20T03:59:00.000-07:00

எழுத்துகள் ஒழுகிக்கொண்டிருக்கின்றன;
கவிதை கண்முன்னே
உறைந்து உருள்கிறது;
வெட்டவெளி விரிந்து கிடக்கிறது;
உன் முலையறிந்த விரல்களில்
நடுக்கம் பிறக்கிறது;
வெண்குதிரைகளில்
பறந்து பறந்து சலித்த
அலுப்பில்
கன்வுதெளிந்து உறக்கம் பீடிக்க,
நடுங்கும் விரல்களால்
இனியும் கவிதை வனைவதன்
சாத்தியத்தை அறியத்தான்
மூச்சிரைக்க ஓடுகிறேன்!

வலிமிகா இடங்கள்- வினைத்தொகை

2011-08-19T08:16:00.000-07:00

வலைப்பதிவுலக நண்பர்கள் பிழையின்றித் தமிழில் எழுத இது போன்ற பதிவுகள் உதவக்கூடும் என்ற நம்பிக்கையில் எனக்குத் தெரிந்தவற்றை எழுதுகிறேன். இணையத்தமிழ் இனிமைத் தமிழாக விளங்கட்டும்.

வல்லெழுத்துகளான க,ச,ட,த,ப,ற ஆகியவை எங்கெங்கு மிகும் , எங்கெங்கு மிகா எனத் தெரிந்து கொள்வோம். இப்பதிவில் வினைத்தொகை பற்றிப் பார்ப்போம். வினைத்தொகையில் வல்லினம் மிகாது. வினைத்தொகை என்பது காலம் கரந்த பெயரெச்சம் என நன்னூலார் குறிப்பிடுகிறார்(நூற்பா 364).

எ/கா:சுடுசோறு
ஊறுகாய்
உழுபடை முதலியன. பெயரெச்சம் என்பது பெயரைக்கொண்டு முடியும்
எச்சமாகும். எ..கா: வந்த சிறுவன்
எழுதிய பெண் ...
வினைத்தொகையானது முக்காலத்தையும் காட்டும் பெயரெச்சமாகும். எடுத்துக்காட்டில் காட்டப்பட்ட சுடு சோறு எனப்து சுட்ட சோறு, சுடுகின்ற சோறு, சுடும் சோறு என நிற்கும். அதேபோல, ஊறுகின்ற காய், ஊறியகாய், ஊறும் காய் என்பதறிக.

இத்தகைய வினைத்தொகையில் வல்லினம் மிகாது ,.

சுடுச்சோறு, உழுப்படை என்பவை பிழை. வினைத்தொகையில் வல்லினம் மிகும்போது பொருளே மாறியும் விடும்.

உ-ம்:வளைக்கரம், வளைகரம்

வளைகரம் எனபது வளைந்த கரம், வளைகின்ற கரம், வளையும் கரம் என வினைத்தொகையாகும். ஆனால் வல்லினம் மிகுந்து வளைக்கரம் என்றாகும் போது வளை சூடிய கரம் எனப் பொருளாகும்.

மலர்கண், மலர்க்கண் எனபதுவும் அதேபோலத்தான் என்பதறிக.

இனி இணையத்தமிழ்...., இனியதமிழ்!

கருத்துரையில் இணைப்புக் கொடுக்க

2011-08-19T01:48:00.000-07:00

பிளாக்கரில் கருத்துரைக்கும் போது பிற தளங்களுக்கு இணைப்புக் கொடுக்க வேண்டுமானால் கீழ்க்கண்ட கோடினைப் பயன்படுத்தலாம்.

<a href="இணைக்க விரும்பும் தளம்">விரும்பும் பெயர்</a>

பாட்டி வடை சுட்ட கதை!

2011-08-18T21:20:00.000-07:00

தமிழின் மிகப் பிரபலமான் , அனைத்து மக்களும் அறிந்த , "பாட்டி வடை சுட்ட கதை" யினை இங்கு வெண்பா வடிவத்தில் தருகிறேன். வெண்பா மீது கொண்ட தீவிரக் காதலால் பார்ப்பதையெல்லாம் வெண்பாவாக எழுதுவது எனக்கு ஒரு நோயாகவே ஆகிவிட்டது. நளவெண்பாவை ஒருமுறை படித்துப் பாருங்கள், வெண்பாவின் போதையை உணர்வீர்கள்!

காவியந்தான் பாடுவது கட்டாயம் என்னசொல்
சீவியென் மூளையைச் சிந்தித்து - நாவினால்
ஓதியே உங்கள் உயிரெடுப்பேன் ஆனாலும்
காதிரண்டால் கேட்பீர் கதை

தலைமுறைகள் கண்ட மரநிழல் ஒன்றில்
தலைநரைத்த பாட்டி தனியே - புலம்பி
வடைசுட்டு விற்றுத்தன் வாழ்வைக் கழித்து
நடைதளர்ந்தே போனாள் நலிந்து

எட்டித் திருடுமந்தக் காக்கைக்குப் பாட்டியும்
பட்ட சிரமம் புரியுமா? - தட்டினில்
கொட்டிக் குவித்திருந்த குட்டிவடை மீதொருகண்
ஒட்டியே ஊறியது நாக்கு!

கிட்டப் பறந்து கிழவி அசருங்கால்
தட்டப் பார்த்தது தருணமக் - கெட்டபுள்ளும்
என்னதான் செய்வாள் எழுபது தாண்டியபின்
கண்னயர்ந்தாள் பாட்டி களைத்து!

பசிவந்திடப் பத்தும் பறந்துபோம் என்பர்
பசியினால் காகம் பறந்து - விசையென
மொத்தவடைத் தட்டினில் ஒற்றைச் சிறுவடையைக்
கொத்தியே சென்றது கொண்டு!

ஓங்கி வளர்ந்தே உயர்ந்த மரமொன்றைப்
பாங்காய் அமர்ந்தபின் பார்த்தது - ஆங்கே
லபக்கிய பணடத்தை லாவகமாய் வாயில்
அதக்கிய வாறே அமர்ந்து

தின்றால் சிறுவடை தீர்ந்திடும் சீக்கிரம்
என்றந்தக் காக்கையும் எண்ணித்தான் - மென்று
விழுங்க மனமின்றி வாயில் வடையை
முழுதாக வைத்திருக்கு மோ?

நரிக்கும் இருந்தது நாசி அதனை
அரித்தே இழுத்திட்ட தாங்கே - மரத்தினில்
காக்கைதன் வாயால் கடித்த வடையதன்
மூக்கைத் துளைக்கும் மணம்.

வந்தது காற்றென வேகத்தில் நரியங்கு
கண்டது மேலிருந்த காக்கையை - சிந்தனை
மூட்டையில் சற்றே முடிச்சை அவிழ்த்தபின்
போட்டது காணொரு போடு.

ஏய்காக்கா பாரு படாஷோக்காக் கீறமாநீ
போய்டாத பாட்டொண்ணு பாடென்க - வாய்திறந்து
காகம் உடனங்கு கானம் இசைத்திட்ட
தாகவே தன்னை மறந்து!

விழுந்தது கீழே வடையுமதைக் கவ்வி
நழுவிப் பறந்தது நரியும் - அழுதபடி
ஆண்டு பலவாய் அரற்றியும் காகத்திடம்
மீண்டு வருமோ வடை?

கடவுச்சொல் மேலாண்மை

2011-08-18T00:32:00.000-07:00

பாஸ்வேர்டுகள் மறந்துபோகமலிருக்கச் சில எளிய வழிகள்:
கடவுச்சொல் எனப்படும் பாஸ்வேர்டுகள் நம் வாழ்வில் இரண்டறக் கலந்துவிட்ட்ன.மின்னஞ்சல் முகவரிகள், சமூக வலைத்தளங்கள், காணொளி மற்றும் நிழற்படப் பதிவகங்கள், வங்கிச்சேவைகள், இணைய இதழகள்......... என எங்கும் எதிலும் பாஸ்வேர்டுகள்தாம்.இத்தனை பாஸ்வேர்டுகளை எப்படி நினைவு கொள்வது?
இதோ சில எளிய வழிகள்!
#உங்களது பாஸ்வேர்டுகள் அனைத்தையும் ஒரு சிறியநோட்டுப் புத்தகத்தில் குறித்து வைத்துக் கொண்டு, அதனை 4 காப்பிகள் ஜெராக்ஸ் எடுத்து 4 நண்பர்களிடம் கொடுத்து வைக்கலாம். நீங்களும் தொலைத்து, மற்ற மூன்று நண்பர்களும் தொலைத்து விட்டால் கூட நாலாவது நண்பர் உங்களுக்கு உதவக்கூடும்.

#அனைத்துத் தளங்களூகும் ஒரே கடவுச்சொல்லாக வைத்துக் கொண்டு, அதனை உங்கள் வீட்டு முகப்பில் டிஜிட்டல் பேனராக வைத்துக் கொள்ளலாம் .அடிக்கடிப் பார்வையில் படுவதால் மறந்துபோகாமல் இருக்கும்.
#எஸ்.எம்.எஸ்., இ-மெயில் அனுப்பும் போது உங்கள் பாஸ்வேர்டினை சிக்னேச்சராகப் போட்டு அனுப்பலாம். மறந்து போகும் பட்சத்தில் யாரிடம் வேண்டுமானாலும் கேட்டுத் தெரிந்து கொள்ளலாம்.
#தினமும் 2016 தடவை ஒப்பித்துப் பார்த்துக் கொள்ளலாம்.
#கையில் பச்சை குத்திக் கொள்ளலாம்.
#காரின் பின் கண்ணாடியில் ஸ்டிக்கர் ஒட்டி வைத்துக் கொள்ளலாம்.
#மொபைல் போன் மற்றும் கம்ப்யூட்டரில் ஸ்கிரீன் சேவராகவோ, வால் பேப்பராகவோ வைத்துக் கொள்ளலாம்.
#பாஸ்வேர்டை மட்டும் வைத்து ஒரு ட்யூன் போட்டுப் பாடலாக அடிக்கடி முனுமுணுத்துக் கொள்ளலாம்.

#பாஸ்வேர்டை ரிங்டோனாக வைத்துக் கொள்ளலாம்.
#வளர்ப்புப் பிராணிகளுக்குப் பெயராக வைத்துக் கொள்ளலாம். அடிக்கடிக் கூப்பிடும் போது மறந்து போகாது.
#உங்களது கடைகள் மற்றும் நிறுவனங்களுக்குப் பெயராக வைத்துக் கொள்ளலாம்.
#உங்களது ஒரிஜினல் பெயரில் நீங்கள் யூசர் நேம் வைத்திருக்கும் போது பாஸ்வேர்டை அதேபெயரில் வைத்துக் கொள்ள முடியாது. அதனால் , பாஸ்வேர்டினைப் பெயராக வைத்து கெஜட்டில் கொடுத்து மாற்றிக் கொள்ளலாம்.

பத்துவகை அழகு

2011-08-17T07:35:00.000-07:00

நன்னூலில் பவணந்தி முனிவர் பத்து வகை அழகுகளைப் பட்டியலிட்டுக் காட்டுகிறார் . இன்றைய பதிவுலகக் காலகட்டத்தில் கூட அவை எவ்வளவு அழகாகப் பொருந்திப் போகின்றன என்பதைப் பார்த்தால்வியப்பாக இருக்கும் . பதிவர்கள் அனைவர்க்கும் இது தேவையான செய்தியாகும்.படித்துப் பாருங்கள் நண்பர்களே!

சுருங்கச் சொல்லல், விளங்க வைத்தல்,

நவின்றோர்க்கினிமை, நன்மொழி புணர்த்தல்,

ஓசையுடைமை, ஆழமுடைத்தாதல்,

முறையின்வைப்பே, உலகமலையாமை,

விழுமியது பயத்தல், விளக்குதாரணத்தது

ஆகுதல் நூலிற்கு அழகெனும் பத்தே!

(நன்னூல்-13)

சுருங்கச் சொல்லல்: சொற்கள் வீணாக விரிந்து செல்லாமல் சுருக்கமாகச் சொல்லுதல்(வின்ஸ்டன் சர்ச்சிலிடம் சொற்பொழிவுக்காகத் தேதி கேட்கச் சென்றவர்களிடம் எவ்வளவு நேரம் பேச வேண்டும் என்று கேட்டாராம் சர்ச்சில்!ஒருமணி நேரம் என்றதற்கு , சரி நாளையேவருகிறேன் என்றாராம் . பத்து நிமிடம் என்றவர்களிடத்து ஒருவாரம் அவகாசம் கேட்டாராம்)

விளங்க வைத்தல்: சுருக்கமாகச் சொன்னாலும் விளங்கும் படி இருத்தல் வேண்டும்.

நவின்றோர்க்கினிமை: படிப்பவர்க்கு இன்பத்தைத் தருதல்(நடை ஆங்கிலத்தில் STYLE என்று சொல்வார்கள்.திரு.விக. அறிஞர் அண்ணா, கல்கி போன்றோரை நினைவு கூர்க.. தென்றல் நடை அடுக்கு மொழி, எளிய நடை , அங்கத நடை என...)

நன்மொழி புணர்த்தல்:நல்ல சொற்களைப் பயன் படுத்துதல் (பிறமொழிக்கலப்பின்றி எழுதுதல், சரியான சொல்லைப் பயன்படுத்துதல் , பார்த்தல் நோக்குதல், காணுதல்,என்பவற்றுக்குள் உள்ள நுட்பமான வேறுபாடுகளை அறிந்து பயன் படுத்துதல்முதலியன)

ஓசையுடைமை: கவிதை புனைவோர்க்கு ஓசை முக்கியம்.யாப்பருங்கலக்க்காரிகையை நாம் விளக்கும் போது இதனைத் தெளிவுறத் தெரிந்து கொள்ளலாம்)

ஆழமுடைத்தாதல்:மேலோட்டமான கருத்தாக இல்லாமல் ஆழமான கருத்துக்களைக் கூறுதல் (திருக்குறள் போல)

முறையின் வைப்பே:கோவை மாறாமல் வரிசைக்கிரமமாகச் சொல்லுதல்.

உலகமலையாமை: வழக்கத்துக்கு மாறாமல் சொல்லுதல்

விழுமியது பயத்தல்:சிறந்த பொருளைத் தருதல்

விளக்குதாரணத்தது: விளங்கத்தக்க, பொருத்தமான எடுத்துக்காட்டுகளை ஆங்காங்கே காட்டுதல்.

இவையெல்லாம் நூலுக்கு அழகெனக்கூறும் நன்னுலார். பத்துவகைக் குற்றங்களையும் பட்டியலிட்டுள்ளார். அதனைப் பின்வரும் இடுகையில் காண்போம்.

வலைப்பூவின் ஃபெவிகானை (FAVICON) மாற்ற....

2011-08-17T02:07:00.000-07:00

உங்கள் வலைப்பூ திறக்கப்படும் டேபில் தெரியும் குறியீட்டை உங்கள் விருப்பப்படி மாற்றிக்கொள்ளலாம்.எனது வலைப்பூ உங்களது இணைய உலாவியின் டேபில் ஒரு சிறிய சிவப்பு நிறப் பந்துடன் தெரியும். அது போல நீங்களும் எளிதில் மாற்றிக் கொள்ளலாம்.

#உங்களது ப்ளாக்கர் அக்கவுன்டில் லாக் -இன் (LOG IN)செய்து கொள்ளவும்,

#டிசைன் (design)என்ற பகுதிக்குச் செல்லவும்

#பேஜ் எலமன்ட்(page element) என்ற டேப்(tab)- ஐத் தேர்ந்தெடுக்கவும்.

#அதன் இடது மேல் மூலையில் ஃபெவி் கான் எடிட்(Favicon edit) என்ற பகுதியைச் சொடுக்கவும்

#இப்பொழுது வேறொரு வின்டோவில் உங்களுக்குத் தேவையான படத்தைத் தேர்வு செய்யவும்.

#உங்கள் கணினியில் சேமிக்கப்பட்ட படத்தினைத் தேர்வு செய்து சேவ் செய்து வெளியேறவும்.

மிக எளிதான செயல் முறை என்பதால் பட விளக்கம் இதற்குத் தேவையில்லை என நினைக்கிறேன்

அழகுச் சுளை

2011-08-16T22:20:00.000-07:00

courtesy:http://www.chakpak.com/celebrity/amala-paul/43675

http://movies.sulekha.com/stargallery/amala-paul/91.htm

http://movies.vinkas.in/2011/04/amala-paul-shares-her-love-matter-with-us/

ஒரு சாண் வயிறு

2011-08-16T08:39:00.000-07:00

1.வீட்டில் பெண்களும், ஓட்டல் மற்றும் விருந்துகளில் ஆண்களும்தான் பெரும்பாலும் சமைப்பதைக் கண்டிருக்கிறேன்.இன்று கோயம்புத்தூரில் ரெயில் நிலையம் அருகில் அக்ஷயா HOMELY மெஸ்ஸில்மதிய உணவு அருந்தினேன்.முழுக்க முழுக்கப் பெண்களே நடத்தும் உணவகம் அது.சமையலர், சப்ளையர், மேசை துடைப்பவர்,முதல் கல்லா வரை எல்லாமே பெண்கள்தாம்.வீட்டுச் சமையல் போல இருந்தது. உறைப்பும் கார்ப்புமான நாவில் நீர் ஊறச் செய்யும் அசைவ உணவுவகைகள்.ஆட்டு மூளை வறுவல் வெறும் 25 ரூபாய்தான் விலையிட்டிருந்தார்கள்.மதியம் 12 மணி முதல் மாலை 4 மணிவரை மட்டுமே சேவை உண்டு. ஞாயிறு விடுமுறை. மாவட்ட ஆட்சியர் அலுவலகம், சினிமா காம்ப்ளக்ஸ், ரெயில் நிலையம், சினிமாப் படக் கம்பெனிகள், ஒருங்கிணைந்த நீதிமன்ற வளாகம்,, காவல் துறை அலுவலகம், வங்கிகள் எனக் கூட்டம் அலைமோதும் இடம் அது

உண்டு முடித்து வெகு நேரமாகியும் அந்தத் திருப்தி இருந்தது.வயிற்றுக்கு எந்த ஒரு நெருடலுமே இல்லை. நன்றாக இருந்தது எனப் பாராட்டி விட்டு வந்தேன் கல்லாவில்..

2.சென்ற வாரம் திருச்சி சென்றிருந்தேன். சைவ உணவகம் ஒன்றில் மதிய உணவு முடித்து விட்டு நானும் எனது நண்பரும் எழுந்தோம். என்ன காரணத்தினாலோ நாங்கள் இருவருமே அன்று தயிரைத் தொடவில்லை. மேசையைச் சுத்தம் செய்ய வந்த முதியவர் தயிர்க்கிண்ணங்களைப் பார்த்துவிட்டு அங்கு சூபர்வைசர் போல இருந்த ஒருவரிடம் ஏதோ சென்று கேட்டார்.அவர் மேசைக்கு வந்து இரண்டு கிண்ணங்களிலுமிருந்த தயிரை எடுத்து ஒரு டம்ளரில் ஊற்றி அந்த முதியவரிடம் கொடுத்தார்.அவர் அதைப் பத்திரமாக ஒரு சன்னலில் வைத்துவிட்டு, மேசையைச் சுத்தம் செய்தபின் வேக வேகமாகக் குடித்தார்.எனக்கு மனதை என்னவோ செய்தது.ஒவ்வொரு நாளூம் எததனையோ கோடிப்பேர் இரண்டு வேளை உணவுடன்தான் உறங்கச் செல்கின்றனர் எனப் புள்ளிவிவரங்களில் படித்திருக்கிறேன்.. ஆனால் ஓட்டல்களில் நாள்தோறும் வீணாகும் உணவுப் பொருட்கள்தாம் எத்தனை எத்தனை? கிண்ணங்களில் கொண்டு வந்து பரிமாறும் முறையை ஒழித்தாலே எவ்வளவோ பொருட்கள் வீணாவது தவிர்க்கப்படும். பஃபே முறையிலும் அதிகமாக வீணாகாது.

எல்லாரும் பசியாறி இன்புற்றிருக்கும் நாள் வரவேண்டும்.

3.கோயம்புத்தூரில் சிங்காநல்லூரில் அமைந்திருக்கும் சாந்தி கியர்ஸ் கேண்டீனில் பலமுறை உணவருந்தியிருக்கிறேன்.சாந்தி கியர்ஸ் என்பது பன்னாட்டளவில் முக்கியத்துவம் வாய்ந்த ஒரு நிறுவனம்.அதன் விளம்பர வாசகங்களில் "TURNING THE WHEELS OF INDUSTRIES" என்பது என்னுடைய மிக விருப்பமான வரிகளுள் ஒன்றாகும்.பலவகையான சமூகத் தொண்டுகளில் தன்னை ஈடுபடுத்திக் கொண்டுள்ள நிறுவனம் அது.அந்த கேண்டீனில் ஒருமுறை ஏறத்தாழ ஐந்நூறுபேர் சாப்பிட முடியும் எனக் கணிக்கிறேன்.சுயசேவை முறையில் இயங்கும் உணவகம் அது.மிகமிகச் சுவையான, பலவிதமான சைவ உணவுகளை, நன்கு பராமரிக்கப்படும் அறையில் பல ஊழியர்களின் பணியில் வழங்குகிறார்கள்.நாங்கள் நான்கு பேர் வயிறார முழு இரவுணவு உண்டும் எண்பத்தெட்டு ரூபாய் மட்டுமே பில் வந்தது. மதிய உணவு வெறும் இருபத்தைந்து ரூபாய்.அங்கு சாப்பிட்ட மசாலா தோசை இன்னமும் என் விரல்களிலும் நாவிலும் மணக்கிறது.உண்டி கொடுத்தோன் உயிர் கொடுத்தோன் என்பார்கள். வாழ்க அந்த வள்ளல் பெருமான்.ஏற்கனவே காசு வாங்காமல் உணவளிக்கும் அன்னலட்சுமி என்ற உணவகம் கோயம்புத்தூரில் இயங்கி வருவதைப் பற்றி எழுதியிருந்தேன்.

"பகுத்துண்டு பல்லுயிர் ஓம்புதல் நூலோர்

தொகுத்தவற்றுள் எல்லாம் தலை"

அதை- அவற்றை

2011-08-15T21:52:00.000-07:00

"நல்ல நூல்கள் என்றால் அதை உடனே வாங்கிவிட வேண்டும்"

இது பிழையான சொற்றொடராகும்.நூல்கள் என்பது பன்மையாதலால்,
"நல்ல நூல்கள் என்றால் அவற்றை உடனே வாங்கிவிட வேண்டும்" என்பதே சரியான பயன்பாடாகும்.

"பையில் உள்ளது எல்லாமே அழுகிய பழங்கள்"
இங்கு பழங்கள் என்பது பன்மையாதலால்,
"பையில் உள்ளவை எல்லாமே அழுகிய பழங்கள்" என்று வர வேண்டும்.

#"நூலகத்தில் அறுபதாயிரம் புத்தகங்களுக்கு மேல் இருக்கிறது"

இதுவும் பிழையான சொற்றொடராகும்.இதன் சரியான வடிவம்:
"நூலகத்தில் புத்தகங்கள் அறுபதாயிரத்துக்கும் மேல் இருக்கின்றன" என்பதாகும்.
நாம் நாள்தோறும் இத்தகைய பிழையான சொற்றொடர்கள் பலவற்றைக் கேட்டும், பயன்படுத்தியும் வருகிறோம். சற்றுக் கூர்ந்து கவனித்தால் இவற்றைத் திருத்திக் கொள்ள முடியும். வாழ்க தமிழ்!

ஸ்வீட் ட்வீட்ஸ்

2011-08-14T07:48:00.000-07:00

சிரங்கு வந்தவன் கையும் செல்போன் எடுத்த்வன் கையும் சும்மா இருக்காது என்பார்கள்.கீபோர்ட் தொட்டவன் கையும் தான், பொழுதுபோகாம தத்துப் பித்துன்னு நாம ட்வீட் பண்ணதப் படிச்சுப் பாருங்க!

மட்டமான மனிதர்கள் மனிதர்களையும்,சாதாரண மனிதர்கள் சம்பவங்களையும்,வெற்றியாளர்கள் கருத்துக்களையும் பற்றித் தங்களுக்குள் பேசிக்கொள்ளுகிறார்கள்

மழைநீர்க்குழாய் என்ற ஒன்றுமட்டும் கண்டுபிடிக்கப்படாமல் இருந்திருந்தால், கிரைம் நாவல்கள் பல எழுதப்படாமலே போயிருந்திருக்கும்.

பார்ப்பதை எல்லாம் ட்வீட் செய்கிற பக்குவம் உங்களுக்கு வந்துவிட்டது என்றால்....நிச்சயம் உடனே நீங்கள் மருத்துவரைச் சந்திக்கவேண்டும்!

எந்தப்பக்கம்திருகினால் தண்ணீர்வரும் என்பதைக்கண்டுபிடிக்க முடியாதஅளவுக்குவாஷ்பேஸின்குழாய்களைடிசைன் செய்வதற்குத்தான்எவ்வளவுமெனக்கெடுகிறார்கள்?

பத்துப் பேர் கூட இல்லாத பஸ் ஸ்டாப்பில் பத்து லட்சம் பேர் தன்னையே பார்ப்பது போன்ற தன்னுணர்வுடன் நடக்கிறீர்கள் என்றால் , நீங்கள் ஒரு பெண்!

ப்ரியமான் ஸகாக்களோ, ஸகியோ விடைபெறும்போது TATA சொல்வதுதான் எவ்வளவு திவ்யமாக உள்ளது! FEEL பண்ணிப் பாருங்கள்!!

கல்கி இதழில் வெளிவந்த நையாண்டிக் கவிதை, நான் இன்றும் ரசித்து மகிழ்வது:நான் நீ அவன் இவன் டாஸ்மாக்! (ஒண்ணுங் கீழ் ஒண்ணு)

எதற்கெல்லாமோ எக்சேஞ்ச் ஆஃபர் தருகிறார்கள் என்று அலுத்துக்கொள்கிறார் அறுபது கடந்த நண்பர் ஒருவர் மனைவியுடன் சண்டை போட்டு விட்டு வந்த பிறகு!
ஜீன்ஸ் பேன்ட்டின் மீது பெல்ட்டுக்குப்பதிலாக அரைஞாண் கயிற்றைச் சுற்றிக் கொள்பவர்கள் எல்லாம் உள்ளே கோவணம் கட்டியிருக்கமாட்டார்கள்# நம்பிக்கை

சங்கீதம் என்ற வார்த்தைக்குப் பிறகு சந்தோஷம் என்ற வார்த்தை இல்லாத எந்தத் திரைப்படப் பாட்லையும் நான் கேட்டதே இல்லை

வளர்ச்சியடைந்த நாட்டுக்கான அறிகுறி, அதன் நடுத்தர மக்கள் அடிக்கடிவெளியே சென்று சாப்பிடுவதுதா - பொருளாதார நிபுணர்கள்(தினத்தந்தி- 14.08.2011)

நிலாவில் கவிதை ஊற்றுகள் ஏதேனும் சுரக்கின்றனவா என்று அடுத்த முறை செல்பவர்கள் கண்டறிந்து வரவேண்டும்!

you will only get what you deserve , not what you desire . #first rank in test cricket

பார்வை

2011-08-08T08:56:00.000-07:00

எல்லாவற்றையும்
அழகாக்கி விடுகிற உன் பார்வை
என்னை மட்டும் பைத்தியமாக்கி விடுகிறது!

உன் பார்வை
என்னைத் தின்று கொண்டிருக்கிறது;
உன் அழகு
என்னைக் கொன்று கொண்டிருக்கிறது;
என் காதலோ
உன் காலடியில் நின்று
உயிர்ப்பிச்சை கேட்டு
நின்று கொண்டிருக்கிறது.

புதுக்கவிதைகள்

ஏன் இதுகள் இப்படி?

2011-08-06T09:09:00.000-07:00

கோயம்புத்தூர் நஞ்சுண்டாபுரம் இரயில்வே பாலம் கட்டப்பட்டுக் கொண்டிருப்பதால், இராமநாதபுரத்தில் இருந்து போத்தனூர் வரும் வாகனங்கள் ஒரு 2 கி.மீ. மண்பாதையில் திருப்பி விடப்படுகின்றன.இடையில் ஒரு லெவல் கிராஸிங் இருக்கிறது.கேரள மாநிலத்திலிருந்து வரும் சரக்கு மற்றும் பயணிகள் ரயில்கள் அடிக்கடிக் கடக்கும் பாதை அது.சென்ற வாரத்திலொரு நாள் மாலையில் சரக்கு ரெயில் ஒன்று கடந்து சஎல்வதற்காகக் கேட் மூடப்பட்டிருந்தது.ரெயில் கடந்ததும் கேட் திறக்கப்படுவதற்குள் இரு புறங்களிலும் வாகனங்கள் குண்டக்க மண்டக்க வந்து, ஓர் இருபது நிமிடம் டிராஃபிக் ஜாமாகி பெரிய அதகளமாகி விட்டது.மறுபடியும் ரெயில் வந்தால் கேட்டை மூட முடியாத சூழ்நிலை.வண்டிகள் எந்தப் பக்கமும் நகர முடியவில்லை.இருப்புப் பாதையின் குறுக்காகவே ஏறத்தாழப் பத்துப் பதினைந்து வண்டிகள் நிற்கின்றன.ஒன்றுமே இல்லை.கேட் திறந்ததுமே அவரவர் இடது பக்கமாகச் சென்றிருந்தால் போதுமானது, ஒரு சிறு குழப்பம் கூட நேர்ந்திருக்காது.ஆனால் இருபுறங்களிலும் வலது பக்கம் ஏறி வர முயன்றதால் இத்தனை குழப்பங்கள், பதற்றம்..."ஸ்பீட்" என்ற ஆங்கிலப் படம் நினைவுக்கு வந்தது.ஏன் நமக்கு இந்த ஒழுங்குமுறைகள் இயல்பாக வரமாட்டேனென்கிறது?

இது மட்டுமன்று,ப்ரிய பட்டியக்லே போடலாம்...

#பேருந்து நிலையத் தரைகளிலெல்லாம் வெற்றிலை, பாக்கு, பான், சூயுங்கம் போன்றவற்ரைத் துப்பித் தரைக்கு டைல்ஸ் போடுவது.

#பேருந்துப் பயணத்தின் போது ஒன்றரையணா தகர டப்பா செல்போனில் நாராசமான C-கிளாஸ் திரைபாடல்களை லவுட்ஸ்பீக்கரில் அலறவிட்டு , ரசித்து ரணகளமாக்குவது...

#நாலுபேர் முன்பாக பட்டு, ரைட்டு, லெப்ட்டு என பட்லர் இங்கிலீஷ் பேசி பந்தா விடுவது

#நான்கு வழிச்சாலைகளில் ஆபத்தான எதிர்த்திசையில் திடீரென வந்து அதிர வைப்பது,....

#பெட்ரூமிலிருந்து பாத்ரூம் செல்வதுபோல கண்ட இடங்களிலும் சாவதானமாக சாலையைக் கடந்து சதிசெய்வது...

#சகலவிதமான கழிவுகளையும்பற்றிக் கவலைப்படாமல் அவற்றின் ஓரத்தில் இருபது லட்சம் வீட்டு லோன் வாங்கி வீடுகட்டிக் கண்ணைப் பறிக்கும் வண்ணங்கள் பூசுவது

#அடுத்தவரின் முகத்துக்கு நேராகப் புகைவிடுவது

#கொஞ்சம் கூடக் கூச்சமின்றி வெட்டவெளியில் மலம் கழிப்பது..

குஜ்ரோமசோமில் நிகழ்ந்த கோளாறுகளா எனத் தெரியவில்லை, அப்படியே வைத்துக் கொண்டாலும் ஆறாம் அறிவை அடகு வைத்து விட்டோமா நாம்?

க.சீ.சிவகுமார்-சமகால ஆளுமை

2011-08-05T10:08:00.000-07:00

எனது பள்ளிப்பருவத்திலிருந்தே க.சீ.சிவகுமாரின் எழுத்துக்கள் என்னை வசீகரித்து வந்திருக்கின்றன.ஆனந்த விகடனின் மூலமாக அவரது சிறுகதைகள் எனக்கு அறிமுகமாயின.அவருடைய எழுத்துகளில் ஏதோ ஒருவித அன்னியோன்யமும், கிறக்கமும் எனக்கும் புரிபடத் தொடங்கின.சொக்கவைக்கும் நடைக்குச் சொந்தக்காரராகவே அவரை நான் இன்று அறிந்து வைத்திருக்கிறேன்.முன்னாளில் கோயம்புத்தூர் மாவட்டத்திலும், பின்னாளில் ஈரோடு மாவட்டத்திலும், இந்நாளில் திருப்பூர் மாவட்டத்திலும் இடம் பிடித்திருக்கும் கன்னிவாடிதான் அவரது ஊர் என்று அறிந்துகொண்டேன்.தாராபுரம், மூலனூர்ப் பகுதிகளைச் சுற்றியே அவரது கதைக்களம் அமைந்திருக்கும்.மிக நெருக்கமான ஓர் உணர்வு அவரது கதைகளில் மேலுடுவதை உணர்ந்திருக்கிறேன்.நகைச்சுவை இழையோடும் நடையில், சமூகத்தின் எளிய மனிதர்களைப் பேசுகின்றன அவரது கதைகள்.மனித மனத்தின் நுண்ணுனர்வுகளைப் படம் பிடித்துக் காட்டும் வகையில் , வெள்ளந்தியான கிராம மனிதர்களின் இயல்பு வாழ்க்கையும், குடும்பத்தின் அடிப்படை உறுப்பினர்களுக்கிடையிலான சுவாரஸ்யமான தொடர்புகளும் அவரது எழுத்துகளில் வெளிப்படுகின்றன.கதையின் நாயகன் மிக யதார்த்தமாகப் பேசுவதாகவே எல்லாக் கதைகளும் அமைந்திருக்கின்றன.ஜூனியர் விகடனில் அவர் எழுதிய ஆதிமங்கலத்து விசேஷங்கள் இன்றும் எனக்கு மனப்பாடமாகத் தெரியும்.சிவகுமாரின் வரிகள் பலவற்றை நான் அவ்வப்போது அசை போட்டு ஆனந்தப் படுவதுண்டு.ஆதிமங்கலத்து விசேஷங்களில் தொலைபேசி, சினிமா, கார் போன்றவை ஊருக்குள் அறிமுகமான புதிதில் நிகழ்ந்த கூத்துகளை அவர் விவரித்திருந்த விதம் அலாதியானது.எனது நண்பரும், தீவிர வாசிப்பாளருமான தமிழாசிரியர் திரு. கோவிந்தராஜ் அவர்களிடம் அந்தத் தொகுப்பைக்கொடுத்தேன். வாசித்துவிட்டு அழகான அனுபவம் என்ரு மிகவும் சிலாகித்தார்.ஆனந்த விகடனில் சிவகுமாரின் காதல் ஒளிக என்ற சிறுதொடர் மிகப் பரவசம் தருவதாக இருந்தது.எண்ணற்ற சிறுகதைகள் எழுதியுள்ள சிவகுமாரின் "நீலவானம் இல்லாத ஊரே இல்லை' என்ற தொகுப்பும் "கன்னிவாடி" என்ற தொகுப்[பும் வாசிப்பில் எனக்குப் புதிய பரிமாணங்களைக் காட்டின."நள்ளென் யாமம்"என்ற பெயரில் அவரது வலைப்பூ எனது வாசிப்புக்குத் தீனி போட்டு வருகிறது.சிறுகதைகள் மட்டுமல்லாது கட்டுரைகள், கவிதைகளும் அவரது படைப்புகளில் உண்டு. 'நிலா நாற்பது' என்னும் பிரிவில் அவரது குட்டிக்குட்டிக் கவிதைகள் ரசனை மிகுந்தவை . க.சீ.சிவகுமாரை வாசித்துப் பாருங்கள், புதியதோர் உணர்வைப் பெறுவீர்கள்!